नवदिल्ली, ०४ सेप्टेम्बरमासः (हि.स.)। महान् स्वातन्त्र्यसेनानी भारतीयराष्ट्रीय-काङ्ग्रेसस्य त्रिवारम् अध्यक्षश्च दादाभाई-नौरोजी-महोदयस्य जयन्त्याः अवसरे शुक्रवासरे संविधान-सदनस्य केन्द्रीयकक्षे तस्य चित्राय पुष्पाञ्जलिं समर्प्य श्रद्धाञ्जलिः अर्पिता।

अस्मिन् अवसरे लोकसभायाः महासचिवः उत्पलकुमारसिंहः, राज्यसभायाः महा-सचिवः पी.सी. मोदी, संसदः वर्तमानाः पूर्वसदस्याः सहिताः अनेके प्रमुखाः जनाः उपस्थिताः आसन्।

दादाभाई-नौरोजी-महोदयः ‘भारतस्य महावृद्धपुरुषः’ इति नाम्ना प्रसिद्धः अस्ति। सः १८९२ तमे वर्षे ब्रिटिश-संसदः हाउस-ऑफ्-कॉमन्स्-सदनाय निर्वाचितः प्रथमः ब्रिटिश-भारतीयः अभवत्। सः भारतात् ब्रिटेनदेशं प्रति सम्पदः प्रवाहसम्बन्धी ‘ड्रेन्-ऑफ्-वेल्थ्’ इति सिद्धान्तं प्रस्तुतवान्। अस्य सिद्धान्तस्य माध्यमेन तेन ब्रिटिशशासनस्य आर्थिकनीतीनां भारतस्य आर्थिकशोषणस्य च वास्तविकता प्रकाशिता। भारतीयस्वातन्त्र्यसङ्ग्रामाय वैचारिकं राजनैतिकं च आधारं प्रदातुं तस्य महत्त्वपूर्णा भूमिका आसीत्।

दादाभाई-नौरोजी-महोदयः भारतीय-राष्ट्रीयकाङ्ग्रेसस्य संस्थापकेषु अन्यतमः आसीत् तथा च १८८६, १८९३ तथा १९०६ तमे वर्षे त्रिवारं काङ्ग्रेसस्य अध्यक्षः अभवत्। १९०६ तमस्य वर्षस्य अधिवेशने तेन सर्वप्रथमं सार्वजनिकरूपेण स्वराज्यस्य मागः प्रस्तुतः। स्वातन्त्र्य-सङ्ग्रामे तस्य योगदानस्य सम्मानं कुर्वन् तत्कालीनः लोकसभाध्यक्षः जी.वी. मावलंकरः १९५४ तमस्य वर्षस्य मार्च-मासस्य १३ दिनाङ्के संसदि दादाभाई-नौरोजी-महोदयस्य चित्रस्य अनावरणं कृतवान्।

Hindusthan Samachar / Divya Ranjan