Enter your Email Address to subscribe to our newsletters
उत्तरप्रदेशे २,७६९.५९ मेगावाट् सौरक्षमता संस्थापिता
सार्धलक्षाधिकानां उपभोक्तॄणां विद्युद्बिलं शून्यम्
लखनऊ, १६ सितम्बरमासः (हि.स.)। प्रधानमन्त्रिणः सूर्यगृहः निःशुल्कविद्युद्योजना उत्तरप्रदेशे गार्हस्थ्यविद्युतः स्वरूपं परिवर्तितवती अस्ति। प्रदेशे अधुना यावत् ८,२४,४९२ गृहाणां छदिषु सौरसंयन्त्राणि संस्थापितानि सन्ति तथा च समग्ररूपेण २,७६९.५९ मेगावाट् क्षमता संस्थापिता अस्ति, येन प्रतिदिनं प्रायः १.२५ कोटियूनिट् स्वच्छविद्युत् उत्पाद्यते। अस्याः उपलब्धेः सह उत्तरप्रदेशः गार्हस्थ्यच्छदाधारितसौरशक्तेः विषये देशस्य अग्रणीषु राज्येषु सम्मिलितः अभवत्।
प्रतिदिनं प्रतिकिलोवाट् ४.५ यूनिट् इति औसतमानस्य आधारेण एतत् उत्पादनं प्रतियूनिट् ६.५० रूप्यकाणां दरया प्रतिदिनं प्रायः ८.१० कोटिरूप्यकमूल्यस्य विद्युतः समतुल्यं भवति। अस्य आधारेण प्रदेशे प्रतिवर्षं प्रायः २,९५६ कोटिरूप्यकाणां बचतस्य आर्थिकलाभस्य वा अनुमानम् अस्ति, यः प्रत्यक्षरूपेण सामान्योपभोक्तृणां धनकोषं प्राप्नोति।
सार्धलक्षपरिवाराणां विद्युद्बिलं शून्यं वा ऋणात्मकम्
प्रधानमन्त्रिणः सूर्यगृहयोजनायाः उपभोक्तृबिलविवरणानुसारं जून् २०२६ मासे प्रदेशस्य १,२५,२६२ उपभोक्तॄणां विद्युद्बिलं शून्यं वा ऋणात्मकं वा आसीत्। अर्थात् एतेषां परिवाराणां कृते तस्मिन् मासे विद्युदर्थं किमपि भुगतानं कर्तव्यं नाभवत् अथवा तेषां खाते धनराशिः सञ्चितरूपेण अङ्किता अभवत्। ऋणात्मकबिलस्य स्थितिः तदा भवति, यदा उपभोक्ता जालकात् गृहीतायाः विद्युतः तुलनया अधिकां विद्युतं जालके प्रददाति तथा च एषा अतिरिक्तविद्युत् तस्य आगामीषु बिलेषु समायोज्यते।
७,३०० कोटिरूप्यकेभ्यः अधिका सहायता सम्बलं जाता
योजनायाः अन्तर्गतं प्रदेशस्य उपभोक्तृभ्यः अधुना यावत् ५,४०० कोटिरूप्यकेभ्यः अधिका केन्द्रीयवित्तीयसहायता प्रदत्ता अस्ति, यदा उत्तरप्रदेशसर्वकारस्य पक्षतः लाभार्थिभ्यः १,९०० कोटिरूप्यकेभ्यः अधिकं राज्यीयानुदानं प्राप्तम् अस्ति। समग्ररूपेण ७,३०० कोटिरूप्यकेभ्यः अधिकया एतया सहाय्यराश्या गार्हस्थ्योपभोक्तृणां कृते सौरसंयन्त्रस्थापनं अधिकं सुलभं किफायतपूर्णं च जातम् अस्ति।
प्रतिवर्षं ३६.६ लक्षटनमितस्य कार्बनउत्सर्जनस्य बचतिः
संस्थापितया २,७६९.५९ मेगावाट् क्षमतया प्रतिवर्षं प्रायः ३६.६ लक्षमेट्रिक्टनमितं कार्बनडाइऑक्साइड् उत्सर्जनं न्यूनीभविष्यतीति अनुमानम् अस्ति, यत् प्रायः १६.५ कोटिपरिपक्ववृक्षैः एकस्मिन् वर्षे शोष्यमाणस्य कार्बनस्य मात्रायाः समतुल्यम् अस्ति। छदाधारितप्रारूपस्य कारणेन प्रायः १०,६१७ एकड् भूमिः बृहद्भूआधारितेषु सौरसंयन्त्रेषु प्रयुक्ता भवितुं रक्ष्यते तथा कृषिकार्याय, आवासीयप्रयोगाय अन्येषां उत्पादकप्रयोगाणां च कृते सुरक्षिताऽस्ति।
८५ सहस्रेभ्यः अधिकजनानां प्राप्तः रोजगारस्य आधारः
अनया योजनया प्रदेशे ८५,००० अधिकानां प्रत्यक्षरोजगाराणां आधारः निर्मितः अस्ति तथा संस्थापितक्षमतायाः वर्धनेन एते अवसराः निरन्तरं वर्धन्ते। अभियन्तॄणां, प्राविधिककर्मचारिणां, विद्युत्कर्मचारिणां, सर्वेक्षकाणां, पर्यवेक्षकाणां, आपूर्तिपरिवहनसम्बद्धकर्मचारिणां तथा अनुरक्षणसेवासम्बद्धानां जनानां कृते रोजगारस्य स्वयम्रोजगारस्य च नूतनाः मार्गाः उद्घाटिताः सन्ति। प्रदेशे ७,७५० पञ्जीकृतसौरविक्रेतॄणां जालकं उपभोक्तृभ्यः सर्वेक्षणं, रूपाङ्कनं, स्थापनं, विद्युत्संयोजनं, निरीक्षणं, संयन्त्रप्रचालनम्, अनुरक्षणं च इत्यादीनि सेवाः प्रापयति।
अस्याः योजनायाः क्रियान्वयनस्य अवधिः ३१ मार्च् २०२७ पर्यन्तं निर्धारिताऽस्ति। अस्यामेव अवधौ आवेदनात् आरभ्य संयन्त्रस्थापनं, विद्युत्निरीक्षणं, नेट्मीटरिङ्ग्, अनुदानभुगतानं यावत् सर्वाः प्रक्रियाः पूर्णाः करणीयाः सन्ति। एतेषु चरणेषु समयः भवति, अतः अन्तिमसमयस्य प्रतीक्षां कुर्वतां उपभोक्तॄणां कृते अनुदानस्य लाभं प्राप्तुं कठिनता भवितुम् अर्हति।
इच्छुकाः गार्हस्थ्योपभोक्तारः राष्ट्रियपोर्टल् pmsuryaghar.gov.in अथवा स्वस्य विद्युत्वितरणनिगमस्य पञ्जीकृतविक्रेतुः माध्यमेन शीघ्रं आवेदनं कर्तुं शक्नुवन्ति। यावच्छीघ्रं संयन्त्रं संस्थापितं भविष्यति, तावत् अधिकमासपर्यन्तं निःशुल्कविद्युतः विद्युद्बिले बचतस्य च लाभः प्राप्स्यते।
Hindusthan Samachar / Dheeraj Maithani