गुवाहाटी, 06 सितंबरमासः (हि.स.)।

असमस्य मुख्यमन्त्री डा हिमन्तबिस्वसर्मा विद्यार्थिभ्यः ध्वंसस्य स्थाने सृजने ध्यानं केन्द्रितुं शिक्षायाः माध्यमेन राष्ट्रनिर्माणे योगदानं दातुं च आह्वानं कृतवान्।

मुख्यमन्त्री रविवासरे गुवाहाटीनगरस्य श्रीमन्तशङ्करदेवकलाक्षेत्रे गीतानगरमहाविद्यालयस्य स्वर्णजयन्तीसमारोहे अवदत् यत् विद्यार्थिभिः राष्ट्रस्य सम्पत्तेः विनाशस्य स्थाने तस्याः निर्माणं संरक्षणं च कथं कर्तव्यम् इत्यस्मिन् विषये ध्यानं दातव्यम्। सः उक्तवान् यत् विद्यार्थिभिः ध्वंसस्य स्थाने सृजनस्य आनन्दं स्वीकर्तव्यम्।

मुख्यमन्त्री उक्तवान् यत् केवलं शिक्षाप्राप्तिः पर्याप्ता नास्ति। विद्यार्थिभिः उत्तमचरित्रस्य निर्माणेन सह राष्ट्रनिर्माणस्य भावनापि विकसितव्या।

अस्मिन् अवसरे उपराष्ट्रपतिः सीपी राधाकृष्णनः अपि उपस्थितः आसीत्। मुख्यमन्त्री असमस्य प्रथमयात्रायां समागतस्य उपराष्ट्रपतेः स्वागतं कुर्वन् उक्तवान् यत् तस्य ज्ञानम् अनुभवश्च सर्वान् प्रेरयिष्यति।

मुख्यमन्त्री उक्तवान् यत् १९७७ तमे वर्षे महिलाशिक्षायाः सशक्तीकरणस्य च उद्देश्येन प्रारब्धः गीतानगरमहाविद्यालयः पूर्वं गीतानगरकन्यामहाविद्यालयः इति नाम्ना प्रसिद्धः आसीत्। अनेन महाविद्यालयेन उच्चशिक्षाक्षेत्रे स्वकीया विशिष्टा च परिचितिः निर्मिता अस्ति।

समारोहे पीएम उषा योजनायाः अन्तर्गतं नवनिर्मितं शैक्षणिकभवनं विद्यार्थिभ्यः समर्पितम्। तथैव महाविद्यालये वाणिज्यशिक्षायाः शुभारम्भाय राज्यसर्वकारस्य पक्षतः त्रिकोटिरूप्यकाणां वित्तीयसहायतां प्रदातुं दिशि आवश्यकपदक्षेपं कर्तुं घोषणा कृता।

मुख्यमन्त्री युवभ्यः कौशलस्य, उद्यमितायाः, नवाचारस्य तथा विज्ञानप्रौद्योगिक्याः ज्ञानं प्राप्त्वा आत्मनिर्भरभारतस्य आत्मनिर्भरअसमस्य च निर्माणे महत्वपूर्णां भूमिकां निर्वोढुम् आह्वानं कृतवान्।

-----------

Hindusthan Samachar / Dheeraj Maithani