Enter your Email Address to subscribe to our newsletters
नन्दीमण्डपे सार्धैकहोरापर्यन्तम् अतिष्ठत्, प्रदेशाध्यक्षः हेमन्तखण्डेलवालः अपि उपस्थितः
उज्जयिनी, १८ सेप्टेम्बरमासः (हि.स.)। भारतीयजनतापक्षस्य राष्ट्रियाध्यक्षः नितिननवीनः शुक्रवासरे प्रातः चतुर्वादने मध्यप्रदेशस्य उज्जयिन्यां स्थितं विश्व-प्रसिद्धं श्रीमहाकालेश्वरमन्दिरं प्राप्तवान्। सः बाबा-महाकालस्य प्रातःकालिकायां भस्मारार्तिक्यां सम्मिलितः भूत्वा दर्शनं पूजनं च कृतवान्। तेन सह मध्यप्रदेश-भाजपायाः प्रदेशाध्यक्षः हेमन्तखण्डेलवालः तथा उज्जयिनी-आलोट्-लोकसभाक्षेत्रस्य सांसदः अनिलफिरोजिया अपि उपस्थितौ आस्ताम्।
नितिननवीनः भस्मारार्तिक्या: समये नन्दीमण्डपे उपविष्टः हस्तौ बद्ध्वा बाबा-महाकालस्य आराधनां कुर्वन् दृश्यते स्म। सः सार्धैकहोरापर्यन्तम् भस्मारार्तिक्यां सम्मिलितः अभवत्। भस्मारार्तिक्या: समये मन्दिरस्य वातावरणं भगवत: महाकालस्य जयघोषैः प्रतिध्वनितम् अभवत्। नितिननवीनः पारम्परिके सोला-वस्त्रे भस्मारार्तिक्यां सम्मिलितः अभवत्। सः पीतवर्णं धौतं धृतवान् आसीत्। मन्दिरस्य परम्परानुसारं भस्मारार्तिक्यां सम्मिलितुं निर्धारितं पारम्परिकं वस्त्रं धारणीयम् भवति। सः बाबा-महाकालस्य दिव्य-स्वरूपस्य दर्शनं कृत्वा पूजार्चनां विधाय भगवतः आशीर्वादं प्राप्तवान्। ततः सः रजतदेहर्या बाबा-महाकालस्य पूजनं कृत्वा जलाभिषेकमपि अकरोत्।
देशवासिनां कल्याणस्य कामना
दर्शनानन्तरं नितिननवीनः पत्रकारै: सह वार्तालापे अवदत् यत् बाबा-महाकालस्य पावननगरे आगत्य दर्शनं भस्मारार्तिक्यां च सम्मिलितुं सौभाग्यं प्राप्तम्। सः भगवान् महाकालात् देशस्य नागरिकाणां सुखसमृद्धेः, शान्तेः कल्याणस्य च कामनां कृतवान्। सः अवदत्— “अहं प्रथमवारं मध्यप्रदेशम् उज्जयिनीं च आगतः अस्मि। यः कश्चित् महाकालस्य नगरीम् आगच्छति, सः बाबा-महाकालस्य दर्शनं भस्मारार्तिकीं च कृत्वैव गच्छति।”
एकदिनपूर्वं शिप्रातटे ‘आशीर्वादस्य दीपः’
नितिननवीनः १७-१८ सेप्टेम्बरमासयोः मध्यप्रदेशस्य प्रवासे अस्ति। गुरुवासरे उज्जयिन्यां तेन सेवासङ्कल्पाभियानस्य अन्तर्गतं शिप्रातटे आयोजिते कार्यक्रमे भागः गृहीतः। रामघाटे ‘आशीर्वादस्य दीपः’ प्रज्वाल्य सः शिप्रारार्तिक्यां भजनसन्ध्यायां च अपि सम्मिलितः। ततः सः उज्जयिन्यां रात्रिनिवासं कृत्वा शुक्रवासरे प्रातः महाकालमन्दिरं प्राप्तवान् तथा भस्मारार्तिक्यां सम्मिलितः।
मन्दिरसमित्या कृतः सत्कारः
भस्मारार्तिक्या: दर्शनस्य च अनन्तरं श्रीमहाकालेश्वरमन्दिरप्रबन्धसमितेः पक्षतः भाजपायाः राष्ट्रियाध्यक्षस्य नितिन-नवीनस्य प्रदेशाध्यक्षस्य हेमन्तखण्डेल-वालस्य च स्वागतं सत्कारश्च कृतः। जिलाधिकारी तथा मन्दिरसमितेः अध्यक्षः रोशनकुमारसिंहः, प्रशासकः अपरजन-पदाधिकारी च प्रथमकौशिकः च उभाभ्यां नेतृभ्यां शाटिकां, श्रीफलम्, बाबा-महाकालस्य प्रसादं च समर्पितवन्तौ।
भस्मारार्तिक्यां बाबा-महाकालस्य विशेष-शृङ्गारः
शुक्रवासरे प्रातः प्रायः चतुर्वादने मन्दिरस्य कपाटोद्घाटनानन्तरं भगवत: महाकालस्य विशेषशृङ्गारः कृतः। सर्वप्रथमं पञ्चामृतेन अभिषेकः पूजनं च कृतम्। ततः दुग्धेन, दध्ना, घृतेन, मधुना फलरसैश्च निर्मितेन पञ्चामृतेन अभिषेकं कृत्वा बाबा-महाकालस्य भाङ्गेन, चन्दनेन आभरणैश्च शृङ्गारः कृतः। ततः महा निर्वाणी-अखाडा इत्यस्य पक्षतः भगवते महाकालाय भस्म समर्पितम्।
भस्मारार्तिक्या: अनन्तरं बाबा-महाकालः रजतमुकुटेन, मुण्डमालया, रुद्राक्षमालया पुष्पमालाभिश्च अलङ्कृतः। बहुसंख्याकाः श्रद्धालवः भस्मारार्तिक्या: दर्शनं कृत्वा नन्दीमहाराजस्य दर्शनं च विधाय स्वमनोकामनानां पूर्तये प्रार्थितवन्तः। अस्मिन् समये मन्दिरपरिसरे निरन्तरं बाबा-महाकालस्य जयघोषाः प्रतिध्वनिताः।
Hindusthan Samachar / Divya Ranjan