हावड़ा, 20 सितंबरमासः (हि.स.)। परिवारस्य समाजस्य च परस्परसम्बन्धान् अधिकं सुदृढीकर्तुं सन्देशं प्रददता रविवासरे हावड़ास्थे शरत्सदने ‘सर्वमङ्गलम्’ कार्यक्रमस्य आयोजनं कृतम्। कुटुम्बप्रबोधनटोली, हावड़ामहानगरस्य तत्त्वावधाने केशवनिवेदितासेवासमित्याः सहकारेण आयोजिते अस्मिन् कार्यक्रमे राष्ट्रियस्वयंसेवकसङ्घस्य वरिष्ठप्रचारकः नन्दलालजोशी ‘बाबाजी’, हावड़ानगरनिगमस्य आयुक्तः तेजस्वी राणा, हावड़ासिटिपुलिसस्य आयुक्तः अखिलेशकुमारचतुर्वेदी, भारतीयपुलिससेवाधिकारी, समाजसेवकः रोशनलालअग्रवालः, आनन्दकुमारशर्मा तथा डॉ. सञ्जयकुमारबसु च उपस्थिताः आसन्।

सङ्घस्य वरिष्ठप्रचारकः नन्दलालजोशी ‘बाबाजी’ ‘सर्वमङ्गलम्’ कार्यक्रमस्य नाम्नः सार्थकतां प्रतिपादयन् अवदत् यत् ‘सर्वमङ्गलम्’ इत्यस्य भावनायां सर्वेषां कल्याणस्य कामना अन्तर्निहिता अस्ति। स्वीयसम्बोधने सः प्रकृतेः मनुष्यस्य च सम्बन्धस्य महत्त्वं रेखाङ्कितवान्। सः अवदत् यत् प्रकृतेः विरुद्धं गत्वा मनुष्याय किमपि कर्तुं न शक्यते।

हावड़ानगरनिगमस्य आयुक्तः तेजस्वी राणा परिवारे समाजे च व्यक्तेः व्यवहारस्य मूल्यव्यवस्थायाश्च महत्त्वे प्रकाशं क्षिपन् अवदत् यत् एतादृशैः कार्यक्रमैः जनाः विभिन्नविषयेषु जागरूकाः क्रियेरन् चेत् तेन समाजे सकारात्मकभूमिका निर्वोढुं शक्यते।

हावड़ासिटिपुलिसस्य आयुक्तः अखिलेशकुमारचतुर्वेदी स्वीयसम्बोधने अवदत् यत् राष्ट्रियस्वयंसेवकसङ्घेन सह समाजस्य विभिन्नवर्गीयानां जनानां सम्बन्धः अधिकं सुदृढः भवति। तस्य सम्बोधने देशस्य संस्कृतेः मूल्यव्यवस्थायाश्च संरक्षणे सङ्घस्य भूमिकायाः उल्लेखः अपि कृतः। वर्तमानकाले सामाजिकमाध्यमानां प्रभावः युवा पीढ्या सह परिवारस्य संवादश्च इत्येतयोः विषययोः अपि पुलिसायुक्तेन चर्चा कृता। सः अवदत् यत् व्यस्ततायाः सामाजिकमाध्यमानां च कारणेन कदाचित् परिवारेण सह पर्याप्तं समयं यापयितुं न शक्यते। अतः सः परिवारस्य सह सम्बद्धाः भवितुं तथा एतादृशेषु कार्यक्रमेषु भागं ग्रहीतुं सर्वान् प्रोत्साहितवान्। कार्यक्रमस्य आयोजनाय आयोजकेभ्यः सः धन्यवादमपि अर्पितवान्।

डॉ. सञ्जयकुमारबसुः ‘कुटुम्बप्रबोधनम्’ इति पदस्य महत्त्वं रेखाङ्कितवान्। सः अवदत् यत् ‘कुटुम्बम्’ इति पदं केवलं स्वकीयपरिवारं न द्योतयति, अपि तु अस्मिन् समीपवासिभिः सह सम्बन्धोऽपि महत्त्वपूर्णः अस्ति। सः अवदत् यत् वर्तमानसमये समीपवासिभिः सह जनानां सम्बन्धेषु शनैः शनैः दूरी वर्धते।

समीपवासिभिः सह मधुरसम्बन्धानां स्थापनस्य आवश्यकतां प्रतिपादयन् सः अवदत् यत् दीर्घकालात् राष्ट्रियस्वयंसेवकसङ्घस्य माध्यमेन परस्परसम्बन्धानां सामाजिकबन्धनस्य च सुदृढीकरणे बलं दीयते। ‘कुटुम्बप्रबोधनस्य’ महत्त्वं जनैः अवगन्तव्यम्। सः अवदत् यत् अनेन समाजस्य विभिन्नसमस्यानां समाधानस्य मार्गः प्रशस्तो भवितुं शक्नोति।

ततः पूर्वम् उद्घाटनगीतेन वन्देमातरम् इति गीतेन च कार्यक्रमस्य शुभारम्भः अभवत्। अनन्तरं मञ्चस्थातिथीनां परिचयः प्रदत्तः तथा तेषां स्वागतं कृतम्। कार्यक्रमस्य अन्ते ‘धनधान्यपुष्पभरा’ इति गीतं प्रस्तुतम्।

कार्यक्रमस्य द्वितीये चरणे परिवारस्य, समाजस्य, संस्कृतेः तथा परस्परसम्बन्धानां महत्त्वेऽपि चर्चा अभवत्। आयोजकैः एतादृशानां कार्यक्रमाणां माध्यमेन पारिवारिकानां सामाजिकानां च मूल्यव्यवस्थानां अधिकं सुदृढीकरणस्य सन्देशः प्रदत्तः।

---------------

Hindusthan Samachar / Dheeraj Maithani