Enter your Email Address to subscribe to our newsletters
हरिद्वारम्, 23 सितंबरमासः (हि.स.)।
राष्ट्रगीतस्य ‘वन्देमातरम्’ इत्यस्य रचनायाः १५० वर्षाणि पूर्णानि भवन्ति। अस्य अवसरस्य स्मरणार्थं विद्याभारती देशव्यापिरूपेण सामूहिकगायनस्य आयोजनं कृत्वा नूतनं विश्वकीर्तिमानं स्थापयितुं सज्जा अस्ति। विद्याभारती अखिलभारतीयशिक्षासंस्थानस्य, नवदेहल्याः, मार्गदर्शनेन आयोजितस्य अस्य कार्यक्रमस्य नाम ‘नमामि भारतम्’ इति निर्धारितम् अस्ति। अयं कार्यक्रमः सितम्बरमासस्य २५ दिनाङ्के प्रातः ठीक ११ वादने भविष्यति।
विद्याभारत्याः मायापुरस्थिते सरस्वतीविद्यामन्दिरस्य शिविरकार्यालये प्रदेशनिरीक्षकः डॉ. विजयपालसिंहः अवदत् यत् राज्ये विद्याभारत्या सञ्चालितेषु सर्वेषु ५४८ विद्यालयपरिसरेषु, पोषितग्रामेषु वार्डेषु च कार्यक्रमाः आयोजयिष्यन्ते। उत्तराखण्डस्य सर्वेषु १३ जनपदकेन्द्रेषु पञ्चसहस्राधिकजनसहभागितायुक्तानां कार्यक्रमाणाम् आयोजनस्य योजना अस्ति।
सम्पूर्णप्रदेशे प्रायः द्विलक्षं छात्राः, अध्यापकाः, अभिभावकाश्च सम्मिल्य वन्देमातरम् इत्यस्य सामूहिकगायनं करिष्यन्तीति लक्ष्यं निर्धारितम् अस्ति।
तेन उक्तं यत् ‘नमामि भारतम्’ कार्यक्रमस्य प्रान्तीयसंयोजकस्य नत्थीलालबङ्गवालस्य नेतृत्वे सर्वेषु जनपदकेन्द्रेषु स्थितानां सरस्वतीविद्यामन्दिराणां प्रधानाचार्याः जनपदसंयोजकस्य दायित्वं निर्वहिष्यन्ति।
विद्याभारत्याः प्रान्तीयमन्त्री डॉ. रजनीकान्तशुक्लः अवदत् यत् सामूहिकवन्देमातरम् गायनाभियाने देशव्यापिरूपेण एककोट्यधिकजनान् संयोजयितुं लक्ष्यं निर्धारितम् अस्ति। आयोजनं गिनीज् बुक् ऑफ् वर्ल्ड् रिकार्ड्स् इत्यस्मिन् अभिलेखितुं प्रतिभागिनां संख्यायाः आरभ्य चित्राङ्कनपर्यन्तं विस्तृता व्यवस्था क्रियते।
तेन उक्तं यत् देशे विद्याभारत्याः सम्बद्धानि प्रायः पञ्चविंशतिसहस्रं औपचारिकाणि अनौपचारिकाणि च विद्यालयानि संस्कारकेन्द्राणि च अस्मिन् अभियाने सम्मिलितानि भविष्यन्ति। तेषां संस्थानां लक्षाधिकाः आचार्याः तथा षट्त्रिंशल्लक्षाधिकाः विद्यार्थिनः प्रत्यक्षरूपेण अस्मिन् कार्यक्रमे सम्बद्धाः भविष्यन्ति। तदतिरिक्तं पूर्वछात्राः, पूर्वाचार्याः, अभिभावकाः, प्रबुद्धनागरिकाश्च सहभागीभूताः भविष्यन्ति।
मुख्यकार्यक्रमे प्रातः दशवादनतः प्रतिभागिनाम् आगमनं पञ्जीकरणं च भविष्यति। दीपप्रज्वलनस्य अनन्तरं प्रातः ११ वादनतः त्रिमिनिट् त्रयोदशसेकण्डपर्यन्तं देशव्यापिरूपेण एकस्मिन् समये, एकेन स्वरेण, एकेन लयेन च ‘वन्देमातरम्’ इत्यस्य सामूहिकगायनं भविष्यति।
Hindusthan Samachar / Dheeraj Maithani