Enter your Email Address to subscribe to our newsletters
नव दिल्ली, 17 सितंबरमासः (हि.स.)।
विश्वकर्मजयन्त्याः अवसरे लोकसभाध्यक्षः ओमबिरला, केन्द्रीयगृहमन्त्री सहकारितामन्त्री च अमितशाहः, रक्षामन्त्री राजनाथसिंहः, केन्द्रीयसड़कपरिवहनराजमार्गमन्त्री नितिनगडकरी इत्यादयः बहवः केन्द्रीयमन्त्रिणः विभिन्नराज्यानां मुख्यमन्त्रिणश्च देशवासिभ्यः शुभकामनाः प्रदत्तवन्तः। नेतारः भगवान् विश्वकर्माणं सृजनस्य, निर्माणस्य, शिल्पस्य, प्राविधिककौशलस्य च प्रतीकं वर्णयन्तः देशस्य कारुकाणां, शिल्पकाराणां, श्रमिकाणां, अभियन्तॄणां च योगदानम् उल्लिखितवन्तः।
लोकसभाध्यक्षः ओमबिरला अवदत् यत् भगवान् विश्वकर्मा भारतीयज्ञानस्य, निर्माणकलायाः, प्राविधिककौशलस्य च समृद्धपरम्परायाः प्रतीकः अस्ति। तेन उक्तं यत् एषः पर्वः स्वकीयेन कौशलेन परिश्रमेण च देशस्य विकासाय गतिं प्रददतां कारुकाणां, शिल्पकाराणां, श्रमिकाणां, अभियन्तॄणां, अन्येषां कर्मयोगिनां च सम्मानस्य अवसरः अपि अस्ति। सः कौशलं, नवाचारं, कर्मठतां च देशस्य शक्तिरूपेण परिणेतुं सङ्कल्पं कर्तुम् आह्वानं कृतवान्।
केन्द्रीयगृहमन्त्री सहकारितामन्त्री च अमितशाहः विश्वकर्मजयन्त्यां देशवासिभ्यः शुभकामनाः प्रदाय स्वकीयेन कौशलेन परिश्रमेण च विकसितभारतस्य आधारं सुदृढं कुर्वद्भ्यः शिल्पकारेभ्यः, कारुकेभ्यः, श्रमिकेभ्यश्च नमनं कृतवान्।
रक्षामन्त्री राजनाथसिंहः अवदत् यत् देशस्य शिल्पकाराणां, श्रमिकाणां, कारुकाणां च कौशलं परिश्रमः सृजनशीलता च आत्मनिर्भरस्य विकसितभारतस्य निर्माणाय गतिं प्रददाति। सः भगवान् विश्वकर्मणः सर्वेषां जीवने सुखस्य समृद्धेः सफलतायाश्च कामनां कृतवान्।
केन्द्रीयसड़कपरिवहनराजमार्गमन्त्री नितिनगडकरी विश्वकर्मजयन्त्याः शुभकामनाः प्रदत्तवान्। सः भगवान् विश्वकर्माणं निर्माणस्य सृजनस्य च प्रतीकं वर्णयन् देशस्य आधारभूतसंरचनायाः विकासाय नूतनां गतिं प्रदातुं तस्य आशीर्वादस्य कामनां कृतवान्।
संसदीयकार्याणाम् अल्पसंख्यककार्याणां च मन्त्री किरेणरिजिजुः भगवान् विश्वकर्माणं सृष्टेः दिव्यशिल्पिनं वास्तुनिर्माणकलायाः च अधिष्ठातारं वर्णितवान्। सः देशस्य निर्माणशक्तेः कौशलशक्तेश्च निरन्तरं सुदृढीकरणस्य कामनां कृतवान्।
केन्द्रीयकृषिमन्त्री शिवराजसिंहचौहानः अवदत् यत् भगवान् विश्वकर्मा सृजनशीलतायाः उत्कृष्टतायाः परिश्रमस्य च प्रेरणां ददाति। सः कामगाराणां हस्तेषु नूतनशक्तेः सञ्चारस्य देशस्य विकासस्य च नूतनान् आयामान् स्प्रष्टुं प्रार्थनां कृतवान्।
दिल्लीप्रदेशस्य मुख्यमन्त्री रेखागुप्ता विश्वकर्मजयन्त्यां शुभकामनाः प्रदाय राष्ट्रनिर्माणे योगदानं कुर्वतां शिल्पकाराणां, कारुकाणां, कामगाराणां च अभिनन्दनं कृतवती। सा भगवान् विश्वकर्मणः कृपया श्रमिकाणां शिल्पकाराणां च निरन्तरप्रगतेः कामनां कृतवती।
छत्तीसगढस्य मुख्यमन्त्री विष्णुदेवसायः प्रदेशवासिभ्यः विश्वकर्मजयन्त्याः शुभकामनाः प्रदत्तवान्। सः अवदत् यत् भगवान् विश्वकर्मणः कृपया प्रदेशे श्रमस्य सृजनस्य च परम्परा निरन्तरं समृद्धा भवेत् तथा च सर्वेषां जीवने सुखसमृद्ध्योः आगमनं भवेत्।
मध्यप्रदेशस्य मुख्यमन्त्री मोहनयादवः विश्वकर्मजयन्त्याः शुभकामनाः प्रदाय अवदत् यत् भगवान् विश्वकर्मणः कृपया प्रेरणया च श्रमस्य कौशलस्य नवाचारस्य च भावना निरन्तरं सुदृढा भवेत् तथा च अस्माकं शिल्पकाराणां, कारुकाणां, श्रमशीलानां बन्धूनां च जीवने सुखसमृद्ध्योः उन्नतेश्च सञ्चारः भवेत् इति प्रार्थना।
आमआदमीपक्षस्य राष्ट्रियसंयोजकः अरविन्दकेजरीवालः भगवान् विश्वकर्मणः जयन्त्यां देशवासिभ्यः शुभकामनाः प्रदत्तवान्। सः देशस्य विकासे स्वकीयेन श्रमेण कौशलेन च योगदानं कुर्वद्भ्यः श्रमिकेभ्यः कारुकेभ्यश्च नमनं कृत्वा प्रत्येकस्मिन् गृहे समृद्धेः सुखस्य च कामनां कृतवान्।
---------------
Hindusthan Samachar / Dheeraj Maithani