Enter your Email Address to subscribe to our newsletters
गोरखपुरम्, 16 सितंबरमासः (हि.स)l गोरखपुरे मुख्यमन्त्रिणा योगिना आदित्यनाथेन बुधवासरे प्रायः चत्वारिंशत्कोटिरूप्यकाणां व्ययेन निर्मितानां ११९ विकासपरियोजनानां लोकार्पणं शिलान्यासश्च कृतः। अस्मिन् अवसरे तेन उक्तं यत् आगामीषु षड्मासेषु सर्वकारः एकलक्षं युवभ्यः सर्वकारीयं सेवाकार्यं प्रदास्यति।
सः अवदत् यत् २०१७ तमवर्षात् परं गोरखपुरे उत्तरप्रदेशे च विधेः शासनं सुनिश्चितं कृत्वा विकासस्य सुविधानां च नूतनशृङ्खला निर्मिता अस्ति।
मुख्यमन्त्री बुधवासरे वार्डसंख्या ५३ उर्वरकनगरस्य अन्तर्गतं जङ्गलनखासंख्या २ इत्यत्र नवनिर्मितस्य कल्याणमण्डपस्य सहितं गोरखपुरविकासप्राधिकरणस्य, ग्रामीणाभियन्त्रणविभागस्य, नगरनिगमस्य च प्रायः चत्वारिंशत्कोटिरूप्यकाणां व्ययेन निर्मितानां ११९ विकासपरियोजनानां लोकार्पणं शिलान्यासं च कृत्वा उपस्थितं जनसमूहं सम्बोधयन् आसीत्।
मुख्यमन्त्री अवदत् यत् २०१७ तमवर्षात् परं प्रदेशे सुरक्षायाः उत्तमं वातावरणं निर्मितम् अस्ति। कर्फ्यू, दङ्गा, अराजकता, अव्यवस्था च रहितः अयं प्रदेशः अधुना विधेः शासनाय परिचितः अस्ति। अत्र माफियाः कारागारे सन्ति अथवा परलोकं गताः। उत्तरप्रदेशे प्रत्येकस्य जनस्य सुरक्षायाः पर्वोत्सवानां च कृते उत्तमवातावरणस्य गारण्टी अस्ति।
एन्सेफेलाइटिस्, मच्छराः, माफियाश्च समाप्ताः, गोरखपुरस्य नूतना परिचितिः
मुख्यमन्त्री योगी आदित्यनाथः स्वसम्बोधने उत्तरप्रदेशे गोरखपुरे च २०१७ तमवर्षात् परं दृश्यते परिवर्तनं विस्तरेण उल्लिखितवान्। सः अवदत् यत् एन्सेफेलाइटिस् रोगं, मच्छरान्, माफियाश्च समाप्तं कृत्वा आधारभूतसंरचनानां विकासेन गोरखपुराय उत्तरप्रदेशाय च नूतना परिचितिः प्रदत्ता अस्ति।
सः अवदत् यत् पूर्ववर्तिसर्वकाराणां उदासीनतायाः अयोग्यतायाश्च कारणेन २०१७ तमवर्षात् पूर्वं प्रतिवर्षम् एन्सेफेलाइटिस् रोगेण शतशः जनाः मृत्युमुपगच्छन्ति स्म। तस्मिन् काले समाजवादीपक्षस्य अथवा काङ्ग्रेसपक्षस्य कश्चित् मन्त्री मुख्यमन्त्री वा निर्धनानां जनानां दर्शनार्थं बीआरडी चिकित्सामहाविद्यालयं न आगच्छत्। तदा तेन आन्दोलनं कर्तव्यम् अभवत्। मुख्यमन्त्रिपदं प्राप्तस्य अनन्तरं तेन चत्वारिंशद्वर्षप्राचीनः रोगः द्वाभ्यां वर्षाभ्यां समाप्तः।
मुख्यमन्त्रिणा गोरखपुरे बन्दं स्थितस्य उर्वरककारखानस्य पुनः सञ्चालनस्य, सर्वतः चतुष्पथमार्गसम्पर्कस्य, उड्डयनसेतूनां सेतूनां च निर्माणस्य, रामगढतालस्य पर्यटनस्थलरूपेण विकासस्य, बीआरडी चिकित्सामहाविद्यालयस्य उत्कृष्टस्थितेः, अखिलभारतीय आयुर्विज्ञानसंस्थानस्य च उपलब्धेः उल्लेखः कृतः। सः अवदत् यत् अद्य गोरखपुरस्य उज्ज्वलपरिचित्या प्रत्येकं जनं गौरवमनुभवति।
मुख्यमन्त्री अवदत् यत् २०१७ तमवर्षात् पूर्वं गोरखपुरस्य अस्वच्छता रोगाश्च समाजवादीपक्षस्य काङ्ग्रेसपक्षस्य च सर्वकाराणां दूषितमानसिकतायाः परिणामः आसीत्।
षड्मासेषु एकलक्षं युवभ्यः सेवाकार्यम्
मुख्यमन्त्री योगी अवदत् यत् अद्य उत्तरप्रदेशे युवभ्यः सेवायाः गारण्टी अस्ति। तेन सूचितं यत् तस्य सर्वकारेण अद्यावधि सार्धनवलक्षं युवभ्यः सर्वकारीया सेवा प्रदत्ता अस्ति। निर्वाचनस्य घोषणायाः पूर्वं सर्वकारः आगामीषु षड्मासेषु एकलक्षं युवभ्यः अधिकं सर्वकारीयं सेवाकार्यं प्रदास्यति।
मुख्यमन्त्री पूर्वतनां समाजवादीपक्षस्य सर्वकारं नाम्ना अनुल्लिख्य व्यङ्ग्येन अवदत् यत् २०१७ तमवर्षात् पूर्वं सर्वकारीयसेवायाः नियुक्तिविज्ञप्तौ प्रकाशितायां सैफईसिण्डिकेट् वसूल्यर्थं निर्गच्छति स्म। तस्मिन् काले युवानां भविष्यं संकटग्रस्तं भवति स्म।
तेन गोरखपुरस्य गीडाक्षेत्रे पञ्चशतं कारखानानां स्थापनस्य उल्लेखं कृत्वा कथितं यत् एतेन केवलं गीडाक्षेत्रे पञ्चाशत्सहस्रं युवभ्यः रोजगारः प्राप्तः तथा च अयं प्रदेशः जनपलायनात् मुक्तः अभवत्। सः अवदत् यत् द्विशक्तिसम्पन्नया सर्वकारव्यवस्थया युवानां पुरतः स्थितं परिचितिसंकटमपि दूरीकृतम् अस्ति।
वर्धिष्यते निवृत्तिवेतनस्य राशिः, लाभार्थिनां संख्यापि
मुख्यमन्त्री योगी अवदत् यत् वर्तमानकाले सर्वकारः एककोटिदशालक्षं वृद्धजनान् निराश्रिताः महिलाः दिव्याङ्गजनांश्च प्रतिवर्षं द्वादशसहस्ररूप्यकाणि निवृत्तिवेतनरूपेण ददाति। शीघ्रमेव निवृत्तिवेतनस्य राशिः लाभार्थिनां संख्या च वर्धिष्यते। सः अवदत् यत् द्विशक्तिसम्पन्नया सर्वकारव्यवस्थया वृद्धजनानां, निराश्रितमहिलानां, दिव्याङ्गजनानां च महत् सम्बलं प्रदत्तम् अस्ति।
त्रिशतजनानां क्षमतायुक्तः कल्याणमण्डपः
जङ्गलनखासंख्या २ इत्यत्र स्थितस्य कल्याणमण्डपस्य निर्माणं २४६१ वर्गमीटरमितायां भूमौ त्रिकोटिनवत्यधिकत्रिंशत्लक्षरूप्यकाणां व्ययेन कृतम् अस्ति। आधुनिकसुविधाभिः आकर्षकवास्तुकलया च सुसज्जितः कल्याणमण्डपः द्वितलेषु निर्मितः अस्ति। अत्र त्रिशतजनानां क्षमतायुक्ताः कार्यक्रमाः आयोजयितुं शक्यन्ते।
अत्र सभागारः, पाकशाला, भाण्डारगृहम्, कार्यालयः, वस्त्रपरिवर्तनकक्षः, महिलानां पुरुषाणां च कृते पृथक् शौचालयाः निर्मिताः सन्ति। मुख्यभवनस्य पुरतः आकर्षकः फव्वारकः अपि निर्मितः अस्ति। कल्याणमण्डपम् आगच्छद्भिः वाहनैः कृते परिसरस्य अन्तरे एव अन्तःसंयोजितपाषाणपट्टिकाभिः पर्याप्तं पृथक् वाहनस्थानं निर्मितम् अस्ति। परिसरे उपवनमपि विकसितम् अस्ति।
कल्याणमण्डपे जनानां कृते रियायतीमूल्येन माङ्गलिकानां सार्वजनिकानां च कार्यक्रमाणाम् आयोजनस्य सुविधा भविष्यति।
नगरनिगमस्य ११५ विकासकार्याणां शिलान्यासः
जङ्गलनखासंख्या २ इत्यत्र स्थिते कल्याणमण्डपे मुख्यमन्त्रिणा अष्टाविंशतिकोटिनवत्यधिकैककोटिरूप्यकाणां व्ययेन नगरनिगमस्य ११५ विकासकार्याणां शिलान्यासः कृतः। एतानि कार्याणि विभिन्नेषु निवासक्षेत्रेषु मूलभूतसुविधानां विकासेन सम्बद्धानि सन्ति।
तेन ११.०४ कोटिरूप्यकाणामधिकव्ययेन सम्पन्नानां चतुर्णां कार्याणां लोकार्पणं कृतम्। एतेषु गोरखपुरविकासप्राधिकरणस्य पक्षतः निर्मितः कल्याणमण्डपः अपि अस्ति। तदतिरिक्तं ग्रामीणाभियन्त्रणविभागस्य पक्षतः निर्मिते त्रयः मार्गनालीनिर्माणकार्ये अपि अन्तर्भवतः।
समारोहे मुख्यमन्त्रिणः स्वागतं कुर्वन् महापौरः डॉ. मङ्गलेशश्रीवास्तवः अवदत् यत् मुख्यमन्त्री योगी यदा कदापि गोरखपुरम् आगच्छति, तदा अत्रत्येभ्यः जनभ्यः तस्य हस्तेन किमपि नूतनं उपहाररूपेण अवश्यं प्राप्यते।
कार्यक्रमे विधानपरिषद्सदस्यः भाजपायाः प्रदेशोपाध्यक्षश्च डॉ. धर्मेन्द्रसिंहः, विधायकाः श्रीरामचौहानः, फतेहबहादुरसिंहः, विपिनसिंहः, महेन्द्रपालसिंहः, डॉ. विमलेशपासवानः, प्रदीपशुक्लः, श्रवणनिषादः, राज्य महिला आयोगस्य उपाध्यक्षः चारुचौधरी, भाजपायाः महानगराध्यक्षः रमेशप्रतापगुप्तः, जिलाध्यक्षः जनार्दनतिवारी इत्यादयः प्रमुखतया उपस्थिताः आसन्।
कार्यक्रमस्य अन्ते गोरखपुरविकासप्राधिकरणस्य मण्डलायुक्तश्च इन्द्रविक्रमसिंहः मुख्यमन्त्रिणे स्मृतिचिह्नं प्रदाय तस्य अभिनन्दनं कृतवान्।
---------------
Hindusthan Samachar / Dheeraj Maithani