नवदिल्ली, २४ सेप्टेम्बरमासः (हि.स.)। उत्तरप्रदेशे बसाग्निदुर्घटनायां राष्ट्रपतिः द्रौपदीमुर्मू तथा रक्षामन्त्री राजनाथसिंहः इत्येताभ्यां सह अनेके नेतारः गभीरं दुःखं प्रकटितवन्तः। ते पीडितपरिवारान् प्रति स्वकीयाः संवेदनाः प्रकटितवन्तः।

राष्ट्रपतिः एक्स-माध्यमे अवदत्, “उत्तरप्रदेशे यमुनाएक्सप्रेस-मार्गे बसयाने अग्निः प्रज्वलितः, येन जनानां मृत्युसमाचारः अत्यन्तं पीडादायकः अस्ति। अहं शोकसन्तप्तपरिवारान् प्रति गभीरां संवेदनां प्रकटयामि। अस्यां दुर्घटनायां घातितानां जनानां शीघ्रस्वास्थ्यलाभाय कामये।”

रक्षामन्त्री राजनाथसिंहः अवदत् यत् ग्रेटरनोएडायां यमुनाएक्सप्रेस्-मार्गे शयनयान-बसयाने अग्निप्रज्वलनेन यात्रिकाणां मृत्युः अत्यन्तं दुःखदः हृदयविदारकश्च अस्ति। अस्यां दुःखदुर्घटनायां स्वकीयजनान् हृतवत: परिवारान् प्रति तस्य गभीराः संवेदनाः सन्ति। ईश्वरः तेषां शोकसन्तप्तपरिजनान् एतदपारं दुःखं सोढुं शक्तिं प्रददातु। सः आहतानां शीघ्रस्वास्थ्यलाभाय प्रार्थनां कृतवान्।

उल्लेखनीयम् अस्ति यत् देहलीस्थित-कश्मीरीद्वारतः उत्तरप्रदेशस्य महोबां प्रति गच्छत्यां द्विस्तरीय-बसयाने बुधवासरे अर्धरात्रौ यमुनाएक्सप्रेस-मार्गस्य ३३-तम-किलोमीटरे अग्निः प्रज्वलितः। तस्मिन् समये बसयाने ३५ जनाः आरूढाः आसन्। अस्यां दुर्घटनायां महिलया सह नव जनाः दग्धाः मृत्युमुपगताः।

Hindusthan Samachar / Divya Ranjan