Enter your Email Address to subscribe to our newsletters
जयपुरम्, 21 सितंबरमासः (हि.स.)।
लोकमन्थन२०२६ इत्यस्य अन्तर्गतं सोमवासरे जयपुरे ‘लोकमन्थनयात्रा जयपुरमहानगरम्’ इति कार्यक्रमस्य आयोजनं कृतम्। गोविन्ददेवजीमन्दिरे दर्शनं कृत्वा जलेबीचौकात् उपमुख्यमन्त्री तथा लोकमन्थन२०२६ आयोजनसमित्याः अध्यक्षा दीयाकुमारी यात्रा रथं प्रस्थापितवती। यात्रायाः समये ‘वयं भारतस्य जनाः’ इति सन्देशेन सह बहुसंख्यकाः नागरिकाः, प्रबुद्धजनाः विभिन्नसामाजिकसङ्गठनानां प्रतिनिधयश्च सहभागितां कृतवन्तः।
यात्रामार्गः आकर्षकैः रङ्गोलीचित्रैः अलङ्कृतः आसीत्। नगरस्य विभिन्नेषु स्थलेषु व्यापारमण्डलैः समाजजनैश्च पुष्पवृष्टिं कृत्वा यात्रायाः स्वागतं कृतम्। अनेन यात्रामार्गे उत्सवमयः वातावरणः दृश्यते स्म। यात्रायां क्रीडाभारतीसम्बद्धाः राष्ट्रियाः अन्तर्राष्ट्रीयाश्च क्रीडकाः अपि भागं गृहीतवन्तः। क्रीडकैः सायकलचालनस्य, स्केटिङ्गस्य, पादकन्दुकक्रीडायाः, कबड्डीक्रीडायाः सतोलियाक्रीडायाश्च पारम्परिकानां आधुनिकानां च क्रीडागतिविधीनां प्रदर्शनं कृत्वा जनानां ध्यानम् आकर्षितम्।
माध्यमैः सह वार्तालापस्य समये उपमुख्यमन्त्री दीयाकुमारी उक्तवती यत् आगामी ४ तः ६ दिसम्बरपर्यन्तं जयपुरे प्रस्तावितस्य लोकमन्थन२०२६ इत्यस्य पूर्वकार्यक्रमरूपेण एषा यात्रा समाजजागरणस्य समाजस्य एकीकरणस्य च उद्देश्येन आयोजिताऽस्ति। तया उक्तं यत् भारतस्य सांस्कृतिकपरम्परा मूलतः लोकाधारिता एव अस्ति तथा लोकजीवनस्य मूल्याः प्रकृत्या पर्यावरणेन च सह सामञ्जस्यं सततजीवनशैलीं च प्रोत्साहयन्ति। तया उक्तम्, “लोकेन सह सम्बन्धः एव लोककल्याणस्य आधारः अस्ति तथा लोकमन्थनात् लोकमङ्गलस्य मार्गः प्रशस्तः भविष्यति।”
लोकमन्थनयात्रा हवामहलम्, बडीचौपड् तथा अल्बर्टहॉल इत्येतानि स्थलानि अतिक्रम्य महाराणीमहाविद्यालयं प्राप्तवती। अत्र लोकसाहित्यं, लोकसंस्कृतिः, भारतीयज्ञानपरम्परा इत्यादिविविधविषयाधारितानां कार्यक्रमाणाम् आरम्भः अभवत्। आगामी ४ तः ६ दिसम्बरपर्यन्तं लोकमन्थन२०२६ इति कार्यक्रमः जयपुरे प्रस्तावितः अस्ति।
---------------
Hindusthan Samachar / Dheeraj Maithani