नवदिल्ली, २२ सितम्बरमासः। देशस्य राजधानी नवदिल्ल्यां स्थिते भारतमण्डपे २३ तः २५ अक्टोबरपर्यन्तं आयोज्यमाने भारत-अन्तरराष्ट्रीय-तण्डुलसम्मेलने अर्थात् बीआईआरसी २०२६ इत्यस्मिन् विश्वस्य विभिन्नेभ्यः भागेभ्यः तण्डुलानां द्विशतं प्रकाराः प्रदर्शयिष्यन्ते।

भारत-अन्तरराष्ट्रीय-तण्डुलसम्मेलने विश्वस्य विभिन्नेभ्यः देशेभ्यः वाणिज्यिकदृष्ट्या महत्त्वपूर्णाः तण्डुलप्रकाराः प्रदर्शयिष्यन्ते। स्वप्रकारस्य एषः प्रथमः वैश्विकसङ्ग्रहः आगामीमासे नवदिल्ल्यां आयोजितः भविष्यति। भारतसहितं विश्वस्य विभिन्नेषु देशेषु प्राप्यमाणाः तण्डुलानां प्रायः द्विशतं प्रकाराः शीघ्रमेव एकस्मिन् स्थाने द्रष्टुं शक्यन्ते।

आयोजकानां मते वैश्विकतण्डुलसङ्ग्रहे भारतस्य अतिरिक्तम् इटली, थाईलैण्ड, जापान इत्यादिषु देशेषु वाणिज्यिकरूपेण प्रयुज्यमानाः तण्डुलानां द्विशतं प्रकाराः स्थापयिष्यन्ते। अनेन अन्तरराष्ट्रीयक्रेतृभ्यः एकस्मिन्नेव स्थाने विभिन्नप्रकाराणां तण्डुलानां तुलनां कर्तुं सम्भावितानां आपूर्तिकर्तॄणां च परिचयं प्राप्तुं साहाय्यं भविष्यति।

बासमतीतः कृष्णतण्डुलपर्यन्तं विविधाः प्रकाराः

बीआईआरसी २०२६ मध्ये भारतस्य बासमतीतण्डुलस्य ११२१, १७१८, १५०९ तथा १४०१ इत्यादयः प्रकाराः प्रदर्शयिष्यन्ते। तदतिरिक्तं पूसा बासमती, शरबतीतण्डुलः तथा सुगन्धा इत्येतेऽपि प्रदर्शयिष्यन्ते। अबासमतीप्रकारेषु पीआर ११, पीआर १४, परमल तथा सोना मसूरी इत्येतेषां स्थानं भविष्यति।

देशस्य विभिन्नेभ्यः राज्येभ्यः विशिष्टाः तण्डुलप्रकाराः अपि वैश्विकतण्डुलसङ्ग्रहे समावेशयिष्यन्ते। तेषु उत्तरप्रदेशस्य कालानमकः, छत्तीसगढस्य दुबराजः, असमस्य जोहा, मणिपुरस्य चखाओ कृष्णतण्डुलः तथा मध्यप्रदेशस्य चिन्नौरः अपि अन्तर्भवन्ति।

तदतिरिक्तं केरल, तमिलनाडु, पश्चिमबङ्गाल, महाराष्ट्र तथा काश्मीरस्य अनेकाः पारम्परिकाः तण्डुलप्रकाराः प्रदर्शयिष्यन्ते। विदेशीयतण्डुलप्रकारेषु इटलीदेशस्य आर्बोरियो तथा थाईलैण्डदेशस्य जैस्मिन इत्यादयः प्रकाराः प्रमुखाः भविष्यन्ति।

Hindusthan Samachar / Dheeraj Maithani