लखनऊ, 17 सितंबरमासः (हि.स.)।दीपोत्सवे अयोध्या नगरी यदा लक्षशः प्रदीपैः प्रकाशिता भविष्यति, तस्मिन्नेव काले सरयूतटे नूतनं पर्यटनाकर्षणमपि पर्यटकानां स्वागताय सज्जं भविष्यति। राजघाटस्य समीपे द्वाविंशतिः कोटिः द्विसप्ततिलक्षरूप्यकाणां व्ययेन विकसितमाने अस्मिन् पर्यटनकेन्द्रे मुक्ताङ्गणरङ्गमञ्चः, खाद्यप्राङ्गणम्, जलपानगृहं तथा हनुमानचालीसायाः भित्तिचित्रं विशेषाकर्षणानि भविष्यन्ति। श्रीअयोध्याजीतीर्थविकासयोजनायाः अन्तर्गतं प्रचलितस्य अस्य प्रकल्पस्य प्रायः नवतिप्रतिशतं कार्यं पूर्णं जातम् अस्ति तथा च २०२६ तमवर्षस्य अक्टोबरमासस्य अन्तपर्यन्तं प्रकल्पं पूर्णं कर्तुं लक्ष्यं निर्धारितम् अस्ति।

पर्यटनसंस्कृतिमन्त्री जयवीरसिंहेन अस्य विषये सूचना प्रदत्ता। तेन उक्तं यत्, “दीपोत्सवस्य समये अयोध्यायां पर्यटकानां वर्धमाना संख्या आध्यात्मिकपर्यटनस्य सांस्कृतिकपर्यटनस्य च वर्धमानं महत्त्वं प्रदर्शयति। गतवर्षस्य अक्टोबरनवम्बरमासयोः आयोजिते दीपोत्सवे प्रायः २.८५ कोटिः देशीयाः विदेशीयाश्च पर्यटकाः अयोध्यां प्राप्तवन्तः। अस्मिन् वर्षे एषा संख्या अधिका भवितुम् अपेक्ष्यते। राजघाटस्य समीपे निर्मीयमाणः मुक्ताङ्गणरङ्गमञ्चः खाद्यप्राङ्गणं च पर्यटकेभ्यः सांस्कृतिककार्यक्रमाणां, स्थानीयखाद्यपदार्थानां सरयूतटस्य रमणीयवातावरणस्य च एकत्र अनुभवस्य अवसरं प्रदास्यति।”

मन्त्री जयवीरसिंहेन उक्तं यत्, “एषा सुविधा दीपोत्सवेन सह सम्पूर्णवर्षं पर्यटकेभ्यः उपयोगिनी भविष्यति। प्रकल्पे प्रायः १५०तः २०० जनानां क्षमतायुक्तः मुक्ताङ्गणरङ्गमञ्चः निर्मीयते, यत्र विविधाः सांस्कृतिककार्यक्रमाः आयोजयितुं शक्यन्ते। अस्य सह हनुमानचालीसायाः सम्पूर्णाः चौपद्यः प्रदर्शयन्ती भित्तिचित्रभित्तिः निर्मीयते। तदतिरिक्तं जलपानगृहं, अष्टदुकानयुक्तं खाद्यप्राङ्गणं, सार्वजनिकसुविधाः अन्याः च पर्यटकसुविधाः विकसिताः क्रियन्ते।”

अपरमुख्यसचिवः पर्यटनमहानिदेशकश्च अमृताभिजातः उक्तवान् यत् राजघाटस्य समीपे विकसितः अयं प्रकल्पः केवलं पर्यटकानां सुविधाभ्यः सीमितः नास्ति, अपितु सरयूतटे तेभ्यः नूतनस्य स्मरणीयस्य च अनुभवस्य प्रदानेन उद्देशेन विकसितः क्रियते। अनेन अयोध्यायाः पर्यटनपरिदृश्यस्य अधिकः विस्तारः भविष्यति तथा रामायणपरिपथेऽपि पर्यटकेभ्यः नूतनम् आकर्षणं नूतनश्च अनुभवः संयोजितः भविष्यति।

---------------

Hindusthan Samachar / Dheeraj Maithani