— मुख्यमन्त्रिणा योगिना श्रद्धालुषु पुष्पवृष्टिं कृत्वा जन्माष्टम्याः शुभकामनाः प्रदत्ताः

मथुरा, ०४ सेप्टेम्बरमासः (हि.स.)। श्रीकृष्णजन्माष्टमी-पावनपर्वणः अवसरे मुख्यमन्त्री योगी आदित्यनाथः श्रीकृष्णजन्मस्थानं प्राप्य भगवत: श्रीकृष्णस्य पूजार्चनां कृत्वा आशीर्वादं प्राप्तवान्। मुख्यमन्त्री प्रायः त्रिंशत्-निमेष-पर्यन्तं जन्मस्थान-परिसरे स्थितवान्। अस्मिन् अवसरे तेन श्रद्धालुषु पुष्पवृष्टिं कृत्वा जन्माष्टम्याः शुभकामनाः प्रदत्ताः तथा च उक्तं यत् ब्रजक्षेत्रं जनानां भावनानाम् अनुरूपं विकसितुं किमपि न्यूनं न करिष्यते। तेन उक्तं यत् मथुरा, नन्दग्रामः, बरसाना, गोवर्धनं वृन्दावनं च श्रद्धालूनां श्रद्धायाः भावनानां च अनुरूपं विकसितं करिष्यते।

स्वस्य द्विदिवसीययात्रायाः द्वितीयदिने शुक्रवासरे जन्माष्टमी-पर्वणः अवसरे मुख्यमन्त्री योगी आदित्यनाथः पूर्वाह्ने ९:५५ वादने श्रीकृष्णजन्मस्थानं प्राप्तवान्। मुख्यमन्त्रित्वेन विंशतितमवारं जन्म-स्थानम् आगतः योगी सर्वप्रथमं तत्र गर्भगृहे लालस्य दर्शनं कृतवान्। सम्पूर्णं गर्भगृहं रजतपत्रैः अलङ्कृतम् आसीत्। तत्रत्याम् अद्भुतां शोभां योगी निहारयन् आसीत्। सः दीर्घकालं यावत् गर्भगृहे विराजमानं निहितदृष्ट्या अपश्यत्। अत्र श्रीकृष्णजन्मस्थानसेवासंस्थानस्य पदाधिकारिभिः तस्य स्वागतं कृतम्।

तदनन्तरं मुख्यमन्त्री योगी योगमायामन्दिरं, केशवदेवमन्दिरं ततः भागवतभवनं च गतवान्, यत्र तेन युगलसर्वकारस्य पूजार्चना कृता। तदनन्तरं तेन श्रद्धालूनां समक्षम् उद्घोषितं यत् मथुरा, नन्दग्रामः, बरसाना, गोवर्धनं वृन्दावनं च श्रद्धालूनां श्रद्धायाः भावनानां च अनुरूपं विकसितं करिष्यते। तेन उक्तं यत् ब्रजवासिनां सम्मानाय सः प्रतिजन्माष्टम्यां मथुराम् आगच्छति, यदा तु पूर्वसर्वकाराः स्वस्य मतदातृसमूहस्य भयात् अत्र आगन्तुं संकोचं कुर्वन्ति स्म। तेन उक्तं यत् पूर्वं यत्र जवाहरबागसदृशाः घटनाः भवन्ति स्म, तत्रैव अधुना ब्रजे रङ्गोत्सवस्य ब्रजराजोत्सवस्य च आयोजनं भवति।

विपक्षं प्रति प्रहारं कुर्वन् मुख्यमन्त्री योगी अवदत् यत् वर्तमानसर्वकारः भगवति रामे, भगवति कृष्णे, बाबा-विश्वनाथे मातृ-विन्ध्यवासिन्यां च श्रद्धां धारयति, यदा तु पूर्वसर्वकाराणां श्रद्धा बाबरे औरङ्गजेबे च आसीत्। तेन आरोपितं यत् एतादृशाः जनाः समाजे विषं प्रसारयितुं, महिलानां, अन्नदातॄणां उद्यमिनां च दुर्बलीकरणाय प्रयत्नं कुर्वन्ति, किन्तु द्विइञ्जिन-सर्वकारः तेषां मनोरथान् कदापि सफलान् न भविष्यति। भगवान् कृष्णस्य सन्देशस्य उल्लेखं कुर्वन् तेन सर्वान् कर्तव्यपथि अग्रे गन्तुं विकसितभारतस्य निर्माणे च योगदानं दातुम् आह्वानं कृतम्।

अस्मिन् अवसरे उत्तरप्रदेश-ब्रजतीर्थविकासपरिषदः उपाध्यक्षः शैलजा-कान्तमिश्रः, गन्नाविकासमन्त्री चौधरी लक्ष्मीनारायणः, मूलभूतशिक्षा-राज्यमन्त्री स्वतन्त्रप्रभारः सन्दीपसिंहः, राज्य-सभासदस्यः तेजवीरसिंहः, महापौरः विनोदअग्रवालः, जनपदपञ्चायताध्यक्षः किशनचौधरी, पूर्वमन्त्री विधायकश्च श्रीकान्तशर्मा, पूरनप्रकाशः, मेघश्यामसिंहः, राजेशचौधरी, विधानपरिषदः सदस्यः ओमप्रकाशसिंहः, योगेशचौधरी इत्येतै: सह जनपदाधिकारी सी.पी.सिंहः, वरिष्ठ-आरक्षाधीक्षकः श्लोककुमारः अन्ये च उपस्थिताः आसन्।

Hindusthan Samachar / Divya Ranjan