भुवनेश्वरम्, 18 सितंबरमासः (हि.स.)।

ओडिशाराज्यस्य मुख्यमन्त्री मोहनचरणमाझी सेमीकॉन इण्डियायां भारतदेशे निर्मितैः अर्धचालकचिप्पकैः सह एनआईटी राउरकेलायाः स्वदेशीयचिप्परिरचनानां प्रदर्शनं कृतमिति विषये गौरवं प्रकटितवान्। तेन उक्तं यत् एतत् ओडिशाराज्यस्य प्रतिभायाः नवाचारस्य अनुसन्धानक्षमतायाश्च परिचायकम् अस्ति।

मुख्यमन्त्री माझी वैज्ञानिकान् अनुसन्धानकर्तॄन् एनआईटी राउरकेलायाः सम्पूर्णां च कार्यदलम् अभिनन्दयन् उक्तवान् यत् संस्थानस्य अनुसन्धानकार्यं भारतस्य अर्धचालकक्षेत्रे ओडिशाराज्यस्य वर्धमानं योगदानं प्रदर्शयति।

सामाजिकमाध्यमे प्रकाशिते सन्देशे मुख्यमन्त्रिणा उक्तं यत् सेमीकॉन इण्डियायां एनआईटी राउरकेलायाः चिप्परिरचनानां प्रदर्शितत्वं प्रत्येकस्य ओडियाजनस्य गौरवस्य विषयः अस्ति। तेन उक्तं यत् राज्यस्य शैक्षणिकानि अनुसन्धानसंस्थानानि देशस्य प्रौद्योगिकीक्षमतां सुदृढां कर्तुं महत्त्वपूर्णां भूमिकां निर्वहन्ति।

माझिना उक्तं यत् प्रधानमन्त्री नरेन्द्रमोदिनः नेतृत्वेन केन्द्रीयविद्युत्प्रौद्योगिकी तथा सूचनाप्रौद्योगिकीयाः मन्त्री अश्विनीवैष्णवस्य प्रयासैश्च भारतं सुदृढस्य आत्मनिर्भरस्य च अर्धचालकपारिस्थितिकीतन्त्रस्य दिशि निरन्तरं प्रगतिं कुर्वन् अस्ति।

तेन उक्तं यत् एनआईटी राउरकेलायाः अनुसन्धानकार्यं स्पष्टयति यत् ओडिशाराज्यस्य संस्थानानि देशस्य अर्धचालकसम्बद्धासु महत्त्वाकाङ्क्षासु योगदानं प्रददति।

मुख्यमन्त्री चिप्परिरचनासम्बद्धान् वैज्ञानिकान् अनुसन्धानकर्तॄन् च भारतस्य प्रौद्योगिकीयविकासे तेषां योगदानाय अभिनन्दितवान्। तेन उक्तं यत् ओडिशाराज्यं गौरवान्वितम् अस्ति यत् राज्यस्य प्रतिभा भारतस्य अर्धचालकयात्रायां प्रौद्योगिकीयात्मनिर्भरतायाः दिशि च देशस्य प्रयासेषु योगदानं प्रददाति।

---------------

Hindusthan Samachar / Dheeraj Maithani