मेरठम्, २१ सेप्टेम्बरमासः (हि.स.)। भारतीयजनतापक्षस्य राष्ट्रियाध्यक्षः नितिननवीनः सोमवासरे विपक्षीयौ समाजवादीपक्षं काङ्ग्रेसपक्षं च प्रति तीव्रं प्रहारं कृतवान्। सः अवदत् यत् ये जनाः अद्य पृष्ठवर्गीयाणां दलितानां च विषये वदन्ति, ते सत्तायां स्थिताः सन्तः स्वपरिवारात् अतिरिक्तं कस्यापि विषये चिन्तां न कृतवन्तः।

उत्तरप्रदेशस्य मेरठस्थिते स्वामी-विवेकानन्दसुभारतीविश्वविद्यालये आयोजिते ‘शक्तिकेन्द्रसम्मेलने’ सम्बोधयन् नितिननवीनः अवदत् यत् २०१७ तमवर्षात् पूर्वम् उत्तरप्रदेशे केचन जनाः ‘नलस्य तोटिकाः’ अपि चोरयन्ति स्म, अद्य ते एव युवानां भविष्यं सुन्दरं कर्तुं स्वप्नं दर्शयन्ति। सः अवदत् यत् यैः केवलं स्वपरिवारस्य भविष्यं दृष्टम्, ते उत्तरप्रदेशस्य यूनां चिन्तां कर्तुं न शक्नुवन्ति। तस्य मतानुसारं यूनां हितस्य चिन्तां केवलं भाजपासर्वकारः करोति, यस्य शासनकाले लक्षशः जनभ्यः पारदर्शितया रोजगाराः प्रदत्ताः।

सः अवदत् यत् अद्य वयं सन्तरविदासस्य षट्शताधिकपञ्चाशद्वर्षीयां जयन्तीं समाचरामः, यदा तु काङ्ग्रेसपक्षस्य जनाः केवलं स्वपरिवारस्य सदस्येषां जन्मदिवसानामेव आयोजनं कुर्वन्ति स्म। सः अवदत् यत् यः राजनैतिकः खेलः पुनः कर्तुं प्रयत्नः क्रियते, तं निराकर्तव्यं तथा उत्तरप्रदेशस्य विकासरथः अवरुद्धः न भवेत्।

भाजपाध्यक्षः पूर्वसर्वकाराणाम् उपरि उत्तरप्रदेशं अराजकतायां नीतवतः इति आरोपं कृत्वा अवदत् यत् एकस्मिन् काले राज्ये बालिकाः सुरक्षिताः न आसन्, कृषकेभ्यः समये धनराशिः न प्राप्यते स्म, व्यापारिणः भयस्य वातावरणे जीवनं यापयितुं बाध्याः आसन् तथा च सर्वकारीययोजनाः धर्मं समाजं च दृष्ट्वा वितीर्यन्ते स्म।

नितिननवीनः अवदत् यत् अद्य प्रधानमन्त्री नरेन्द्रमोदी तथा मुख्यमन्त्रिणः योगी-आदित्यनाथस्य नेतृत्वे योजनाः निर्धनान् दृष्ट्वा निर्मीयन्ते, धर्मं समाजं च दृष्ट्वा न। भाजपाकार्यकर्तृभिः कठिनपरिश्रमेण उत्तरप्रदेशः तस्मात् ‘जङ्गलराजात्’ परिवारवादीशासनाच्च बहिः आनीतः तथा ‘उत्तमप्रदेशस्य’ निर्माणस्य लक्ष्यं पूर्णं कृतम्।

भाजपाध्यक्षः अवदत् यत् पूर्वं उत्तरप्रदेशे कांवडयात्रां रामनवमीं च अवरोद्धुं प्रयत्नः क्रियते स्म। पश्चिमबङ्गाले अपि दुर्गापूजाम् अवरोद्धुं प्रयत्नः कृतः, किन्तु उभयोः राज्ययोः जनताभिः एतादृशाः प्रयत्नाः कर्तॄणां जनानां प्रति कठोरं प्रत्युत्तरं दत्तम्। पूर्वं एकस्मात् जनपदात् अपरं जनपदं गन्तुं दीर्घः कालः अपेक्ष्यते स्म, किन्तु अद्य नूतनाः द्रुतमार्गाः उत्तरप्रदेशस्य नूतनपरिचयत्वेन उद्भूताः सन्ति। सः अवदत् यत् राज्यं पुनः तस्मिन् काले न नीयते, यस्मिन् भयस्य वातावरणम् आसीत्। अद्य प्रदेशे अराजकता समाप्ता अस्ति तथा मुख्यमन्त्रिणः योगी-आदित्यनाथस्य नेतृत्वे पूर्णतया ‘विधेः शासनम्’ स्थापितम् अस्ति।

/ अंशु गुप्ता