Enter your Email Address to subscribe to our newsletters
नोएडा, 18 सितंबरमासः (हि.स.)।
गौतमबुद्धविश्वविद्यालये (जीबीयू) शनिवासरात् प्रारभ्यमाणे द्विदिवसीये ‘नारीसम्मान युवा स्वाभिमान प्रेरणाविमर्श २०२६’ कार्यक्रमे उत्तरप्रदेशस्य मुख्यमन्त्री योगी आदित्यनाथः युवभिः सह संवादं करिष्यति। आयोजकानां अनुसारं मुख्यमन्त्रिणा कार्यक्रमे सम्मिलितुं स्वीकृतिः प्रदत्ता अस्ति। गौतमबुद्धनगरस्य पुलिसप्रशासनेन जिलाप्रशासनेन च मुख्यमन्त्रिणः कार्यक्रमं दृष्ट्वा सुरक्षायाः सुदृढव्यवस्थाः प्रारब्धाः सन्ति।
मुख्यमन्त्रिणा सह राष्ट्रियस्वयंसेवकसङ्घस्य वरिष्ठपदाधिकारिणः अपि प्रेरणाविमर्शस्य द्वितीये दिवसे उपस्थिताः भविष्यन्ति। आयोजनसमितेः सदस्याः कथयन्ति यत् ‘युवास्वाभिमानः’ इति विषयमधिकृत्य आयोज्यमाने अस्मिन् कार्यक्रमे मुख्यरूपेण जेन-जी युवानां विषयेषु मन्थनं भविष्यति। विगतेषु दिवसेषु देहल्याः जन्तरमन्तर इत्यादिषु स्थानेषु छात्राणां प्रदर्शनानन्तरं प्रदेशस्य योगीसर्वकारः तेषां विषयान् गम्भीरतया स्वीकरोति। अनेन आयोजनेन राष्ट्रियस्वयंसेवकसङ्घः भारतीयजनतापक्षश्च युवभिः सह मुक्तसंवादाय इच्छुकौ स्तः इति सन्देशं दातुम् अपि प्रयासः भवितुं शक्नोति।
युवानां विषयान् अधिकृत्य एकं शपथपत्रमपि सिद्धं कृतम् अस्ति, यत् अस्मिन्नेव कार्यक्रमे सर्वसम्मत्या पारितं कर्तुं सज्जता क्रियते। आयोजनं जीबीयू-विश्वविद्यालयस्य क्रीडाङ्गणे भविष्यति। तत्र प्रायः पञ्चसहस्रयुवानां कृते उपवेशनव्यवस्था कृता अस्ति। आयोजकानां प्रयासः अस्ति यत् महाविद्यालयविश्वविद्यालययोः विद्यार्थिभिः सह सामाजिकमाध्यमप्रभावकाः नवोद्यमा-व्यवसायप्रवर्तकाश्च कार्यक्रमे सम्मिलिताः भवेयुः।
मुख्यमन्त्री कार्यक्रमे सम्मिलितः भूत्वा जीबीयू परिसरे रात्रिनिवासं करिष्यतीति अपेक्षा अस्ति। अत्र सः २५ सितम्बरतः प्रारभ्यमानस्य ‘यूपी अन्तर्राष्ट्रीयव्यापारप्रदर्शनी २०२६’ इत्यस्य सज्जतायाः समीक्षां कर्तुं शक्नोति। तदनन्तरं परदिने आयोजनस्थलं ‘इण्डिया एक्स्पो सेन्टर एण्ड मार्ट’ इत्यस्य निरीक्षणमपि कर्तुं शक्नोति। मुख्यमन्त्रिणः आगमनं दृष्ट्वा प्रशासनिकैः पुलिसाधिकारिभिश्च सज्जताः प्रारब्धाः सन्ति।
प्रेरणामीडियाशोधसंस्थानन्यासस्य, प्रेरणाविमर्शआयोजनसमित्याः तथा जीबीयू-विश्वविद्यालयस्य संयुक्ततत्त्वावधानेन आयोज्यमानस्य अस्य कार्यक्रमस्य केन्द्रीयविषयः ‘उत्कर्षः नारीसम्मानः युवास्वाभिमानश्च’ इति अस्ति। अस्मिन् नारीशक्तिः, युवचिन्तनम्, प्रौद्योगिकी, माध्यमानि, राष्ट्रनिर्माणम् इत्यादीनां विषयाणां विषये देशस्य विभिन्नेभ्यः भागेभ्यः आगताः प्रबुद्धजनाः मन्थनं करिष्यन्ति।
आयोजनस्य शुभारम्भः १९ सितम्बर् दिनाङ्के अपराह्णे त्रिवादने ‘नारीशक्तिराष्ट्रवन्दनयज्ञेन’ भविष्यति। अस्मिन् १०८ हवनकुण्डेषु सहस्राधिकाः महिलाः यजमानरूपेण सम्मिलिताः भविष्यन्ति।
Hindusthan Samachar / Dheeraj Maithani