Enter your Email Address to subscribe to our newsletters
नवदिल्ली, २२ सेप्टेम्बरमासः (हि.स.)। भारतं मङ्गलवासरे अवदत् यत् यूक्रेनसङ्घर्षस्य शान्तिपूर्णं समाधानं संवादेन कूटनीत्यां च एव सम्भवम् अस्ति तथा भारतम् अस्य दिशि योगदानं दातुं सज्जम् अस्ति। विदेशमन्त्रालयेन उक्तं यत् भारतं सङ्घर्षस्य उभयोः पक्षयोः—यूक्रेनस्य रूसस्य च—सम्पर्के अस्ति।
विदेशमन्त्रालयस्य प्रवक्ता रणधीर-जायसवालः मङ्गलवासरे माध्यम-प्रतिनिधीनां वार्तासम्मेलने विदेशमन्त्री एस. जयशङ्करस्य यूक्रेनस्य विदेश-मन्त्रिणा सह सम्पन्नस्य मिलनस्य विषये सूचनां दत्त्वा अवदत् यत् उभौ नेतारौ सङ्घर्षसम्बद्धानां साम्प्रतिकानां घटना-क्रमाणां विषये चर्चां कृतवन्तौ।
जायसवालः अवदत् यत् विदेशमन्त्रिणा पुनरपि भारतस्य एषः पक्षः स्पष्टतया प्रतिपादितः यत् शान्तिपूर्णसमाधानाय संवादः कूटनीतिश्च एव अग्रे गमनस्य मार्गौ स्तः। सः अवदत् यत् भारतं रूसस्य यूक्रेनस्य च उभयोः सम्पर्के अस्ति तथा उभाभ्यां पक्षाभ्यां च एतदपि उक्तम् अस्ति यत् यदि भारतं केनचित् प्रकारेण योगदानं दातुं शक्नोति तर्हि तत् कर्तुं सः सज्जः अस्ति।
विदेशमन्त्रालयस्य प्रवक्त्रा प्रधानमन्त्रिणः नरेन्द्रमोदिनः रूसीराष्ट्रपतिना व्लादिमिर-पुतिनेन सह बिश्केके सम्पन्नस्य मिलनस्य उल्लेखः अपि कृतः। सः अवदत् यत् तस्मिन् अवसरे प्रधानमन्त्रिणा उक्तम् आसीत् यत् अनन्तानां युद्धानां समाप्तिं प्रति अधुना अग्रे गन्तव्यम्। जायसवालः अवदत् यत् भारतस्य आशा अस्ति यत् यूक्रेनसङ्घर्षस्य शान्तिपूर्णं समाधानं यथाशीघ्रं संवादेन कूटनीत्यां च माध्यमेन निष्पद्येत।
हिन्दुस्थान समाचार / Divya Ranjan