लखनऊ, २० सेप्टेम्बरमासः (हि.स.)। बहुजनसमाजपक्षस्य राष्ट्रियाध्यक्षा मायावती अवदत् यत् आकाशानन्दः तस्य भगिनी च कस्मिन् अपि परिस्थितौ पक्षे पुनः न स्वीक्रियेताम्। यदि आनन्द-कुमारस्य परिवारेभ्यः कञ्चन पक्षे समावेशयितुम् आवश्यकं भविष्यति, तर्हि ईशानानन्दाय सम्मानजनकं दायित्वं प्रदाय तं पक्षे अग्रे स्थापयिष्यते। यदि ईशानः पक्षविरोधि किमपि गम्भीरं कृत्यं करिष्यति, तर्हि तस्मै अपि पक्षात् बहिष्करणस्य मार्गं दर्शयिष्यते।

बसपाप्रमुखा मायावती सामाजिक-माध्यमस्य ‘एक्स’ इत्यत्र विस्तृतं वक्तव्यं प्रकाशितवती। तत्र सा पक्षसङ्गठनं उत्तराधिकारं च सम्बध्य अनेकान् महत्त्वपूर्णान् निर्णयान् घोषितवती। सा लिखितवती यत् स्वानुभवस्य आधारेण सा पक्षस्य कार्यकर्तृभ्यः वदति—यदि राजनीतिक्षेत्रे सफलाः भवितुम् इच्छन्ति तथा समाजाय किमपि कर्तुम् इच्छन्ति, तर्हि तैः अपि तस्याः इव परिवारमोहात् उपरि उत्थाय पूर्णेन सत्यनिष्ठाभावेन पक्षस्य हिताय कार्यं करणीयम्।

पक्षस्य संस्थापकस्य कांशीरामस्य राजनीतिं स्मरन्ती सा अवदत् यत् राजनीतिक्षेत्रे आगमनानन्तरं कांशीरामः स्वकीयान् निकटसम्बन्धान् पक्षीय-लाभाय प्रयोजयितुं सर्वदा दूरं स्थितवान्। सः केवलं निःस्वार्थभावेन पक्षसङ्गठने कार्यं कर्तुम् एव तेषाम् अनुमतिं दत्तवान्। स्वजीवनं स्वकीयपरिवारं न निर्माय एव ‘बहुजनसमाजस्य’ हिताय कल्याणाय च समर्पितवान्।

मायावती अवदत् यत् तस्मात् प्रेरणां प्राप्य अहम् अपि तस्यैव पदचिह्नेषु चलितुं निर्णयं कृतवती तथा स्वसम्पूर्णं जीवनं ‘बहुजनसमाजाय’ समर्पितवती। किन्तु अहं महिला इति कारणेन विवशतया कस्यचित् भ्रातुः भगिन्याः वा सदा स्वसमीपे स्थापनं कर्तुं मया आवश्यकं जातम्। मम कनिष्ठभ्राता आनन्दकुमारः विगतेभ्यः अनेकवर्षेभ्यः मम सेवायां कार्यरतः अस्ति।

मायावती अवदत् यत् आनन्दकुमारस्य आग्रहात् तस्य ज्येष्ठपुत्रम् आकाशानन्दं राजनीतिक्षेत्रे अग्रे स्थापितवती। विवाहानन्तरम् आकाशस्य व्यवहारः गतिविधयश्च एतादृश्यः अभवन्, येन किञ्चित्कालपूर्वं तं पुनः पक्षात् पृथक् कर्तुं मया बाध्यता अभवत्। सः स्वश्वशुरस्य अशोकसिद्धार्थस्य जाले पतितः अस्ति। अतः तम् अधुना पक्षे पुनः स्वीकरणं पक्षाय महान् विश्वासघातः एव भविष्यति। एतादृशं पक्षविरोधि अनुचितं कार्यं कर्तुं मया कदापि न शक्यते।

मायावती अवदत् यत् आनन्दकुमारस्य परिवारात् कं पक्षे अग्रे स्थापयामि इति विषये मम पुरतः दुविधा आसीत्। अधुना अस्य विषये विरामं दत्त्वा सर्वेषां पक्षाणां गम्भीरतया विचारं कृत्वा मया निर्णयः कृतः यत् तस्य परिवारात् तमेव सदस्यं पक्षे अग्रे स्थापयिष्यते, यः आकाशस्य पदचिह्नेषु कदापि न चलिष्यति। आनन्दकुमारस्य पुत्री अस्ति तथा विवाहानन्तरं तस्याः विषयः अपि यदि आकाशानन्दस्य इव भवेत्, तर्हि एतदपि पक्षहिताय उचितं न भविष्यति।

पक्षहितं दृष्ट्वा आकाशानन्दाय तस्य भगिन्यै च पक्षस्य किमपि दायित्वं न प्रदास्यते। तयोः स्थाने ईशानानन्दाय एव पक्षे सम्मानजनकं दायित्वं प्रदाय तं अग्रे स्थापयिष्यते। यदि सः पक्षविरोधि किमपि गम्भीरं कृत्यं करिष्यति, तर्हि तस्मै अपि पक्षात् बहिष्करणस्य मार्गं दर्शयिष्यते।

Hindusthan Samachar / Divya Ranjan