सेवासंकल्पाभियानं, 17 सितम्बरमासीयात् 17 अक्टूबरमासीयं यावत्सेवा भावनया सह जनतायाः मध्ये प्राप्स्यन्ति भाजपाकार्यकर्तारः

जगदलपुरम्, 04 सितंबरमासः (हि.स.)।

प्रधानमन्त्रिणः नरेन्द्रमोदिनः सार्वजनिकसेवायाः जनसमर्पणस्य च पञ्चविंशतिवर्षाणां पूर्त्यवसरे भारतीयजनतापक्षः समग्रे देशे आगामी-सप्तदशदिनाङ्कतः सप्तदश-अक्टोबर्-दिनाङ्कपर्यन्तं निरन्तरम् एकमासपर्यन्तं “सेवासंकल्प-अभियानम्” आयोजयिष्यति। अस्मिन् अभियानान्तर्गतं भारतीयजनतापक्षस्य राष्ट्रियनेतृत्वेन त्रयोदश प्रमुखाः कार्यक्रमाः निर्धारिताः सन्ति, येषाम् आयोजनं बूथस्तरात् राष्ट्रियस्तरपर्यन्तं भविष्यति।

अद्य शुक्रवासरे भारतीयजनतापक्षस्य जिलाकार्यालये सेवासंकल्पस्य जिलास्तरीयकार्यशालायाः आयोजनम् अभवत्। अस्यां कार्यशालायां भाजपायाः प्रदेशसङ्गठनमहामन्त्री पवनसायः सम्मिलितः अभवत्। विगतदिने दुर्घटनायां आहतः भूत्वा दिल्लीनगरे उपचारं प्राप्यमाणः भारतीयजनतापक्षस्य प्रदेशाध्यक्षः किरणदेवः दूरभाषमाध्यमेन जगदलपुर-भाजपाकार्यालये आयोजितां जिलाकार्यसमितिसभां सेवासंकल्प-अभियानस्य कार्यशालां च सम्बोधितवान्।

दिल्लीतः कार्यकर्तॄणां मध्ये स्वकीयां वाणीं प्रेषयन् प्रदेशाध्यक्षः किरणदेवः सङ्गठनस्य प्रति स्वसमर्पणस्य कार्यकर्तृषु च आत्मीयसम्बन्धस्य भावं प्रकटितवान्। सः कार्यकर्तृणाम् उत्साहवर्धनं कुर्वन् अवदत् यत् सङ्गठनस्य शक्तिः कार्यकर्तृणां परिश्रमे, सेवायां समर्पणे च निहिता अस्ति। श्रीदेवः कार्यकर्तृभ्यः श्रीकृष्णजन्माष्टमीपर्वणः बधाईः शुभकामनाश्च प्रदाय कर्मपथे निरन्तरम् अग्रे गन्तुं कथितवान्। प्रदेशाध्यक्षस्य सन्देशः स्पष्टः आसीत् यत् व्यक्तिगतपरिस्थितयः यद्यपि कीदृश्यः स्युः, तथापि सङ्गठनस्य समाजसेवायाश्च सङ्कल्पः सदैव सर्वोपरि भवेत्।

भाजपायाः प्रदेशसङ्गठनमहामन्त्री पवनसायः कार्यशालां सम्बोधयन् अवदत् यत् प्रधानमन्त्री नरेन्द्रमोदिनः राष्ट्रसेवायाः सफलतापूर्वकं पञ्चविंशतिवर्षाणि पूर्णानि जातानि, अतः “सेवासंकल्प-अभियानम्” राष्ट्रियस्तरे व्यापकत्वेन आयोजयिष्यते। भाजपायाः प्रत्येकः कार्यकर्ता पूर्णसमर्पणभावेन अभियानस्य सह सम्बध्य स्वकीयां महत्त्वपूर्णां सहभागितां निर्वक्ष्यति। प्रधानमन्त्री नरेन्द्रमोदिनः सम्पूर्णं जीवनं सेवायै दरिद्रकल्याणाय च समर्पितम् अस्ति। मोदी-महोदयेन कोरोनासदृशे वैश्विकमहामारीकाले देशः सम्भालितः, देशवासिनां स्वास्थ्यरक्षणाय विविधाः उपायाः कृताः।

कश्मीरात् संविधानस्य त्रिशतसप्ततितमं अनुच्छेदं निरस्तं कृतवान्, बस्तरप्रदेशसहितात् सम्पूर्णदेशात् नक्सलवादस्य उन्मूलनं कृतवान्। श्रीसायः अवदत् यत् सेवासंकल्प-अभियानस्य माध्यमेन प्रधानमन्त्री-महोदयस्य सेवाकार्याणि जनजनं प्रति प्रापयितव्यानि सन्ति तथा सर्वेषां सहभागिता सुनिश्चितकर्तव्या अस्ति। जनानां मध्ये गत्वा सेवाभावना स्थापनीया अस्ति।

कार्यशालां भाजपायाः प्रदेशोपाध्यक्षः जीवेङ्कटः, सम्भागसहप्रभारी हरपालसिंहभामरा, भाजपायाः जिलाध्यक्षः वेदप्रकाशपाण्डेयः च अपि सम्बोधितवन्तः। कार्यशालायां प्रक्षेपकयन्त्रस्य माध्यमेन सेवासंकल्प-अभियानस्य कार्यक्रमाणां विस्तृतविवरणं प्रदत्तम्।

कार्यक्रमस्य सञ्चालनं जिलामहामन्त्री रजनीशपाणिग्रही अकरोत् तथा सांसद् महेशकश्यपः धन्यवादज्ञापनम् अकरोत्। अस्मिन् अवसरे कार्यशालायां प्रमुखरूपेण मन्त्रिमण्डलमन्त्री केदारकश्यपः, विधायकः विनायकगोयलः, डॉ. सुभाऊकश्यपः, बैदूरामकश्यपः, प्रदेशप्रवक्ता शिवनारायणपाण्डेयः, टेकेश्वरजैनः, सुधीरपाण्डेयः, विद्याशरणतिवारी, जिलापरिषदः अध्यक्षा वेदवतीकश्यपः, महापौरः सञ्जयपाण्डेयः, श्रीनिवासमिश्रः, खेमसिंहदेवाङ्गनः, रामाश्रयसिंहः, बलदेवमण्डावी, परीसरामबेसरा, अश्विनीसर्डे इत्यादयः भाजपापदाधिकारिणः कार्यकर्तारश्च उपस्थिताः आसन्।

---------------

Hindusthan Samachar / Dheeraj Maithani