इन्दौरम्, १७ सेप्टेम्बरमासः (हि.स.)। भारतीयजनतापक्षस्य राष्ट्रियाध्यक्षः नितिननवीनः गुरुवासरे मध्यप्रदेशस्य प्रवासे इन्दौरं प्राप्तवान्। सः अत्र राज्यसर्वकारस्य महत्त्वाकाङ्क्षिण्याः स्वामित्वयोजनायाः अन्तर्गतं हितग्राहिभ्यः भूमिस्वामित्वाभिलेखानां अर्थात् पञ्जीकरणपत्राणां वितरणाभियानस्य औपचारिकशुभारम्भं करिष्यति।

भाजपाध्यक्षः नवीनः अद्य अपराह्णे विमानमार्गेण विमानतलं प्राप्तवान्, यत्र मुख्यमन्त्री डॉ. मोहनयादवः अन्ये जनप्रतिनिधयश्च तस्य भव्यं स्वागतं कृतवन्तः। ततः सः विमानतलतः गान्धीनगरपर्यन्तं प्रायः पञ्चकिलो-मीटरमितं मार्गप्रदर्शनं कुर्वन् कार्यक्रम-स्थलं गान्धीनगरक्रीडाङ्गणं प्राप्तवान्। अस्मिन् समये नगरस्य मार्गेषु स्थाने स्थाने भव्यैः मञ्चैः भाजपाध्यक्षस्य स्वागतं कृतम्।

अस्मिन् अवसरे मुख्यमन्त्री डॉ. यादवः अवदत् यत् अस्माकं सौभाग्यम् अस्ति यत् मध्यप्रदेशः देशस्य प्रथमं राज्यम् अस्ति, यत् प्रायः पञ्चाशल्लक्षजनानां कृते भूमेः गृहस्य च निःशुल्कानि पञ्जीकरणपत्राणि प्रदातुं गच्छति। कार्यक्रमे सम्मिलितुं पक्षस्य बहवः वरिष्ठनेतारः स्वसमर्थकैः सह प्राप्तवन्तः। तेषु भाजपायाः नगराध्यक्षः महामन्त्री च गौरवरन्दिवे, विधायकाः मालिनीगौड:, रमेशमेंदोला, मनोजपटेलः, मन्त्रिमण्डलमन्त्री तुलसीसिलावटश्च प्रमुखतया सम्मिलिताः सन्ति।

भाजपायाः राष्ट्रियाध्यक्षस्य कार्यक्रमं दृष्ट्वा इन्दौरनगरस्य प्रमुखेषु चतुष्पथेषु मार्गचतुष्पथेषु च विशेषरूपेण सज्जा कृता अस्ति। सम्पूर्णं नगरं पक्षस्य ध्वजैः भगवद्पट्टिकाभिश्च भव्यरूपेण अलङ्कृतम् अस्ति, येन सम्पूर्णे क्षेत्रे उत्सवसदृशं वातावरणं दृश्यते।

Hindusthan Samachar / Divya Ranjan