जम्मूः, 04 सितंबरमासः (हि.स.)। भद्रवाह-शासकीय-स्नातकोत्तर-महाविद्यालयस्य तथा किल्होत्रान-शासकीय-स्नातक-महाविद्यालयस्य संयुक्ततत्त्वावधाने “सततविकासाय शैक्षिकानुसन्धानं रूपान्तरणात्मक-अधिगमश्च — बहुविषयकदृष्टिकोणः” इति विषये आयोजितं द्विदिवसीयम् अन्ताराष्ट्रियसम्मेलनं सम्पन्नम् अभवत्। डोडा-सदृशे पर्वतीयजनपदे अस्मिन् स्तरस्य इदं प्रथमम् प्रत्यक्षम् अन्तर्राष्ट्रीयसम्मेलनम् आसीत्।

सम्मेलनस्य आयोजनं कोलकातास्थितेन अन्ताराष्ट्रिय-हितकारी-अनुसन्धान-प्रतिष्ठानेन (आईबीआरएफ) तथा नवदिल्ल्यां स्थितेन भारतीय-विश्वविद्यालय-महासंघेन सहकारेण कृतम्। जम्मू-कश्मीरस्य उच्चशिक्षाविभागेन तथा जम्मू-कश्मीर-विज्ञान-प्रौद्योगिकी-नवाचार-परिषदा (जेकेएसटीआईसी) च सम्मेलनस्य प्रायोजनं कृतम्।

सम्मेलनस्य आयोजनं राष्ट्रियशिक्षानीतेः (एनईपी) २०२० तथा संयुक्तराष्ट्रसंघस्य सततविकासलक्ष्याणां (एसडीजी) भावनानुरूपं कृतम्। अस्मिन् देशविदेशेभ्यः आगतैः विशेषज्ञैः, शोधकर्तृभिः, शिक्षाविद्भिः नीतिविशेषज्ञैश्च जलवायुसहनशीलता, जैवविविधतासंरक्षणम्, हरितरसायनशास्त्रम्, सततविकासः तथा सामाजिक-आर्थिकपरिवर्तनम् इत्यादिषु महत्त्वपूर्णविषयेषु विचारविमर्शः कृतः।

सम्मेलनस्य शुभारम्भः जीडीसी-भद्रवाहस्य प्राचार्येण प्रोफेसर् बशारत् इक्बालेन स्वागतभाषणेन अभवत्। उद्घाटनसत्रे जीडीसी-किल्होत्रानस्य प्राचार्या प्रोफेसर् अनिता जामवालः, सीआईयू-नवदिल्ल्याः कार्यकारीसचिवः डॉ. तन्मय रुद्रः, एसईआरआई-कोलकातायाः अध्यक्षः डॉ. त्रिदिब् बन्द्योपाध्यायः, विशेषातिथिः लेफ्टिनेन्ट् कर्नल् सुसमा मसानता तथा मुख्यातिथिः प्रोफेसर् जहीर् अब्बास् हाशमी च सम्बोधितवन्तः। अस्मिन् अवसरे महाविद्यालयस्य ‘शाहीन’ इति पत्रिकायाः तथा सम्मेलनस्य सारांशग्रन्थस्य च आधिकारिकरूपेण विमोचनम् अपि कृतम्।

द्विदिनपर्यन्तं प्रवृत्ते अस्मिन् सम्मेलने कनाडादेशस्य लेथब्रिज्-विश्वविद्यालयस्य डॉ. सैकतकुमारबसुः तथा बाङ्ग्लादेशस्य डॉ. बिनयकुमारचक्रवर्ती इत्यादयः अन्तर्राष्ट्रीयवक्तारः पूर्णसभाव्याख्यानानि मुख्यव्याख्यानानि च दत्तवन्तः। समानान्तरप्राविधिकसत्रेषु उत्तर-क्वाण्टम्-कूटलेखनम्, कृत्रिमबुद्धिमत्ताम् आधारेण उद्यानिकी, हिमालयीयपारिस्थितिकतन्त्रे वन्यजीवसंरक्षणम्, नैनोपदार्थानां हरितसंश्लेषणम्, एनईपी-२०२० अन्तर्गतं ‘स्वकीयपदवीं रचयत’ इति रूपरेखा तथा पारिस्थितिकी-समीक्षात्मकं साहित्यं च इत्यादिषु विविधेषु विषयेषु शोधप्रस्तुतयः शैक्षिकचर्चाश्च अभवन्।

सम्मेलनस्य सफलायोजने जीडीसी-भद्रवाहस्य प्राणिशास्त्रविभागाध्यक्षस्य, आईक्यूएसी-संयोजकस्य आयोजनसचिवस्य च डॉ. अयाज् ए. वानी-महोदयस्य भूमिकायाः विशेषरूपेण प्रशंसा कृता। तस्य शैक्षिकदृष्टिकोणेन समन्वयेन च क्षेत्रस्य उच्चशैक्षणिकसंस्थानानि देशविदेशयोः प्रमुखैः शैक्षणिकैः अनुसन्धानसंस्थाभिश्च सम्बद्धानि कर्तुं तथा चिनाब-उपत्यकायाः विद्यार्थिभ्यः शोधार्थिभ्यश्च वैश्विकशैक्षणिकविमर्शस्य परिचयं प्राप्तुं अवसरः प्राप्तः।

Hindusthan Samachar / Dheeraj Maithani