अयोध्या, ०२ सेप्टेम्बरमासः (हि.स.)। मन्दिरं मन्दिरेण संयोजयितुं क्रियमाणस्य अभिनवाभियानस्य शुभारम्भः बुधवासरे श्रीरामजन्मभूमिमन्दिरात् अयोध्यायां कृतः। प्रथमवारं श्रीरामजन्मभूमिमन्दिरात् पूजितानि पुष्पाणि, वस्त्राणि, मेवामिष्टान्नानि, शृङ्गारसामग्री, मयूर-पिच्छानि, वंशिकाः इत्यादयः कृष्ण-जन्माष्टम्याः कृते अयोध्यातः मथुरां प्रेषिताः। तथैव काशीतः अपि माङ्गल्योपहारयोजनायाः अन्तर्गतं तादृशी सामग्री जन्माष्टम्याः कृते मथुरां प्रेषिता अस्ति।

कार्यक्रमस्य योजनाकारः विश्वहिन्दूपरिषदः केन्द्रीयमन्त्री राजेन्द्रसिंहपङ्कजः बुधवासरे अवदत् यत् पञ्चविंशति: कार्यकर्तृभिः सह द्वाभ्यां वाहनाभ्यां माङ्गल्यसामग्रीम् आदाय धनञ्जय-पाठकस्य नेतृत्वे इदं दलम् अद्य अयोध्यातः मथुरां प्रति प्रस्थितम्। विहिप-सङ्घटनस्य उपाध्यक्षः चम्पतरायः तथा सः स्वयं दलस्य सदस्येभ्यः आशीर्वचनं दत्त्वा तान् प्रस्थापितवन्तौ।

पदाधिकारिभिः उक्तं यत् मन्दिरं मन्दिरेण तथा च परस्परं पूजापद्धतीः संयोजयितुं कार्यम् अपि निरन्तरं प्रचलिष्यति। अन्येषां पूजापद्धतीनां कार्यक्रमेषु अपि एतादृश्येव माङ्गल्यसामग्री प्रेषयिष्यते।

Hindusthan Samachar / Divya Ranjan