मुरादाबादम्, 17 सितंबरमासः (हि.स.)।

मुरादाबादे अद्य दिगम्बरजैनसमाजस्य पर्वराजपर्युषणपर्वणः प्रारम्भः अभवत्। अस्य प्रथमदिवसः प्रथमपर्वरूपेण उत्तमक्षमापर्व इति भावेन आचरितः। पार्श्वनाथदिगम्बरजैनमन्दिरे लोहागढे भगवतः प्रथमाभिषेकं कर्तुं सौभाग्यं जैनसमाजस्य पूर्वाध्यक्षाय अनिलजैनशशिजैनयोः, अङ्कितप्रियङ्कायाः, सान्व्याः, वियानजैनपरिवाराय च प्राप्तम्। प्रथमचतुर्थकलशं नितिनः, अतिशयः, विवेकः, अशोकजैनश्च प्राप्तवन्तः।

तदनन्तरं मन्दिरे भक्तिभावेन पूजनस्य विविधाः क्रियाः सम्पन्नाः। सायंकाले मन्दिरे भगवतः आरतीकार्यक्रमः सुभाषजैनेन आयोजितः। अस्मिन् कार्यक्रमे फर्रुखाबादतः समागतः सङ्गीतकारः अजीतजैनः स्वकीयाभिः मधुरधुनिभिः सर्वेषां मनांसि मोहितवान्।

तदनन्तरं मध्यप्रदेशस्य अशोकनगरजनपदात् समागतः शास्त्री प्रासुजैनः सर्वेभ्यः उत्तमक्षमाधर्मस्य महत्त्वं प्रतिपादितवान्। सः अवदत् यत् जैनसिद्धान्तेषु धर्मेषु यदि कश्चित् सर्वाधिकमहत्त्वपूर्णः धर्मः अस्ति, तर्हि सः उत्तमक्षमाधर्म एव अस्ति। ‘क्षमा वीरस्य भूषणम्’ इत्यस्य भावः अस्ति यत् क्षमा वीराणाम् आभूषणम् अस्ति। क्षमां कृत्वा वयं न कस्यचित् उपकारं कुर्मः, अपि तु स्वस्मिन्नेव अनुग्रहं कुर्मः तथा स्वमनसः शान्तिं साधयामः।

मन्दिरे दीक्षाजैनेन दीप्तिजैनेन च विभिन्नायुवर्गाणां जनानां कृते भजनप्रतियोगिता आयोजिता। अस्यां प्रतियोगितायां समाजस्य सर्वेषां वर्गाणां जनाः उत्साहपूर्वकं भागं गृहीतवन्तः। प्रतियोगितायाः प्रतिभागिनः सुशीलममतापरिवारेण सम्मानिताः।

मन्दिरे त्रयाणां भाग्यपर्चिकानां कार्यक्रमोऽपि आयोजितः। तस्य कार्यक्रमस्य प्रायोजकाः आशुजैनपरिवारः, मनीषजैनपरिवारः, सुभाषजैनपरिवारश्च आसन्।

जैनसमाजस्य अध्यक्षः राजीवजैनः कार्यक्रमे उपस्थितेभ्यः सर्वेभ्यः धन्यवादं समर्पितवान्। अस्मिन् अवसरे मन्त्री अरविन्दजैनः तस्य समस्ता कार्यकारिणी च, महिला जैनसमाजस्य अध्यक्षा ममताजैनः, मन्त्री गौरीजैनः तस्याः समस्ता कार्यकारिणी च तथा समाजस्य बहुसङ्ख्याकाः महिलाः पुरुषाश्च उपस्थिताः आसन्।

Hindusthan Samachar / Dheeraj Maithani