नवदिल्ली, २१ सेप्टेम्बरमासः (हि.स.)। भारतीयजनतापक्षेण पूर्वराष्ट्रपतिः हामिद-अंसारी-महोदयेन हिन्दूराष्ट्रवादः देशाय संकटम् इति कथितस्य तस्य हालिकवक्तव्यस्य तीव्रं खण्डनं कृतम्। भाजपापक्षेण सोमवासरे उक्तं यत् काङ्ग्रेसः अधुना पूर्णतया ‘मुस्लिमलीगी-माओवादी-काङ्ग्रेसः’ अभवत्।

भाजपायाः प्रवक्ता राज्यसभासदस्यश्च डॉ. सुधांशुत्रिवेदी सोमवासरे पक्षस्य मुख्यालये आयोजिते वार्तासम्मेलने अपि आरोपितवान् यत् काङ्ग्रेसः अधुना अतिवामपन्थस्य दिशि गता अस्ति। सः अवदत्, “देशस्य संवैधानिकपदे स्थितवता व्यक्तिना कथं स्वस्य अन्तर्मनसः भावान् काङ्ग्रेसस्य मनोभावांश्च व्यक्तं क्रियते, तस्य अत्यन्तं निन्दनीयम् उदाहरणम् अधुना पुरतः आगतम्। पूर्वराष्ट्रपतिः हामिद-अंसारी-महोदयः २०१९ तमे वर्षे लिखितं पुस्तकम् उद्धृत्य अवदत् यत् नेहरूमहोदयस्य मतानुसारं तेषां कृते देशस्य पुरतः साम्यवादः हिन्दूराष्ट्रवादस्य अपेक्षया न तावत् बृहत् संकटम् आसीत्। अर्थात् हामिदअंसारी-महोदयेन स्पष्टं कृतं यत् काङ्ग्रेसः पूर्णतया मुस्लिमलीगी-माओवादी-काङ्ग्रेसः अभवत्।”

डॉ. त्रिवेदी अवदत् यत् संवैधानिकपदे स्थितेन व्यक्तिना नेहरूमहोदयस्य सन्दर्भे साम्यवादं हिन्दूराष्ट्रवादं च प्रति कृता टिप्पणी काङ्ग्रेसस्य वर्तमानविचारधारायाः विषये प्रश्नान् उत्थापयति। सः अवदत्, “वामपन्थः संकटः आसीत्, इति नेहरूमहोदयः मन्यते स्म, तस्यैव सन्दर्भं हामिद-अंसारी-महोदयः प्रस्तुतवान्। एतत् प्रकाशयितुं तं धन्यवादं ददामि। अद्यतनकाङ्ग्रेसः तु अतिवामपन्थस्य दिशि गता अस्ति। अर्थात् सा साम्यवादे निमज्जिता अस्ति। अधुना एतदपि स्पष्टं जातं यत् लोकसभायां प्रतिपक्षनेतुः राहुलगान्धिनः वक्तव्येषु यत्किञ्चित् दृश्यते, तस्य कथा पारिवारिकी एव अस्ति।”

भाजपाप्रवक्ता काङ्ग्रेसस्य वर्तमान-राजनैतिकशैल्याः विषये अपि कटाक्षं कुर्वन् अवदत्, “काङ्ग्रेसः अद्य वास्तविकसृजनात्मकतायाः दृष्टेश्च अभावात् हास्यकार्यक्रमात् स्वैरहास्य-कार्यक्रमस्य, ततः स्वैरहास्यकार्यक्रमात् अश्लीलतायाः दिशि अग्रे गता अस्ति। मम मतम् अस्ति यत् काङ्ग्रेसः अस्मिन् विषये गम्भीरतया चिन्तयेत्।”

भाजपासांसदः राहुलगान्धिना २ जून २०२३ दिनाङ्के अमेरिकादेशस्य राजधानी वॉशिङ्गटननगरे प्रेसक्लब इत्यत्र दत्तस्य वक्तव्यस्य अपि उल्लेखं कृतवान्, यस्मिन् राहुलगान्धिना मुस्लिमजनाः ‘पूर्णतया धर्मनिरपेक्षाः’ इति कथिताः आसन्। भाजपानेता केरलराज्ये काङ्ग्रेसस्य इण्डियनयूनियनमुस्लिमलीग्-दलेन सह विद्यमानस्य गठबन्धनस्य विषये अपि प्रश्नान् उत्थापितवान् तथा च मुस्लिमलीगस्य ऐतिहासिकसन्दर्भस्य उल्लेखं कृतवान्। सः अवदत्, “काङ्ग्रेसः अद्य यस्मिन् अधःपाते स्थितः अस्ति, तस्मात् अधः सा स्वस्य १४० वर्षाणां इतिहासे कदापि न गता। अतः राहुलगान्धिनः कृत्यानां कार्यकलापानां च तीव्रं भर्त्सनं कुर्वन् अहं वक्तुम् इच्छामि यत् तेन केवलं संसदः गरिमा न ह्रासिता, केवलं प्रतिपक्षनेतुः पदस्य गरिमा न ह्रासिता, अपितु स्वपक्षेण सह स्वपरिवारस्य गरिमायाः अपि ह्रासः कृतः।”

Hindusthan Samachar / Divya Ranjan