Enter your Email Address to subscribe to our newsletters
भोपालम्, ०४ सेप्टेम्बरमासः (हि.स.)। मध्यप्रदेशस्य मुख्यमन्त्री डॉ. मोहनयादवः अद्य (शुक्रवासरे) सीहोरे सीजी (क्रॉम्प्टन्-एण्ड्-ग्रीव्स्) पावर एण्ड इण्डस्ट्रियल सॉल्यूशन्स लिमिटेड् इत्यस्याः नूतनस्य शक्तिपरिवर्तित्र-निर्माण-विभागस्य प्रथमस्य शक्तिपरिवर्तित्रस्य बहिर्निर्गम-नस्य शुभारम्भं करिष्यति।
जनसम्पर्काधिकारिणी बबिता मिश्रा इत्यनया सूचितं यत् प्रायः ५० एकरे क्षेत्रे स्थापितोऽयं विभाग: एकस्मिन्नेव स्थाने स्थापित: भारतस्य बृहत्तम: शक्ति-परिवर्तित्र-निर्माण-विभाग: अस्ति। मुख्यमन्त्रिणा डॉ. यादवेन अगस्तमासे २०२५ तमे वर्षे अस्याः संयन्त्रस्य भूमिपूजनं कृतम् आसीत्, अधुना च प्रायः १३ तः १४ मासेषु एव अत्र उत्पादनं प्रारब्धम् अस्ति।
तया सूचितं यत् सीहोरे स्थापित: अयम् अत्याधुनिक-विभाग: देशे वर्धमानानां विद्युत्-आवश्यकतानां दृष्ट्या उच्चक्षमता-युक्तानां शक्तिपरिवर्तित्राणां निर्माणे महत्त्वपूर्णां भूमिकां निर्वक्ष्यति। अत्र २२० के.वी.तः १२०० के.वी.पर्यन्तस्य श्रेण्याः शक्तिपरिवर्तित्राणि निर्मास्यन्ते। विभागस्य उत्पादनक्षमता प्रतिमासं ३५ शक्तिपरिवर्तित्राणां निर्माणस्य भविष्यति। एतादृशस्य विशालक्षमतायुक्तस्य विभागस्य एकस्मिन्नेव स्थाने स्थापनया देशे उच्चवोल्टता-संचरण-उपकरणानां निर्माणं सुदृढं भविष्यति।
जनसम्पर्काधिकारिण्याः अनुसारं सीहोरे निर्मीयमाणानि उच्चक्षमतायुक्तानि शक्ति-परिवर्तित्राणि देशस्य विभिन्नभागेभ्यः सह वैश्विकविपण्येष्वपि प्राप्स्यन्ति। विभागे निर्मीयमाणानि शक्तिपरिवर्तित्राणि विद्युत्क्षेत्रस्य अतिरिक्तं दत्तांशकेन्द्रेषु, रेलमार्गेषु, नवीकरणीय-ऊर्जाक्षेत्रे, तैल-वातिक्षेत्रयोः, संचरणाधोसंरचनासम्बद्धेषु परियोजनासु च उपयुज्यन्ते। सीजी-संस्थायाः अनेन विभागमाध्यमेन सीहोरे २००० तः अधिकाः प्रत्यक्ष-अप्रत्यक्ष-रोजगारावसराः सृज्यन्ते।
Hindusthan Samachar / Divya Ranjan