- देशे शीघ्रं भवति धार्मिकस्य आध्यात्मिकस्य च पर्यटनस्य विकासः : मुख्यमन्त्री डॉ. यादवः

भोपालम्, ०३ सितम्बरमासः (हि.स.)। मध्यप्रदेशस्य मुख्यमन्त्री डॉ. मोहन यादवः गुरुवासरे गुजरातस्य देवभूमि-द्वारकायाः पावने द्वारकाधीशमन्दिरे सपत्नीकः भगवान् श्रीद्वारकाधीशस्य अलौकिकरूपस्य दर्शनं कृत्वा विधिविधानपूर्वकं पूजनं कृतवान् तथा तस्य आशीर्वादं प्राप्तवान्। मुख्यमन्त्री भगवान् द्वारकाधीशात् सर्वेषां प्रदेशवासिनां सुखस्य, समृद्धेः कल्याणस्य च कामनाम् अकरोत्।

मुख्यमन्त्री डॉ. यादवः शुक्रवासरे आयोज्यमानायाः जन्माष्टम्याः पूर्वं देशवासिभ्यः प्रदेशवासिभ्यश्च भगवान् श्रीकृष्णस्य जन्मपर्वणः हार्दिकान् अभिनन्दनान् शुभकामनाश्च अयच्छत्। तेन सह तस्य धर्मपत्नी सीमा यादवः अन्ये च परिजनाः तथा मुख्यमन्त्रिकार्यालयस्य सचिवः डॉ. इलैयाराजा टी. अपि उपस्थिताः आसन्।

भगवतः श्रीद्वारकाधीशस्य दर्शनपूजनानन्तरं मन्दिरपरिसरस्य बहिः स्थानीयमाध्यमप्रतिनिधिभिः सह वार्तालापं कुर्वन् मुख्यमन्त्री डॉ. यादवः उक्तवान् यत् अद्य सः सपारिवारं द्वारिकाम् आगतः अस्ति। प्रधानमन्त्रिणः नरेन्द्रमोदिनः मार्गदर्शने मध्यप्रदेशस्य उज्जयिनीं गुजरातस्य द्वारिकानगरीं च सहित्वा सम्पूर्णे देशे निरन्तरं धार्मिकपर्यटनस्य नूतनाः कीर्तिमानाः स्थापिताः सन्ति।

महाकालस्य कृपया उज्जयिन्यां विंशतिगुणिताः वर्धिताः श्रद्धालवः

सः उक्तवान् यत् उज्जयिन्यां श्रीमहाकाललोकस्य निर्माणानन्तरं श्रद्धालूनां संख्या विंशतिगुणिता वर्धिता अस्ति। सम्प्रति प्रायः दशकोट्यधिकाः तीर्थयात्रिकाः उज्जयिनीम् आगच्छन्ति। प्रधानमन्त्रिणा नरेन्द्रमोदिना स्वकरकमलाभ्यां उज्जयिन्यां बाबामहाकाललोकस्य लोकार्पणानन्तरं वाराणस्याम् अपि काशीविश्वनाथमन्दिरस्य मार्गिकायाः निर्माणम् अभवत्, येन बाबा विश्वनाथस्य नगरे धार्मिकपर्यटनं नूतनानि उच्चशिखराणि प्राप्तवान्।

तेन उक्तं यत् द्वारकाधीशमन्दिरम् आदिशङ्कराचार्येण स्थापितेषु सनातनसंस्कृतेः चतुर्षु धामसु एकं प्रमुखं तीर्थम् अस्ति। जन्माष्टम्याः ठीक् पूर्वं भगवान् श्रीद्वारकाधीशस्य भव्यदर्शनस्य अवसरः प्राप्तः इति अस्माकं सर्वेषां सौभाग्यस्य विषयः अस्ति। सः उक्तवान् यत् किञ्चित्कालपूर्वमेव सः सोमनाथधामम् अगच्छत्। ततः अद्य द्वारकायाः प्रसिद्धे श्रीद्वारकाधीशमन्दिरे विधिवत् दर्शनपूजनार्चनं कृत्वा अत्रत्याः सर्वासां व्यवस्थायाः अवलोकनं कृतवान्। वयमपि स्वकीयेषु देवस्थानेषु उत्तमोत्तमप्रबन्धनस्य सर्वाः व्यवस्थाः कुर्मः।

मुख्यमन्त्री डॉ. यादवः माध्यमप्रतिनिधीन् उक्तवान् यत् मध्यप्रदेशसर्वकारः निरन्तरं धार्मिकस्य आध्यात्मिकस्य च पर्यटनस्य विस्ताराय योजनाबद्धरूपेण कार्यं कुर्वन् अस्ति। प्रदेशस्य सर्वेषु प्रमुखेषु धार्मिकस्थलेषु देवस्थानेषु च सुगमस्य आवागमनस्य, श्रद्धालूनां निवासस्य, तेषां सुरक्षायाः पर्यटकानां वृद्धेः च आवश्यकतां दृष्ट्वा सर्वेषाम् आवश्यकाधोसंरचनानां शीघ्रं विकासः क्रियते। अस्माकं सर्वकारः भारतीयसंस्कृतेः गौरवशालिनः अतीतस्य पुनःस्थापनाय प्रतिबद्धतया कार्यं कुर्वन् अस्ति।

---

Hindusthan Samachar / Dheeraj Maithani