भुवनेश्वरम्, २२ सेप्टेम्बरमासः (हि.स.)। ओडिशायाः सप्तदशस्य विधानसभायाः सप्तमं सत्रम् अद्य आरभ्यते तथा ३ अक्तूबर-पर्यन्तं प्रचलिष्यति। अल्पावधिके अस्मिन् मानसून-सत्रे विपक्षः राज्यसम्बद्धानां विविधानां विषयाणां विषये सर्वकारं प्रश्नान् प्रष्टुं सज्जतां कृतवान् अस्ति। निर्धारितकार्यक्रमानुसारं सत्रे नव कार्यदिवसाः भविष्यन्ति। तदतिरिक्तम् एकः अवकाशदिवसः तथा द्वौ ‘सभानिषेधदिवसौ’ भविष्यतः। सत्रस्य अवधौ प्रायः षड् विधेयकानि सदने प्रस्तुतानि भविष्यन्ति इति सम्भावना अस्ति।

सत्रस्य प्रारम्भात् पूर्वं विधानसभाध्यक्षया सुरमा पाढी इत्यनया सोमवासरे सर्वदलीयसभायाः अध्यक्षता कृता। सभायां सदनस्य कार्यवाहीं सुचारुरूपेण व्यवस्थितरीत्या च संचालयितुं सर्वेभ्यः दलेभ्यः सहयोगस्य आह्वानं कृतम्। सभायां मुख्यमन्त्री मोहनचरणमाझी, उपमुख्य-मन्त्री कनकवर्धनसिंहदेवः, उपाध्यक्षः भवानीशङ्करभोई, विपक्षस्य उपनेता प्रसन्नाचार्यः, विपक्षस्य मुख्यसचेतिका प्रमिलामल्लिका, काङ्ग्रेस-विधायक-दलस्य उपनेत्रा अशोकदासेन सह विभिन्नदलानां वरिष्ठाः नेतारः सम्मिलिताः।

सर्वदलीयसभा तस्मिन् समये अभवत्, यदा विपक्षीदलानि सत्रस्य अवधौ विभिन्नानां विषयाणां विषये सर्वकारात् उत्तरं प्राप्तुं सज्जतां कुर्वन्ति। सत्रस्य सीमितावधित्वात् अनेकमहत्त्वपूर्णविषयेषु सदने तीव्रा चर्चा भवितुं सम्भावना अस्ति। सत्रस्य अवधौ खनिजस्य तथा खनिजस्य (विकास-विनियमनयोः) संशोधन-अधिनियमः, २०२६ अर्थात् एमएमडीआर-संशोधन-विधिः प्रमुखेषु विषयेषु सम्मिलितः भविष्यति इति सम्भावना अस्ति।

ओडिशा-विधानसभायाः विपक्षनेता तथा बीजूजनतादलस्य अध्यक्षः नवीन-पटनायकः मुख्यमन्त्रिणः मोहनचरण-माझी-महोदयस्य समीपे विधानसभायाः विशेषसत्रम् आह्वातुं तथा एमएमडीआर-संशोधन-अधिनियमं, २०२६ निरस्तं कर्तुं सर्वसम्मतं प्रस्तावं पारयितुं च आग्रहं कृतवान् आसीत्।

पटनायकस्य तर्कः अस्ति यत् एतत् संशोधनं खनिजसम्पदां सम्बद्धस्य कराधानस्य विषये ओडिशायाः संवैधानि-काधिकारान् प्रभावितं करोति। अस्मिन् विषये विपक्षस्य आग्रहात् राज्यस्य खनिजसंसाधनानां तथा तैः प्राप्तस्य राजस्वस्य विषये राजनैतिकचर्चा तीव्रा भवितुं सम्भावना अस्ति।

एमएमडीआर-संशोधन-विधेः अतिरिक्तं विपक्षीदलानि विद्यालयीय-पाठ्यपुस्तकेषु कथितानां त्रुटीभिः सह अनेकान् अन्यान् विषयान् अपि सदने उत्थापयितुं सज्जानि सन्ति। विपक्षः एतेषां विषयाणां विषये सर्वकारात् स्पष्टीकरणं याचितुं शक्नोति। सीमितकार्यदिवसयुक्ते अस्मिन् सत्रे सर्वकारस्य विपक्षस्य च मध्ये विभिन्नेषु विधायीषु जनहितसम्बद्धेषु च विषयेषु चर्चा भवितुं सम्भावना अस्ति। विपक्षः यत्र विभिन्नविषयेषु सर्वकारात् उत्तरं याचिष्यति, तत्र सर्वकारः स्वपक्षं सदनस्य समक्षं स्थापयिष्यति। मानसून-सत्रं ३ अक्टोबर-पर्यन्तं प्रचलिष्यति।

Hindusthan Samachar / Divya Ranjan