Enter your Email Address to subscribe to our newsletters
चण्डीगढम्, २० सितम्बरमासः। हरियाणस्य मुख्यमन्त्री नायबसिंहसैनी अवदत् यत् नवम्बरमासे एकलक्षाष्टसहस्ररूप्यकपर्यन्तम् वार्षिकाययुक्ताः पात्राः महिलाः लाडोलक्ष्मीयोजनायाः लाभं प्राप्स्यन्ति। सर्वकारेण दीनदयाललाडोलक्ष्मी इति नाम्ना महत्त्वपूर्णा योजना प्रारभ्य महिलाभ्यः प्रतिमासं द्विसहस्रशतं रूप्यकाणि दातुं कृतं वचनं पूर्णं कृतम्। प्रधानमन्त्री नरेन्द्रमोदिनः जन्मदिवसस्य अवसरे सितम्बरमासस्य सप्तदशमे दिने योजनायाः विस्तारः कृतः। अधुना एकलक्षाष्टसहस्ररूप्यकाणि वार्षिकाययुक्ताः परिवाराः अपि लाभार्थिरूपेण समाविष्टाः सन्ति।
मुख्यमन्त्री अवदत् यत् योजनायाः विस्तारानन्तरम् आवेदनार्थं जालपुटं उद्घाटितम् अस्ति तथा पात्राभ्यः महिलाभ्यः नवम्बरमासस्य प्रथमदिने योजनायाः लाभः प्रदास्यते। अस्याः योजनायाः अन्तर्गतं पात्राभ्यः महिलाभ्यः द्विसहस्रकोटिरूप्यकेभ्यः अधिका धनराशिः अन्तर्जालमाध्यमेन तासां खातेषु प्रेषिता अस्ति। मुख्यमन्त्री नायबसिंहसैनी रविवासरे लाडवाविधानसभाक्षेत्रे आयोजितेषु जनसंवादकार्यक्रमेषु सम्बोधयन् एतत् उक्तवान्।
सः अवदत् यत् सर्वकारेण विगतेषु द्वादशवर्षेषु प्रदेशस्य द्विलक्षं युवभ्यः विना धनव्ययेन विना अनुशंसया च योग्यतायाः आधारेण सर्वकारीयसेवा प्रदत्ता। पूर्वसर्वकारस्य काले सर्वकारीयसेवां प्राप्तुं धनस्य अनुशंसायाश्च आवश्यकता भवति स्म, किन्तु अधुना निर्धनपरिवारस्य पुत्रः समूह डीतः आरभ्य एचसीएसपर्यन्तं योग्यतायाः आधारेण सेवां प्राप्तुं शक्नोति।
सः अवदत् यत् प्रधानमन्त्री नरेन्द्रमोदिनः नेतृत्वे विकासकार्याणि तीव्रगत्या क्रियमाणानि सन्ति। सः कालीराणाग्रामे ग्रामविकासाय एकविंशतिलक्षरूप्यकाणि पुस्तकालयस्य पुस्तकक्रयणाय च द्विलक्षरूप्यकाणि दातुं घोषणां कृतवान्। तदनन्तरं सुल्तानपुरग्रामे ग्रामविकासाय एकविंशतिलक्षरूप्यकाणि गुरुद्वारासाहिबस्य कृते पञ्चलक्षरूप्यकाणि च दातुं घोषणां कृतवान्। तथैव सोण्टीग्रामे, बीडसोण्टीग्रामे तथा ग्रामस्य गुरुद्वारासाहिबस्य कृते एकविंशतिलक्षरूप्यकाणि दातुं घोषिता।
अस्मिन्नवसरे पूर्वराज्यमन्त्री सुभाषसुधा, मुख्यमन्त्रिणः विशेषकार्याधिकारी महेन्द्रसैनी च उपस्थितौ आस्ताम्। मुख्यमन्त्री नायबसिंहसैनी अवदत् यत् निर्वाचनात् पूर्वं हरियाणसर्वकारेण नागरिकेभ्यः द्विशतसप्तदश वचनानि दत्तानि आसन्। तेषु अधुना सर्वकारेण सप्ततिवचनानि पूर्णानि कृतानि सन्ति तथा शेषवचनेषु अपि तीव्रगत्या कार्यं प्रचलति। शपथग्रहणस्य अनन्तरमेव सर्वकारेण स्ववचनानि पूर्णीकर्तुं कार्यमारब्धम्।
सः अवदत् यत् प्रधानमन्त्री नरेन्द्रमोदिनः नेतृत्वे राष्ट्रियमार्गैः अन्यैः प्रमुखमार्गैश्च संयोजनाय प्रदेशे मार्गाणां विस्तृतं जालं निर्मितम् अस्ति। मुख्यमन्त्री अवदत् यत् देशे सर्वप्रथमं प्रदेशसर्वकारेण कृषकाणां सर्वासां चतुर्विंशतिफलानां न्यूनतमसमर्थनमूल्येन क्रयणस्य कार्यमारब्धम्। सः अवदत् यत् काङ्ग्रेसपक्षस्य नेतारः सर्वकारात् चतुर्विंशतिफलानां विषये सूचनां याचन्ते, किन्तु प्रदेशे कृषकैः कियन्तः प्रकाराः फसलाः उत्पाद्यन्ते इत्यस्य विषये तेषां पूर्णं ज्ञानमपि नास्ति। विपक्षः अधुना न्यूनतमसमर्थनमूल्यस्य नाम्ना असत्यं प्रचारयित्वा कृषकेषु भ्रमं जनयितुं प्रयतते इति मुख्यमन्त्रिणा उक्तम्।
अस्मिन्नवसरे उपायुक्तः विश्रामकुमारमीणा, अध्यक्षः गुरनामसिंहसैनी, अध्यक्षः सुभाषकलसाना, अध्यक्षका कंवलजीतकौर, अध्यक्षः डॉ. गणेशदत्तः, अध्यक्षका साक्षीखुराना, कालीराणाग्रामस्य सरपञ्चः राजीवकुमारः, सुल्तानपुरग्रामस्य सरपञ्चा ममताराणी, सरपञ्चः सुरेशः, सरपञ्चः सुखविन्दरसिंहः, नायबसिंहः पटाकमाजरा सहिताः अन्ये गणमान्यजनाः उपस्थिताः आसन्।
हिन्दुस्थान समाचार / Dheeraj Maithani