गुवाहाटी, 21 सितंबरमासः (हि.स.)।

असमराज्यस्य चन्द्रपुरे भारतीयान्तरिक्षानुसन्धानसङ्गठनस्य इस्रो इत्यस्य उन्नतरडारानुसन्धानकेन्द्रस्य आधारशिला सोमवासरे स्थापयिष्यते। मुख्यमन्त्रिणा डॉ. हिमन्तविश्वशर्मणा सोमवासरे सामाजिकमाध्यमे प्रकाशितेन सन्देशेन एषा सूचना प्रदत्ता।

मुख्यमन्त्रिणा उक्तं यत् एतत् केन्द्रं भारतीयान्तरिक्षानुसन्धानसङ्गठनस्य अन्तरिक्षवस्तुनां निरीक्षणविश्लेषणयोः जालव्यवस्थायाः नेत्र इति कार्यक्रमस्य भागः भविष्यति। अस्य उद्देश्यं अन्तरिक्षे विद्यमानानां वस्तूनां निरीक्षणस्य अनुवीक्षणस्य च क्षमतां सुदृढीकर्तुं तथा भारतस्य महत्त्वपूर्णान्तरिक्षसम्पत्तीनां सुरक्षां वर्धयितुम् अस्ति।

डॉ. शर्मणा उक्तं, “अद्य वयम् असमस्य चन्द्रपुरे भारतीयान्तरिक्षानुसन्धानसङ्गठनस्य इस्रो इत्यस्य उन्नतरडारानुसन्धानकेन्द्रस्य आधारशिलां स्थापयिष्यामः।”

भारतीयान्तरिक्षानुसन्धानसङ्गठनेन अस्याः परियोजनायै चन्द्रपुरे सप्तषष्टिः एकरपरिमिता भूमिः चिह्निता अस्ति। सङ्गठनस्य २०२५-२६ तमवर्षस्य वार्षिकप्रतिवेदनानुसारं भूमेः हस्तान्तरणप्रक्रिया नवम्बर् २०२३ तमे वर्षे पूर्णा अभवत्, यदा तु अन्तिमपञ्जीकरणं ७ नवम्बर् २०२५ तमे वर्षे कृतम्।

नेत्र इति परियोजनायाः अन्तर्गतं अन्तरिक्षे वर्धमानानां गतिविधीनां वस्तूनां च निरीक्षणाय रडारयन्त्राणि, प्रकाशीयदूरदर्शीयन्त्रसुविधा तथा केन्द्रीयनियन्त्रणकेन्द्रमित्यादीनि प्रमुखानि संरचनानि विकसितानि क्रियन्ते। एषा व्यवस्था अन्तरिक्षवस्तूनां अनुवीक्षणे, तेषां कक्षानिर्धारणे, सम्भावितटक्करपरिहारसम्बद्धसूचनाप्रदाने तथा उपग्रहाणां रॉकेट् इत्यस्य भागानां च पुनःप्रवेशस्य निरीक्षणे सहायकं भविष्यति।

अन्तरिक्षस्थितिजागरूकतासम्बद्धानां गतिविधीनां कृते भारतीयान्तरिक्षानुसन्धानसङ्गठनस्य अन्तरिक्षस्थितिजागरूकतानियन्त्रणकेन्द्रं वर्षे २०२० तमे बेङ्गलूरुनगरे स्थापितम् आसीत्।

मुख्यमन्त्रिणा डॉ. शर्मणा उक्तं यत् असमे अस्याः अत्याधुनिकस्य राष्ट्रियमूलसंरचनायाः स्थापना राज्यस्य वर्धमानां भूमिकां प्रदर्शयति। तेन अस्याः रणनीतिकपरियोजनायै असमस्य चयनं कृतवते प्रधानमन्त्री नरेन्द्रमोदिने कृतज्ञता अपि प्रकटिता।

-----------

Hindusthan Samachar / Dheeraj Maithani