Enter your Email Address to subscribe to our newsletters
रांची, 22 सितंबरमासः (हि.स.)। झारखण्डस्य राज्यपालः सन्तोषगङ्गवारः, मुख्यमन्त्री हेमन्तसोरेनः तथा विधानसभायां विपक्षनेता बाबूलालमराण्डी च समस्तप्रदेशवासिभ्यः करमपूजायाः हार्दिकाः शुभकामनाः प्रदत्तवन्तः।
राज्यपालः मङ्गलवासरे सामाजिकमाध्यमस्य ‘एक्स’ इत्यस्य माध्यमेन प्रकृतिपर्वणः ‘करमपूजायाः’ पावने अवसरे समस्तेभ्यः झारखण्डवासिभ्यः हार्दिकाः शुभकामनाः प्रदत्तवान्। सः उक्तवान् यत् करमपूजा प्रकृतेः, संस्कृतेः, सामुदायिकैक्यस्य च पर्व अस्ति। एतत् पर्व सर्वेषां जीवने सुखं, शान्तिं, समृद्धिं प्रसन्नतां च आनयतु इति तस्य मङ्गलकामना अस्ति।
मुख्यमन्त्री हेमन्तसोरेनः प्रकृतेः महापर्वणः करमपर्वणः सर्वेभ्यः अनेकाः शुभकामनाः प्रदत्तवान्। मुख्यमन्त्री सामाजिकमाध्यमस्य ‘एक्स’ इत्यत्र लिखितवान् यत् प्रकृत्या मानवजीवनेन च गहनसम्बन्धस्य, भ्रातृभगिन्योः अखण्डप्रेम्णः, सामाजिकैकतायाः तथा समृद्धायाः संस्कृतेः परम्परायाश्च प्रतीकं करमपर्व झारखण्डस्य परिचयेन अस्माकं जीवनपद्धत्या च गभीररूपेण सम्बद्धम् अस्ति।
सः उक्तवान् यत् करमपर्व अस्मान् प्रकृतेः प्रति सम्मानं, कृतज्ञतां तस्याः संरक्षणस्य प्रेरणां च ददाति। अस्माकं पूर्वजाः अस्मान् शिक्षितवन्तः यत् जलं, वनं, भूमिश्च केवलम् अस्माकं जीवनस्य आधाराः न सन्ति, अपितु अस्माकं संस्कृतेः, परम्परायाः आगामिसन्ततेश्च धरोहराः अपि सन्ति।
मुख्यमन्त्री उक्तवान् यत् एतत् पर्व भ्रातृभगिन्योः पवित्रस्नेहस्य परस्परविश्वासस्य च पर्व अपि अस्ति। आखडास्थले करमशाखायाः स्थापना, मान्दरवाद्यस्य नादः, करमगीतं सामूहिकनृत्यं च अस्माकं जीवन्तलोकसंस्कृतेः सुन्दराभिव्यक्तयः सन्ति। प्रकृतेः महापर्वणः करमपर्वणः सर्वश्रेष्ठा विशेषता एषा अस्ति यत् तत् अस्मान् स्वकीयाभ्यः मूलपरम्पराभ्यः सम्बद्धान् स्थातुं प्रेरयति। आधुनिकतायाः विकासस्य च मार्गे अग्रे गच्छन्तोऽपि अस्माभिः स्वभाषया, संस्कृत्या, परम्परया, लोकज्ञानेन प्रकृत्या च सह स्वसम्बन्धान् सुदृढीकर्तुं प्रेरणा ग्रहीतव्या। अस्माकं पूर्वजानां समृद्धा धरोहरः आगामिसन्ततीनां कृते सुरक्षितरूपेण सशक्तरूपेण च प्राप्नुयात्, एषा अस्माकं सर्वेषां सामूहिकी दायित्वम् अस्ति।
हेमन्तसोरेनः उक्तवान्, “अहं कामये यत् अस्मिन् पावने अवसरे प्रत्येकस्मिन् परिवारे सुखं, शान्तिः, समृद्धिः प्रसन्नता च स्थिरा भवेत्। भ्रातृभगिन्योः प्रेम अधिकं सुदृढं भवेत्, समाजे परस्परसौहार्दम् ऐक्यं च वर्धेतां तथा अस्माकं झारखण्डप्रदेशः प्रकृत्या संस्कृत्या च सह सामञ्जस्यं स्थापयन् निरन्तरम् अग्रे वर्धताम्।”
विपक्षनेता बाबूलालमराण्डी अपि समस्तप्रदेशवासिभ्यः भ्रातृभगिन्योः अखण्डप्रेम्णः प्रतीकस्य प्रकृतिपर्वणः करमपूजायाः हार्दिकाः बधाईशुभकामनाश्च प्रदत्तवान्। मराण्डी सामाजिकमाध्यमस्य ‘एक्स’ इत्यत्र लिखितवान् यत् झारखण्डस्य आदिवासीमूलवासी लोकसंस्कृतेः पर्यायभूतमिदं पावनं करमपर्व सर्वेषां जीवने सुखं, शान्तिं समृद्धिं च आनयतु।
---------------
Hindusthan Samachar / Dheeraj Maithani