नवदिल्ली, ०६ सेप्टेम्बरमासः (हि.स.)। भारतीयडाकसेवायाः १९८८-वर्षीयसमूहस्य वरिष्ठाधिकारी डा. विनयप्रकाशसिंहः सततं द्वितीयवारम् एशिया-प्रशान्त-डाकसङ्घस्य महासचिवरूपेण निर्वाचितः अस्ति।

सञ्चारमन्त्रालयस्य अनुसारं थाईलैण्ड-देशस्य बैङ्कॉक-नगरे आयोजिते चतुर्दशे एपीपीयू-सम्मेलने ते सर्वसम्मत्या निर्विरोधं निर्वाचिताः इति घोषितम्। तस्य पुनर्निर्वाचनम् एशिया-प्रशान्तक्षेत्रे भारतस्य नेतृत्वे सदस्यदेशानाम् अटूट-विश्वासं तथा अन्ताराष्ट्रिय-डाककूटनीतौ देशस्य वर्धमानं प्रभावं च रेखाङ्कयति। तस्य द्वितीयः कार्यकालः जनवरी २०२७-मासात् प्रारभ्य दिसम्बर २०३०-मासपर्यन्तं भविष्यति।

डा. सिंहस्य पुनर्निर्वाचनं तस्मिन् समये अभवत् यदा एपीपीयू एशिया-प्रशान्तक्षेत्रे डाकसहयोगं सुदृढं कर्तुं महत्त्वपूर्णां भूमिकां निर्वहति। बैङ्कॉक्-नगरे मुख्यालययुक्तः अयं सङ्घः ३२ सदस्यदेशानां अन्तर-शासकीयसङ्गठनम् अस्ति तथा च संयुक्तराष्ट्रसङ्घस्य डाकक्षेत्राय विशेषाभि-करणस्य सार्वभौम-डाकसङ्घस्य क्षेत्रीय-सङ्घरूपेण कार्यं करोति। तस्य द्वितीयः कार्यकालः क्षेत्रीयसहयोगं सुदृढं कर्तुं तथा डाकक्षेत्रे साझा-प्राथमिकतानां प्रगतिं कर्तुं अधिकम् अवसरं प्रदास्यति।

डा. सिंहः त्रिंशद्वर्षेभ्यः अधिके स्वकीये सेवाजीवने केन्द्रसर्वकारस्य अनेकासु वरिष्ठपदवीषु कार्यं कृतवान्। तेषु डाकसेवामण्डलस्य सदस्यः, डाकविभागे वरिष्ठः उपमहानिदेशकः तथा मुख्य-सतर्कताधिकारी, उत्तरप्रदेश-परिमण्डलस्य मुख्यडाकपालमहानिदेशकः तथा इण्डियापोस्ट्-मुख्यालये मुख्यः महा-प्रबन्धकः इत्यादीनि पदानि सन्ति। सः सङ्घलोकसेवायोगे, अफगानिस्तानदेशे संयुक्तराष्ट्रसङ्घस्य विकासकार्यक्रमे तथा सेनाडाकसेवाकोरे अपि कार्यं कृतवान्। शिक्षाविद्रूपेण सः इलाहाबाद-विश्व-विद्यालयात् आधुनिकेतिहासे स्वर्णपदकं प्राप्तवान् तथा भारतीय-प्रौद्योगिकी-संस्थानात्, दिल्लीतः प्रबन्धने विद्यावारिधेः उपाधिं प्राप्तवान्।

उल्लेखनीयम् अस्ति यत् डा. सिंहः २०२२ तमे वर्षे त्रयोदशे एपीपीयू-काङ्ग्रेसे स्वस्य प्रथमनिर्वाचनानन्तरं जनवरी २०२३-मासे पदभारं स्वीकृतवान्। ततः आरभ्य सः डाकप्रशासनानां मध्ये सहयोगं प्रवर्धयितुं तथा सम्पूर्णे क्षेत्रे डाकसेवानां विकासे आधुनिकीकरणे च योगदानं दत्तवान्।

Hindusthan Samachar / Divya Ranjan