अहमदाबादम्, ०३ सितम्बरमासः (हि.स.)। गुजरातीचलच्चित्रजगतः सुप्रसिद्धः सङ्गीतकारः गीतकारः च स्वर्गीय-अविनाशव्यासस्य पुत्रः गौराङ्गव्यासस्य बुधवासरे देररात्रौ अहमदाबादनगरे निधनम् अभवत्। तस्य निधनस्य वार्ता प्रकाशमागते सति गुजरातीचलच्चित्र-सङ्गीतजगति शोकस्य तरङ्गः प्रवृत्तः। सः दीर्घकालात् गुजरातीसङ्गीतजगति सक्रियः आसीत् तथा च शताधिकेषु गुजरातीचलच्चित्रेषु सङ्गीतं प्रदत्तवान्।

गौराङ्गव्यासः चलच्चित्रसङ्गीतस्य अतिरिक्तं सुगमसङ्गीते, लोकसङ्गीते, भजनरचनायां, रास-गरबासङ्गीते, नृत्य-नाटिकासु दूरदर्शने च उल्लेखनीयकार्यं कृतवान्। गुजराती-विश्वकोशस्य अनुसारं वर्षे २००४ पर्यन्तं सः प्रायः शताधिकेषु गुजरातीचलच्चित्रेषु सङ्गीतं दत्तवान् आसीत्। तदतिरिक्तं तेन गुजराती-गीतकाराणां गजलकाराणां च पञ्चशताधिकाः रचनाः सङ्गीतबद्धाः कृताः।

गौराङ्गव्यासः गुजराती-रास-गरबा-सङ्गीतेऽपि अनेकान् नूतनप्रयोगान् कृतवान्। तस्य सङ्गीतसम्बद्धेषु प्रसिद्धेषु सङ्गीतसङ्ग्रहेषु ‘जालारामनी झूंपड़ी’, ‘भजन अनमोल’, ‘गंगा सतीना भजनों’, ‘कहत कबीर’, ‘जालाराम बापानुं हालरड़ु’, ‘प्राचीन प्रभातियां’ तथा ‘नॉन स्टॉप डांडिया-रास’ इत्यादयः समाविष्टाः सन्ति।गुजरातीचलच्चित्रजगति ‘लव नी भवई’ इत्यादिचर्चितचलच्चित्रे तस्य सङ्गीतं विशेषरूपेण स्मर्यते। तस्य सङ्गीतसम्बद्धेषु लोकप्रियगीतिषु ‘आज वगडावो रूडा शरणाई ने ढोल’ तथा ‘मने एकली मेलीने’ इत्यादयः गीतयः समाविष्टाः सन्ति। तस्य अनेकाः रचनाः अद्यापि गुजराती-सङ्गीतप्रेमिणां मध्ये लोकप्रियाः सन्ति।

तस्य चर्चितरचनासु ‘बेना रे’ इत्यपि समाविष्टा अस्ति। अस्य गीतस्य स्वरप्रदात्री अनुराधापौडवालः आसीत्, अस्य गीतस्य रचयिता तस्य पिता अविनाशव्यासः आसीत् तथा सङ्गीतं गौराङ्गव्यासेन प्रदत्तम्। एवं प्रकारेण इयं रचना पितृपुत्रयोः सङ्गीतपरम्परायाः अपि अनुपमम् उदाहरणम् अभवत्।

गौराङ्गव्यासाय सङ्गीतं पैतृकपरम्परया प्राप्तम् आसीत्। तस्य पिता अविनाशव्यासः गुजरातीचलच्चित्रसङ्गीतजगतः प्रतिष्ठितेषु नामसु समाविष्टः आसीत्। तथापि गौराङ्गव्यासः स्वप्रतिभया प्रयोगैः च सङ्गीतजगति पृथक् परिचयं निर्मितवान् तथा गुजरातीसङ्गीतस्य समृद्धां परम्परां अग्रे प्रवर्धितवान्।

अहमदाबादनगरे तस्य निधनस्य वार्तया तस्य प्रशंसकेषु, कलाकारेषु गुजराती-चलच्चित्रसङ्गीतजगत्सम्बद्धेषु च जनसमूहेषु शोकः व्याप्तः अस्ति। शताधिकचलच्चित्रेभ्यः शतशः रचनाभ्यश्च सङ्गीतं प्रदत्तवान् गौराङ्गव्यासः यद्यपि अधुना अस्माकं मध्ये नास्ति, तथापि तस्य सङ्गीतं दीर्घकालपर्यन्तं गुजरातीसंस्कृतेः सङ्गीतप्रेमिणां च स्मृतिषु जीवन्तं स्थास्यति।

Hindusthan Samachar / Divya Ranjan