Enter your Email Address to subscribe to our newsletters
नवदिल्ली, २० सेप्टेम्बरमासः (हि.स.)। प्रधानमन्त्री नरेन्द्रमोदी, लोकसभाध्यक्षः ओमबिरला, रक्षामन्त्री राजनाथसिंहः इत्येतै: सह पक्ष-विपक्षयोः अनेकैः नेतृभिः रविवासरे वरिष्ठपत्रकारायाः पायल-मेहतायाः निधनं प्रति शोकः प्रकटितः।
प्रधानमन्त्री मोदी सामाजिकमाध्यमे ‘एक्स’ इत्यत्र अवदत् यत् पायलमेहता परिश्रमशीला पत्रकारा आसीत्, या जनजीवनस्य समीपे स्थिता भूत्वा वार्ताङ्कने राष्ट्रियविषयाणां गहनं बोधं प्रदर्शितवती। स्वकार्यस्य अतिरिक्तं सा तया करुणया स्नेहेन च स्मरिष्यते, येन सा बहूनां जनानां जीवनं प्रभावितवती। तस्याः आकस्मिकम् अकालं च निधनम् अत्यन्तं दुःखदम् अस्ति। तस्याः परिवारेभ्यः, मित्रेभ्यः सहकर्मिभ्यश्च मम संवेदनाः। ईश्वरः अस्मिन् कठिनसमये तान् धैर्यं ददातु। ॐ शान्तिः।
ओमबिरला अवदत् यत् मेधाविनी वरिष्ठपत्रकारा पायलमेहता दीर्घकालात् संसदः वार्ताः सम्प्रेषयन्ती आसीत्। तस्याः निधनं पत्रकारिताक्षेत्रस्य कृते महती क्षतिः अस्ति। ईश्वरं प्रार्थये यत् दिवङ्गतायाः आत्मनः शान्तिं शोकसन्तप्तायाः परिवारस्य च कृते धैर्यं प्रददातु।
राजनाथसिंहः अवदत् यत् पायल अत्यन्तं परिश्रमशीला समर्पिता च पत्रकारा आसीत्, या पूर्णनिष्ठया व्यावसायिकदक्षतया च संसदः कार्यवाहीं वार्ताङ्कितवती। संसदः सत्रकाले सा प्रातःकालात् अर्धरात्रिपर्यन्तम् उपस्थितां भवति स्म। अविश्रान्ततया कार्यवाहीं निरीक्ष्य सा अद्भुतेन समर्पणेन स्वकार्यं करोति स्म।
केन्द्रीयगृहमन्त्री सहकारितामन्त्री च अमितशाहः अवदत् यत् पायलमेहता उत्कृष्टा व्यावसायिकपत्रकारा आसीत्, या कस्यापि विषयस्य प्रत्येकं विवरणं स्वपाठकेभ्यः दर्शकेभ्यश्च प्रापयितुं समर्पिता आसीत्। सा मिलनसारा स्नेहपूर्णव्यक्तित्वस्य च स्वामिनी आसीत्। एवं प्रतिभाशालिन्याः परिश्रमशीलायाः च पत्रकारायाः अकालं निधनं पत्रकारिताजगतः कृते अपूरणीया क्षतिः अस्ति।
केन्द्रीयस्वास्थ्यमन्त्री जे.पी. नड्डा अवदत् यत् प्रतिभाशालिनी उत्कटसमर्पिता च पत्रकारा इति रूपेण पायलमेहता स्वकार्ये समर्पणाय सद्भावपूर्णस्वभावाय च स्मरिष्यते। तस्याः अकालं निधनं सम्पूर्णस्य पत्रकारितासमुदायस्य कृते अपूरणीया क्षतिः अस्ति।
केन्द्रीयशिक्षामन्त्री प्रह्लादजोशी अवदत् यत् पायलमेहता स्वशान्तस्वभावाय, पत्रकारितायाः गहनबोधाय, विचारपूर्वकं पृष्टैः प्रश्नैः, स्वकार्ये च तस्याः निष्ठायै स्मरिष्यते।
भारतीयजनतापक्षस्य राष्ट्रियाध्यक्षः नितिननवीनः अवदत् यत् पायलमेहता स्वपरिश्रमेण, राष्ट्रियविषयाणां गहनबोधेन, येषां जनानां सम्पर्के सा आगता तेषु प्रति अद्वितीयेन स्नेहपूर्णव्यवहारेण च प्रसिद्धा आसीत्। तस्याः अकालं निधनं माध्यमजगतः कृते महती क्षतिः अस्ति।
लोकसभायां प्रतिपक्षनेता राहुलगान्धी अवदत् यत् संसदः वार्ताङ्कनं कुर्वत्याः पत्रकारायाः पायलमेहतायाः अकालं निधनं प्रति अहं दुःखितः अस्मि।
Hindusthan Samachar / Divya Ranjan