Enter your Email Address to subscribe to our newsletters
लखनऊ, 02 सितंबरमासः (हि.स.)। उत्तरप्रदेशस्य मुख्यसचिवः एस.पी. गोयलः उक्तवान् यत् आगामि १२ सितम्बर-दिने सर्वेषु जनपदेषु राष्ट्रीय-लोक-अदालतायाः आयोजनं भविष्यति। तस्याः सफलतां सुनिश्चितं कर्तुं सर्वे सम्बन्धित-विभागाः अधिकतमसंख्यायां प्री-लिटिगेशन-प्रकरणानां चिह्नीकरणं कृत्वा तेषां त्वरितनिस्तारणाय गम्भीरतया सकारात्मकदृष्टिकोणेन च कार्यं कुर्वन्तु। सामान्यजनानां मध्ये राष्ट्रीय-लोक-अदालतायाः उपयोगिता तत्र उपलब्धानां सुविधानां च विषये व्यापकस्तरे सूचना प्रदीयताम्। अस्य कृते डिजिटल-मञ्चानां, सामाजिक-माध्यमानां तथा अन्येषां प्रौद्योगिकी-माध्यमानां प्रभावी-उपयोगः सुनिश्चितः क्रियताम्।
मुख्यसचिवः एतान् निर्देशान् समस्त-मण्डलायुक्तैः जिलाधिकारिभिः च सह आयोजितायां साप्ताहिक-समीक्षासभायां बुधवासरे दत्तवान्। पञ्चायतीराज-विभागस्य योजनानां समीक्षां कुर्वन् मुख्यसचिवः उक्तवान् यत् डिजिटल-पुस्तकालयेषु आगामि एकमासस्य अवधौ डिजिटल-उपकरणानां स्थापना करणीया अस्ति। तेन मुख्यविकासाधिकारिणे नोडल-अधिकारिणे च निर्देशः दत्तः यत् आवश्यकतानुसारं विद्युत्सम्बन्धस्य अन्तर्जालसम्बन्धस्य च व्यवस्था समये एव सुनिश्चितं क्रियताम्।
तेन डिजिटल-पुस्तकालयेषु फर्नीचर-सामग्रीणां पुस्तकानां च सुव्यवस्थितरूपेण स्थापनं तथा तेषां प्रबन्धन-सञ्चालनार्थं निर्धारित-मानक-सञ्चालन-प्रक्रियानुसारं सर्वाः आवश्यकव्यवस्थाः सुनिश्चितं कर्तुं निर्देशाः दत्ताः। सम्बन्धित-ग्रामपञ्चायतैः मानक-सञ्चालन-प्रक्रियायाः कठोरतया अनुपालनं कारयितव्यम्।
तेन निर्देशितं यत् प्रत्येकं सम्बन्धित-विभागेन नोडल-अधिकारी नामितः क्रियताम्। नोडल-अधिकारिणां माध्यमेन प्रकरणानां चिह्नीकरणं, सूचना-अथवा समन-पत्राणां तामीला तथा प्रकरणानां निस्तारणस्य प्रभावी-पर्यवेक्षणं सुनिश्चितं कारयितव्यम्।
तेन जिलाधिकारिभ्यः निर्देशः दत्तः यत् राष्ट्रीय-लोक-अदालतायाः एकदिनपूर्वं तहसील-प्रशासनस्य सहयोगेन विशेष-जनजागरूकता-अभियानं सञ्चाल्येत, येन अधिकाधिकाः सामान्यनागरिकाः लोक-अदालतां प्रति आगत्य स्वप्रकरणानां सरलतया, शीघ्रतया परस्पर-सम्मत्या च समाधानं कर्तुं शक्नुयुः।
मुख्यसचिवः उक्तवान् यत् राष्ट्रीय-लोक-अदालतां अधिकप्रभावितां लोकप्रियां च कर्तुं एक-जिला-एक-उत्पादस्य तथा एक-जिला-एक-फसलस्य स्टॉलानां स्थापनं, शासनस्य जनकल्याणकारी-योजनानां सूचनायाः प्रदर्शनं तथा पात्र-लाभार्थिनां योजनाभिः कृते पञ्जीकरणस्य व्यवस्था अपि कर्तुं शक्यते।
मुख्यसचिवः सम्मिलित-सहकारी-बैंकिंग-तथा-तकनीकी-सेवा-परीक्षां (विशेष-चयन)-२०२६ पूर्णतया सुव्यवस्थितरूपेण, नकलविहीनतया पारदर्शितया च सम्पन्नं कर्तुं निर्देशान् दत्तवान्। तेन उक्तं यत् निर्धारित-परीक्षा-प्रक्रियायाः सर्वेषां निर्देशानां च पूर्णतः पालनं सुनिश्चितं क्रियताम्।
तेन निर्देशितं यत् कस्यापि अभ्यर्थिनः वैध-प्रवेशपत्रस्य आवश्यक-परिचयपत्रस्य च विना परीक्षा-केन्द्रे प्रवेशः न दीयताम्। अभ्यर्थिनां समुचितरीत्या परीक्षणं तलाशी च क्रियताम् तथा एतत् सुनिश्चितं क्रियताम् यत् कश्चिदपि अभ्यर्थी अनधिकृत-विद्युतीय-उपकरणं, चलदूरवाणीं अथवा अनुचित-सामग्रीं स्वीकृत्य परीक्षा-केन्द्रे प्रवेशं न कर्तुं शक्नुयात्।
मुख्यसचिवः उक्तवान् यत् परीक्षायाः पूर्वं प्रत्येकस्य परीक्षा-केन्द्रस्य निरीक्षणं कारयित्वा तत्र सर्वेषां मूलभूत-सुविधानां उपलब्धता सुनिश्चितं क्रियेत। परीक्षा-केन्द्रेषु सीसीटीवी-कैमरा, कृत्रिम-बुद्धिमत्ता-आधारित-पर्यवेक्षण-व्यवस्था, प्रत्यक्ष-पर्यवेक्षणं, जैवमितीय-व्यवस्था, विद्युत्-प्रत्यावर्तन-व्यवस्था, अन्तर्जाल-संयोजनं तथा जैमर-प्रभृतीनां उपकरणानां कार्यशीलतायाः परीक्षणं पूर्वमेव क्रियेत। परीक्षाकाले पर्याप्तसंख्यायां महिलापुलिसकर्मिणां पुलिसकर्मिणां च नियुक्तिरपि सुनिश्चितं क्रियताम्।
मुख्यसचिवेन हापुड, मऊ, हाथरस, गोरखपुर, बलिया, बस्ती, फतेहपुर, बाराबंकी तथा औरैया इत्यादिषु नवसु जनपदेषु पञ्चायत-उत्सव-भवनस्य विस्तृत-परियोजना-प्रतिवेदनं तत्कालं विभागं प्रति प्रेषयितुं निर्देशाः दत्ताः। तेन उक्तं यत् येषु जनपदेषु पञ्चायत-उत्सव-भवनस्य निविदा-प्रक्रिया लम्बिता अस्ति, तां त्वरितगत्या पूर्णं कारयित्वा कार्यारम्भः कारयितव्यः।
सभायां सम्बन्धित-विभागानां वरिष्ठाधिकारिणः अन्ये च अधिकारीगणाः उपस्थिताः आसन्।
Hindusthan Samachar / Dheeraj Maithani