Enter your Email Address to subscribe to our newsletters
भारतीयज्ञानं केवलं पठनाय अथवा उपाधिप्राप्तये सीमितं नास्ति — स्वामी कृष्णानन्दझा
मुरादाबादः, २२ सितम्बरमासः। उत्तरप्रदेशस्य मुरादाबादजनपदस्य बिलारीस्थे अटल-आवासीय-विद्यालये आनन्दघन-लोकशिक्षाकेन्द्रस्य पुनरुत्थान-विद्यापीठस्य च तत्त्वावधानेन शिक्षकाणां छात्राणां च मध्ये ‘भारतीयज्ञानं कर्मयोगश्च’ इति विषये मङ्गलवासरे संवादकार्यक्रमः आयोजितः।
कार्यक्रमस्य मुख्यवक्ता गीताप्रचारकः स्वामी कृष्णानन्दझा भारतीयज्ञानपरम्परायाः, शिक्षायाः प्रयोजनस्य, कर्मयोगिनः व्यक्तित्वनिर्माणस्य च विविधपक्षेषु विद्यार्थिभिः शिक्षकैश्च सह संवादं कृतवान्।
स्वामी कृष्णानन्दझा अवदत् यत् भारतीयज्ञानपरम्परा केवलं पठनं वा उपाधिप्राप्तिं वा प्रति सीमिता नासीत्, अपितु अस्याः परम्परायाः प्रयोजनं ज्ञानस्य, चरित्रस्य, कर्तव्यस्य, जीवननिर्माणस्य च समविकासः आसीत्। सः भारतीयपरम्परायां चतुर्दशविद्यानां उल्लेखं कुर्वन् अवदत् यत् तासु चत्वारः वेदाः, षड् वेदाङ्गानि, न्यायः, पुराणानि, धर्मशास्त्रं, मीमांसा च अन्तर्भवन्ति।
सः अवदत् यत् औपनिवेशिककाले भारतीयशिक्षाव्यवस्थायाः ज्ञानपरम्परायाश्च हानिः अभवत्, येन शिक्षायाः जीवनमूल्यैः कर्तव्यबोधेन च सह सम्बन्धः दुर्बलः अभवत्।
सः उक्तवान् यत् वर्तमानकाले तादृशी शिक्षाव्यवस्था आवश्यकी अस्ति, या विद्यार्थिनः केवलं रोजगारप्राप्तये न सज्जीकरोति, अपितु तेषु चरित्रं, संस्कारान्, कर्तव्यबोधं, सेवाभावं च अपि विकसितं करोति। शिक्षा व्यक्तिं स्वपरिवारस्य, समाजस्य, राष्ट्रस्य च प्रति स्वकीयदायित्वानि ज्ञातुं तेषां च निर्वहणाय प्रेरयेत्।
गीतायाः रामचरितमानसस्य च सन्दर्भं प्रदाय स्वामी कृष्णानन्दझा अवदत् — “कर्मयोगी भवितुमिच्छसि चेत् गीतां पठ, चरित्रस्य निर्माणं कर्तुमिच्छसि चेत् रामचरितं पठ।” भगवान् श्रीकृष्णस्य भगवान् श्रीरामस्य च जीवनं आदर्शरूपेण प्रस्तुत्य सः विद्यार्थिभ्यः कर्तव्यस्य, मर्यादायाः, सेवायाः, समर्पणस्य च भावान् स्वजीवने स्वीकर्तुम् आह्वानं कृतवान्।
सः विद्यार्थिभ्यः “भारतं जानीत, भारतं मन्यध्वम्, भारतीयाः भवत” इति सूत्रं प्रदाय भारतीयज्ञानपरम्परां सम्यक् अवगन्तुं राष्ट्रनिर्माणे च स्वकीयां भूमिकां निर्वोढुं प्रेरितवान्।
कार्यक्रमे विद्यालयस्य शिक्षकाः छात्राः छात्राश्च उत्साहपूर्वकं सहभागितां कृतवन्तः।
हिन्दुस्थान समाचार / Dheeraj Maithani