प्रधानमन्त्रिणः मोदीवर्यस्य कार्यकाले देशस्य महिलानां जीवने परिवर्तनमागतम् : मुख्यमन्त्री डॉ. यादवः

भोपालम्, १६ सितम्बरमासः (हि.स.)। मध्यप्रदेशस्य मुख्यमन्त्री डॉ. मोहनयादवः अवदत् यत् प्रधानमन्त्री नरेन्द्रमोदी सदैव नारीशक्तेः प्राथमिकतां कृत्वा महिलाः आत्मनिर्भराः कर्तुं विकासस्य मुख्यधारायां च संयोजयितुं बह्व्यः महत्त्वपूर्णाः योजनाः कार्यान्वितवान्। तस्य कार्यकाले सम्पूर्णदेशस्य महिलानां जीवने महत्त्वपूर्णं परिवर्तनमागतम्।

मुख्यमन्त्री डॉ. यादवः बुधवासरे प्रकाशिते सन्देशे अवदत् यत् प्रधानमन्त्रिणः मोदीवर्यस्य जन्मदिवसस्य १७ सितम्बरदिनाङ्कस्य अवसरे प्रदेशे मासपर्यन्तं सञ्चाल्यमाने सेवासङ्कल्पाभियानस्य अन्तर्गतं विभिन्नाः कार्यक्रमाः आयोज्यन्ते। अस्य अभियानस्य अन्तर्गतं दशदिनानि आङ्गणमेलनसेवाकार्यक्रमस्य भविष्यन्ति। प्रदेशे २६ सितम्बरतः ५ अक्टूबरपर्यन्तम् आयोजितस्य आङ्गणमेलनसेवाकार्यक्रमस्य उद्देश्यं महिलानां बालकानां च कल्याणं सशक्तीकरणं च प्रोत्साहयितुम् अस्ति।

मुख्यमन्त्री ‘सेवासङ्कल्पाभियानस्य’ अन्तर्गतं प्रदेशस्य भगिनीभ्यः १७ सितम्बरदिनाङ्के दीपप्रज्वलनस्य आह्वानं कुर्वन् अवदत् यत् मध्यप्रदेशसर्वकारः सेवाभावनया महिलानां सामाजिकम् आर्थिकं च सशक्तीकरणं प्रति निरन्तरं कार्यं करोति। महिलानां जीवने आगतं सकारात्मकं परिवर्तनम् एतेषां प्रयासानां सफलतायाः प्रमाणम् अस्ति। महिलाः सशक्ताः अभवन्, आत्मनिर्भराः अभवन्, प्रत्येकस्मिन् क्षेत्रे च अग्रे वर्धन्ते। सेवायाः सङ्कल्पस्य च भावनया राज्यसर्वकारस्य लक्ष्यं वर्तते यत् मध्यप्रदेशस्य सर्वाभ्यः मातृभ्यः भगिनीभ्यश्च अधिकाधिकाः अवसराः सम्मानश्च प्राप्येरन्। अस्माकं सर्वकारः सशक्तनारी, सशक्तपरिवारः, समृद्धमध्यप्रदेशश्च इति दृढसङ्कल्पेन अग्रे वर्धते।

मुख्यमन्त्री डॉ. यादवः अवदत् यत् प्रधानमन्त्री मोदी सुशासनस्य चत्वारः स्तम्भान् निर्धारितवान्, येषु निर्धनाः, कृषकाः, युवानः, नारीकल्याणं च अन्तर्भवन्ति। सः स्वप्राथमिकतासु सदैव महिलाभ्यः सर्वोच्चं स्थानं प्रदत्तवान्। प्रधानमन्त्री मोदी लोकसभायां विधानसभासु च महिलानां कृते आरक्षणं सुनिश्चितं कर्तुं ‘नारीशक्तिवन्दनाधिनियमं’ संसदः पुरतः आनीतवान्। मध्यप्रदेशसर्वकारेण अपि अर्धजनसङ्ख्यायै पूर्णाधिकारं प्रदातुं अस्य अधिनियमस्य कार्यान्वयनस्य सङ्कल्पः पारितः अस्ति। अद्य न चेत् श्वः, वयं सर्वे मिलित्वा मातृभ्यः भगिनीभ्यश्च तेषाम् अधिकारं प्रदाप्य एव स्थास्यामः।

मुख्यमन्त्री डॉ. यादवः प्रदेशवासिभ्यः विशेषतः भगिनीभ्यश्च प्रधानमन्त्रिणः मोदीवर्यस्य प्रति स्वस्नेहं सम्मानं कृतज्ञतां च प्रकटयित्वा १७ सितम्बरदिनाङ्के ‘आशीर्वादस्य दीपं’ प्रज्वालयितुं, ‘सेवातः सङ्कल्पम्’ इति अभियाने सहभागिनः भवितुं, आङ्गणमेलनसेवाकार्यक्रमं च सफलं कर्तुम् आह्वानं कृतवान्।

Hindusthan Samachar / Dheeraj Maithani