उज्जयिनी, १७ सेप्टेम्बरमासः (हि.स.)। मध्यप्रदेशस्य उज्जयिनीजनपदे देवासमार्गे स्थिते गीताभवने अद्य गुरुवासरे त्रिदिवसीयायाः ‘युवा-धर्मसंसदः-२०२६ अवन्तिका’ इत्यस्याः आयोजनं प्रारभ्यते। देशस्य विभिन्नभागेभ्यः २४ तः अधिकेभ्यः राज्येभ्यः केन्द्रशासितप्रदेशेभ्यश्च १६०० तः अधिकाः युवानः अस्मिन् कार्यक्रमे सम्मिलिष्यन्ति। आयोजने युवानः, विद्यार्थिनः, शिक्षकाः, शोधकर्तारः तथा विभिन्नक्षेत्रेषु कार्यरताः प्रतिभागिनः भागं ग्रहीष्यन्ति। आयोजकानुसारं कार्यक्रमे प्रायः ३०० विद्वांसः, शिक्षाविदः, धर्माचार्याः विशेषज्ञाश्च युवभिः सह संवादं करिष्यन्ति।

सिद्धपीठहनुमन्निवासस्य पीठाधीश्वरः आचार्यः मिथिलेशनन्दिनीशरणः, सेवाज्ञ-संस्थानस्य राष्ट्रियसचिवः माधवकुमारः तथा मध्यप्रदेशयुवायोगस्य अध्यक्षः प्रवीणशर्मा च आयोजनस्य विषये सूचितवन्तः यत् आयोजनस्य औपचारिकः शुभारम्भः १८ सेप्टेम्बर-मासे राष्ट्रियस्वयं-सेवकसङ्घस्य सरसङ्घचालकेन डॉ. मोहनभागवतेन करिष्यते। १९ सेप्टेम्बरमासे समापनसत्रे मुख्यमन्त्री डॉ. मोहनयादवः सहभागितां करिष्यति।

अष्टसु सत्रेषु धर्मस्य समसामयिक-विषयाणां च विषये विमर्शः

त्रिदिवसीये आयोजने समग्रतः अष्ट सत्राणि भविष्यन्ति। एतेषु धर्मस्य व्यापकस्य अस्तित्वपरकस्य च अवधारणायाः, चरित्रनिर्माणस्य, सामाजिक-उत्तरदायित्वस्य, संवादसंस्कृतेः, सूचनायाः विचारस्य च संघर्षस्य, मनुष्यनिर्माणे आस्थायाः भूमिकायाः, धर्मस्थलानां भूमिकायाः तथा ऋषिकृषिसंस्कृतेः च विषये चर्चा भविष्यति। देशस्य विभिन्नेभ्यः क्षेत्रेभ्यः सन्त-महात्मानः, विद्वांसः, शिक्षाविदः, चिन्तकाः, साहित्यकाराः सामाजिककार्यकर्तारश्च युवभिः सह संवादं करिष्यन्ति। प्रश्नोत्तर-सत्राणां माध्यमेन युवभ्यः धर्मस्य, भारतीयसंस्कृतेः, ज्ञानपरम्परायाः जीवन-दृष्टेश्च सम्बद्धेषु प्रश्नेषु स्वविचारान् प्रस्तोतुम् अवसरः प्राप्स्यते।

चित्रप्रदर्शिनी पुस्तकप्रदर्शनं च आकर्षणस्य केन्द्रे

आयोजनस्य प्रथमदिने भारतभावनायाः आधारेण चित्रप्रदर्शिन्याः पुस्तकप्रदर्शनस्य च उद्घाटनं भविष्यति। अत्र देशस्य विभिन्नेभ्यः प्रदेशेभ्यः आगतैः युवा-कलाकारैः निर्मिताः चित्रकलाकृतयः प्रदर्शयिष्यन्ते। पुस्तकप्रदर्शने प्रायः ५० प्रमुखप्रकाशनसमूहाः सहभागितां करिष्यन्ति। तदतिरिक्तं सांस्कृतिक-कार्यक्रमाः, कलादीर्घा, युवापञ्चायत् तथा जनजातीयमेला अपि आयोजयिष्यन्ते।

युवापञ्चायते प्रतिभागिभ्यः स्वविचारान् प्रस्तोतुं सामूहिकविमर्शे च सम्मिलितुं अवसरः प्राप्स्यते। आयोजनस्य उद्देश्यं युवानः धर्मेण, भारतीयसंस्कृत्या, ज्ञानपरम्परया, जीवनदृष्ट्या, चरित्र-निर्माणेन राष्ट्रं प्रति उत्तरदायित्वेन च सम्बद्धान् कर्तुम् इति कथितम् अस्ति।

अनेके प्रमुखाः वक्तारः सहभागितां करिष्यन्ति

युवा-धर्मसंसदः विभिन्नेषु सत्रेषु सिद्धपीठहनुमन्निवासस्य पीठाधीश्वरः आचार्यः मिथिलेशनन्दिनीशरणः, जूना-अखाडा इत्यस्य आचार्यमहामण्डलेश्वरः स्वामी अवधेशानन्दगिरिः, पुण्डरीक-महाराजः, केन्द्रीयसंस्कृत-विश्व-विद्यालयस्य कुलपतिः प्रो. श्रीनिवास-वरखेडी, कविः लेखकश्च मनोजमुन्तशिरः, मध्यप्रदेशयुवायोगस्य अध्यक्षः प्रवीणशर्मा, विष्णुप्रकाशत्रिपाठी तथा भारतीय-प्रबन्धसंस्थानम् इन्दौरस्य निदेशकः प्रो. हिमांशुरायः इत्यादयः वक्तारः सहभागितां करिष्यन्ति।

आयोजकानुसारं युवा-धर्मसंसदः प्रेरणा स्वामीविवेकानन्दस्य शिकागोनगरे कृतात् उद्बोधनात् सम्बद्धा अस्ति। २०१८ तमवर्षात् प्रारब्धायां अस्यां शृङ्खलायां विभिन्नेषु आयोजनेषु अधुना पर्यन्तं प्रायः ७१०० प्रतिभागिनः सम्मिलिताः सन्ति। अस्य संस्करणस्य अनन्तरम् अग्रिमवर्षे आयोजनं द्वारकायां प्रस्तावितम् अस्ति।

–––––––––––––––––––––––––––––––––––––––––––––––––––––––––––––––––––

Hindusthan Samachar / Divya Ranjan