नव दिल्ली, 02 सितंबरमासः (हि.स.)।

भारतीयजनतापार्टीदलस्य देहलीप्रदेशाध्यक्षः हर्षमल्होत्रः मुख्यमन्त्रिणः रेखागुप्तायाः शासनद्वारा चतुःशतयूनिट्-पर्यन्तं विद्युत्-उपभोगं कुर्वतां सर्वेषां उपभोक्तॄणां कृते निःशुल्कं सौरविद्युत्-व्यवस्थां प्रदातुं कृतस्य घोषणायाः स्वागतं कृतवान्। सः आशां व्यक्तवान् यत् अनेन निर्णयेन देहलीवासिनः सौरशक्तेः उपयोगे रुचिं दर्शयिष्यन्ति तथा च अतिरिक्तविद्युत्-शक्तिं विद्युत्वितरणकम्पनीभ्यः विक्रेतुमपि प्रवृत्ताः भविष्यन्ति।

हर्षमल्होत्रः अवदत् यत् निःशुल्कसौरविद्युत्-व्यवस्थायाः उपलब्धतायाः निर्णयः भारतीयजनतापार्टीशासनस्य दीर्घकालीनचिन्तनं प्रदर्शयति। सः अवदत् यत् सौरविद्युत्-व्यवस्थायाः स्थापनायाः व्ययः सामान्य-मध्यमवर्गीय-उपभोक्तॄणां कृते महती बाधा आसीत्। शासनं समस्यामिमां अवगत्य तां व्यवस्थां निःशुल्करूपेण उपलब्धां कर्तुं निर्णयं कृतवती अस्ति।

सः अवदत् यत् प्रारम्भे एषा योजना निःशुल्कवितरणरूपेण दृश्येत, किन्तु अस्याः दूरगामिनः परिणामाः भविष्यन्ति। सौरशक्तेः वर्धमानेन उपयोगेन आगामिकाले देहलीशासनस्य विद्युत्-अनुदानस्य भारः न्यूनः भविष्यति। अनेन न केवलं योजनायां भविष्यमाणस्य व्ययस्य पूर्तौ सहायता भविष्यति, अपितु विद्युत्वितरणकम्पनीभ्यः अपि तुलनया सस्ती विद्युत् उपलब्धा भविष्यति।

भारतीयजनतापार्टीदलस्य प्रदेशाध्यक्षः आमआदमीपार्टीदलस्य पक्षतः पूर्वमुख्यमन्त्रिणा अरविन्दकेजरीवालस्य शासनकाले वर्षे द्विसहस्रषोडशे सौरविद्युत्-योजनायाः प्रारम्भस्य विषये कृतं दावमपि प्रश्नगतं कृतवान्। सः अवदत् यत् केजरीवालशासनेन वर्षे द्विसहस्रषोडशे प्रारब्धा देहलीसौरविद्युत्-योजना अपि अन्येषां लोकलुभावनयोजनानामिव प्रभावपूर्णा सिद्धा नाभवत्।

मल्होत्रः दावं कृतवान् यत् वर्षात् द्विसहस्रषोडशात् द्विसहस्रचतुर्विंशतितमवर्षपर्यन्तं प्रायः नववर्षेषु केवलं पञ्चसहस्रत्रिशत् लघु-महान्तः विद्युत्-उपभोक्तारः एव अस्यां योजनायां रुचिं प्रदर्शितवन्तः। सः अवदत् यत् अनेन स्पष्टं भवति यत् पूर्वशासनस्य सौरविद्युत्-योजना धरातले अपेक्षितं प्रभावं जनयितुं न शक्तवती।

सः आमआदमीपार्टीदलस्य नेतॄन् प्रश्नं कृतवान् यत् यदि वर्षे द्विसहस्रषोडशे प्रारब्धा सौरविद्युत्-योजना एतावती प्रभावपूर्णा आसीत्, तर्हि नववर्षेषु केवलं प्रायः पञ्चसहस्रत्रिशत् विद्युत्-उपभोक्तारः एव तस्याः योजनायाः सह कथं सम्बद्धाः अभवन्? सः अवदत् यत् देहलीप्रदेशस्य वर्तमानं भारतीयजनतापार्टीशासनं सौरशक्तिं जनजनं प्रति प्रापयितुं दिशि दृढपदानि स्वीकरोति।

---------------

Hindusthan Samachar / Dheeraj Maithani