सुपौलम्, १९ सेप्टेम्बरमासः (हि.स.)। पृष्ठवर्गस्य अतिपृष्ठवर्गस्य च कल्याणविभागेन सञ्चालितस्य अन्य-पृष्ठवर्गीयबालिकानिवासस्य द्वादशकक्षापर्यन्तस्य उच्चविद्यालयस्य, रामनगर-पिपरा इत्यस्य, शनिवासरे जनपदकल्याणपदाधिकारी, जनपद-परियोजनाप्रबन्धकः विद्यालयस्य नोडल-पदाधिकारी च संयुक्तरूपेण निरीक्षणं कृतवन्तः। निरीक्षणस्य उद्देश्यं विद्यालये अध्ययनरताभ्यः छात्राभ्यः प्रदीयमानानां शैक्षणिकानां, आवासीयानां मूलभूतानां च सुविधानां गुणवत्तायाः अवलोकनं तथा व्यवस्थाः अधिकं सुदृढाः कर्तुम् आसीत्।

निरीक्षणकाले अधिकारिभिः विद्यालये पठनपाठनस्य स्थितेः, छात्रावास-व्यवस्थायाः, स्वच्छतायाः, भोजनस्य, पेयजलस्य, सुरक्षायाः, अनुशासनस्य तथा छात्राभ्यः प्रदीयमानानां अन्यासां सुविधानां च सूक्ष्मतया अवलोकनं कृतम्। अधिकारिभिः विद्यालयस्य प्रधानाचार्येण शिक्षक-शिक्षिकाभिश्च सह शैक्षणिक-गतिविधिनां छात्राणां प्रगतेः च विषये सूचनाः प्राप्ताः।

अस्मिन् अवसरे अधिकारिभिः छात्राभिः सह प्रत्यक्षं संवादं कृत्वा तासां आवश्यकतानां, समस्यानां विचाराणां च विषये सूचनाः प्राप्ताः। छात्राः नियमितरूपेण अध्ययनं कर्तुं, अनुशासनं संरक्षितुं तथा विद्यालये उपलब्धानां संसाधनानां समुचितोपयोगं कृत्वा स्वकीयशैक्षणिकलक्ष्याणां दिशि अग्रे गन्तुं प्रेरिताः।

निरीक्षणसमये जीविकायाः बीपीएम, विद्यालयस्य प्रधानाचार्यः, शिक्षक-शिक्षिकाः अन्ये कर्मचारिणः च उपस्थिताः आसन्।

Hindusthan Samachar / Divya Ranjan