कोलकाता, 19 सितंबरमासः (हि.स.)। पश्चिमबङ्गे नूतनसर्वकारस्य गठनानन्तरं फसलबीमायोजनायाः अन्तर्गतं ३२ लक्षकृषकाणां पञ्जीकरणं कृतम् अस्ति। अस्मिन् सङ्ख्यायां पश्चिमबङ्गः सम्पूर्णे देशे द्वितीयस्थाने प्राप्तवान् अस्ति।

मुख्यमन्त्री शुभेन्दुअधिकारी शनिवासरस्य प्रातः सामाजिकमाध्यमस्य ‘एक्स’ इत्यस्य माध्यमेन एतां सूचनां प्रदत्तवान्। सः अवदत् यत् फसलबीमायोजनायाः पञ्जीकरणस्य प्रथमचरणे एव कृषकेभ्यः अभूतपूर्वः प्रतिसादः प्राप्तः। अद्यतनबाढ्या प्रभावितानां कृषकाणां वित्तीयसुरक्षां सुनिश्चितुं २०२६ तमस्य वर्षस्य खरीफ् ऋतौ शीघ्रमेव आवश्यकाः कार्यवाह्यः कृताः। २०२६ तमस्य सितम्बरमासस्य १५ दिनाङ्कपर्यन्तं सुव्यवस्थितप्रक्रियया कुलं ३२ लक्षकृषकाः अस्याः बीमायोजनायाः परिधौ आनीताः सन्ति।

मुख्यमन्त्रिणा उक्तं यत् बाढीप्रभावितेषु जनपदेषु कृषकाणां पञ्जीकरणस्य विषयेऽपि आँकडानि अत्यन्तं सकारात्मकानि सन्ति। विशेषतः पूर्वमेदिनीपुरे ७.२३ लक्षकृषकाणां, पश्चिममेदिनीपुरे ४.७३ लक्षकृषकाणां, हुगल्यां १.६८ लक्षकृषकाणां तथा झाड़ग्रामे ४२ सहस्रकृषकाणां सफलतया पञ्जीकरणं कृतम् अस्ति।

बाढीप्रभावितक्षेत्रेषु कृषकाणां सुविधां दृष्ट्वा अगस्तमासात् सितम्बरमासस्य १५ दिनाङ्कपर्यन्तं प्रत्येकग्रामपञ्चायतस्तरे विशेषशिबिराणि आयोजितानि आसन्। तेषां माध्यमेन कृषकान् प्रत्यक्षतया बीमासंरक्षणस्य अन्तर्गतं नीत्वा क्षतिपूर्तिप्राप्तेः मार्गः प्रशस्तः कृतः।

कृषकेषु आर्थिकभारं न्यूनीकर्तुं राज्यसर्वकारः प्रीमियमस्य अधिकांशं भागं स्वस्य अर्थसङ्कल्पात् वहति। नूतननियमानुसारम् एकहैक्टर् अर्थात् सार्धद्वि-एकरपर्यन्तं कृषिभूमिं धारयद्भिः कृषकैः केवलं एकरूप्यकस्य सांकेतिकराशिः देया भविष्यति। अपरत्र एकहैक्टरतः द्विहैक्टरपर्यन्तं भूमिं धारयद्भिः कृषकैः प्रत्येकम् एकर् भूमेः कृते केवलं शतरूप्यकाणां न्यूनशुल्कं देयम् अस्ति। अवशिष्टं सम्पूर्णं प्रीमियमधनं राज्यसर्वकारेण प्रत्यक्षतया प्रदास्यते।

शुभेन्दुअधिकारी अवदत् यत् २०२६ तमस्य अगस्तमासस्य बाढ्या प्रभावितानां कृषकाणां कृते यथाशीघ्रं क्षतिपूर्तिराशिं प्रापयितुं बीमासंस्थाभ्यः मध्यवर्तीक्षतेः मूल्याङ्कनं शीघ्रमेव पूर्णं कर्तुं कठोरनिर्देशाः प्रदत्ताः सन्ति। तदतिरिक्तं, बैङ्कमाध्यमेन ऋणं गृह्णतां कृषकाणां पञ्जीकरणस्य अन्तिमसमयसीमा २०२६ तमस्य सितम्बरमासस्य ३० दिनाङ्कपर्यन्तं विस्तारितास्ति। अनेन पञ्जीकृतानां कृषकाणां सङ्ख्यायां अधिकवृद्धेः सम्भावना वर्तते।----------

Hindusthan Samachar / Dheeraj Maithani