वॉशिङ्गटनम्, १७ सेप्टेम्बरमासः (हि.स.)। कनाडादेशेन ब्रिटेनस्य नेतृत्वे विद्यमाने संयुक्त-अभियान-बलम् (जेईएफ्) इत्यस्मिन् सम्मिलितुम् औपचारिकरूपेण आवेदनं कृतम्। कनाडा-ब्रिटेनाभ्यां सह यूरोपीयसहयोगिदेशानां मध्ये रक्षासैन्य-सहयोगं वर्धयितुम् एतत् महत्त्वपूर्णं पदक्षेपम् इति मन्यते।

तुर्किये-देशस्य सरकारीवार्तासंस्थायाः अनाडोलू इत्यस्य अनुसारं कनाडादेशस्य प्रधानमन्त्री मार्ककार्नी इत्यस्य कार्यालयेन बुधवासरे उक्तं यत् कार्नी जेईएफ् इत्यस्मिन् सम्मिलितुम् आवेदनस्य घोषणां कृतवान् तथा अस्मिन् प्रयत्ने कनाडादेशस्य सहभागितायै ब्रिटेनदेशस्य समर्थनस्य स्वागतं कृतवान्।

एषा घोषणा ब्रिटेनदेशे कार्नी तथा ब्रिटेनस्य प्रधानमन्त्री एन्डीबर्नहम् इत्येतयोः मध्ये सम्पन्नायाः साक्षात्कार-वार्तायाः अनन्तरं अभवत्। उभौ नेतारौ कनाडा-ब्रिटेनदेशयोः मध्ये दीर्घकालात् विद्यमानान् रक्षासम्बन्धान् अधिकं सुदृढं कर्तुं विषये चर्चां कृतवन्तौ।

जेईएफ् इत्यस्मिन् सम्प्रति डेनमार्कः, एस्टोनिया, फिनलैण्ड्, आइसलैण्ड्, लातविया, लिथुआनिया, नीदरलैण्ड्, नॉर्वे, स्वीडन् तथा ब्रिटेनं च सम्मिलिताः सन्ति। एतत् गठबन्धनं मुख्यतः उत्तरीयूरोपे समीपस्थेषु च क्षेत्रेषु सुरक्षां सैन्यसहयोगं च सुदृढं कर्तुं केन्द्रितम् अस्ति।

भेटवार्तायां कार्नी-बर्नहम् इत्येतयोः ग्लोबल-कॉम्बैट-एयर-प्रोग्राम (जीसीएपी) इत्यस्य माध्यमेन रक्षोद्योग-सहयोगं वर्धयितुं सम्भावनानाम् अपि चर्चा अभवत्। कनाडादेश: जुलाईमासे अस्मिन् कार्यक्रमे पर्यवेक्षकदेशरूपेण सम्मिलित: अभवत्। ब्रिटेनदेशस्य प्रधानमन्त्री-कार्यालयेन जीसीएपी इत्यस्मिन् प्रथमपर्यवेक्षकदेशरूपेण कनाडादेशस्य सहभागितायाः अपि स्वागतं कृतम्।

उभयोः नेतृणोः मध्ये कृत्रिमबुद्धिमत्ता-सम्बन्धिनाम् अवसराणां समस्यानां च विषये अपि चर्चा अभवत्। उभयपक्षेण स्वीकृतं यत् समानचिन्तानां समाधानाय अन्तर्जालसुरक्षां सुदृढां कर्तुं च सर्वकाराणां प्रौद्योगिकीक्षेत्रस्य च मध्ये सहयोगः आवश्यकः अस्ति।

कनाडादेशस्य जेईएफ इत्यस्मिन् सम्मिलितुम् आवेदनं तस्मिन् समये प्राप्तम् अस्ति, यदा ओटावा ब्रिटेनदेशस्य यूरोपीयदेशानां च सह स्वस्य रक्षासुरक्षा-सहयोगम् अधिकं सुदृढं कर्तुं दिशि पदक्षेपान् स्वीकरोति।

Hindusthan Samachar / Divya Ranjan