पश्चिमबर्दमानम्, ०२ सेप्टेम्बरमासः (हि.स.)। पश्चिमबङ्गाले परिवर्तितस्य राजनैतिकस्य औद्योगिकवातावरणस्य मध्ये अधुना पाण्डवेश्वरं सूक्ष्म-लघु-मध्यमोद्योगानां केन्द्ररूपेण विकसितुं प्रयत्न: प्रारब्ध: अस्ति। उद्योगपतिभ्यः निवेशाय प्रोत्साहनं दातुम् उद्दिश्य आगामि २७ सेप्टेम्बरदिने पाण्डवेश्वरे विशेषः उद्योगसम्मेलनः आयोजयिष्यते। अस्य सम्मेलनस्य कृते सज्जताः प्रारब्धाः सन्ति।

आयोजकानां कथनम् अस्ति यत् राज्ये नूतनसर्वकारस्य गठनानन्तरम् उद्योग-निवेशयोः क्षेत्रे वातावरणे परिवर्तनम् अभवत्। पुरुलिया, बाँकुडा, हावडा इत्यादिषु विविधजनपदेषु औद्योगिकसमूहैः निवेशे रुचिः प्रदर्शिता अस्ति। अधुना पाण्डवेश्वरेऽपि निवेशाय अनुकूलं वातावरणं निर्मातुं दिशि प्रयत्न: क्रियते।

सम्मेलने मुख्यतया ते उद्योगपतयः उद्यमिनश्च आमन्त्रयिष्यन्ते, ये अस्मिन् क्षेत्रे सूक्ष्म-लघु-मध्यमोद्योगानां स्थापनायां रुचिम् वहन्ति। कार्यक्रमस्य माध्यमेन क्षेत्रे उपलब्धानां औद्योगिकसम्भावनानां, आधारभूत-संरचनायाः, भूमेः, सर्वकार-सहयोगस्य तथा निवेशकानां सम्मुखी-भवन्तीनां विविधसमस्यानां विषये चर्चा क्रियते।

मङ्गलवासरे विलम्बितसायंकाले आयोजितायां सभायां विविधव्यापारि-सङ्घटनानां प्रतिनिधयः, वाणिज्य-मण्डलस्य सदस्याः तथा दुर्गापुर-पाण्डवेश्वरक्षेत्रयोः अनेके उद्योगपतयः भागं गृहीतवन्तः। सभायां नूतनानाम् उद्योगानां स्थापनायाः सम्भावनानां निवेशाय आवश्यकसुविधानां च विषये विस्तरेण चर्चा कृता।

उखडा-वाणिज्यमण्डलस्य अध्यक्षः मनोजसराफः अवदत् यत् पूर्वसर्वकारस्य तुलनायां वर्तमानकाले राज्ये अधिकम् उद्योगानुकूलं वातावरणं निर्मितम् अस्ति तथा उद्योगपतयः नूतननिवेशे रुचिं प्रदर्शयन्ति। तथापि तेन उद्योगस्थापनाय सर्वकारीयानुमतिप्रक्रियायाः अधिकं सरलीकरणं शीघ्रीकरणं च आवश्यकमिति बलं दत्तम्।

उद्योगपतिः पार्थघोषः अवदत् यत् पाण्डवेश्वरक्षेत्रे पूर्वमेव अनेकैः उद्यमिभिः सूक्ष्म-मध्यमोद्योगानां स्थापनायां रुचिः प्रदर्शिता अस्ति।

पाण्डवेश्वरस्य विधायकः जितेन्द्रतिवारी अवदत् यत् क्षेत्रे अधुना उद्योगाय अनुकूलं वातावरणं निर्मितम् अस्ति तथा पाण्डवेश्वरः पूर्वापेक्षया पर्याप्तं परिवर्तितः अस्ति। एतदेव दृष्ट्वा उद्योगसम्मेलनस्य आयोजनं क्रियते। तेन उद्यमिभ्यः सम्मेलने भागं गृहीत्वा क्षेत्रे निवेशं कर्तुम् आह्वानं कृतम्।

विधायकः अवदत् यत् अग्रिमेषु दिवसेषु पाण्डवेश्वरं सूक्ष्म-मध्यम-लघूद्योगानां प्रमुखकेन्द्ररूपेण विकसितुं लक्ष्यं निर्धारितम् अस्ति तथा अस्मिन् दिशि सर्वकारेणापि प्रयत्न: क्रियते।

Hindusthan Samachar / Divya Ranjan