भोपालम्, ०६ सेप्टेम्बरमासः (हि.स.)। मध्यप्रदेशस्य मुख्यमन्त्री डॉ. मोहनयादवः अद्य रविवासरात् दुबई-त्रिदिवसीयप्रवासे भविष्यति। अस्मिन् प्रवासकाले सः ‘इन्वेस्ट मध्यप्रदेश–दुबई २०२६’ इत्यस्य अन्तर्गतं संयुक्तारब-अमीरातस्य प्रमुखैः निवेशकैः, उद्योगसमूहैः वैश्विकव्यापारिनेतृभिश्च सह मध्यप्रदेशे निवेशस्य सम्भावनासु प्रत्यक्षं संवादं करिष्यति।

जनसम्पर्काधिकारिणी बबिता मिश्रा इत्यनया उक्तं यत् दुबईनगरे मुख्यमन्त्रिणः डॉ. यादवस्य सहभागितायाः महत्त्वपूर्णः पक्षः ‘एआईएम कांग्रेस-२०२६’ इत्यस्मिन् सहभागिता अपि भविष्यति। अस्य माध्यमेन मध्यप्रदेशस्य औद्योगिक-पर्यटनक्षमतां अन्ताराष्ट्रियोद्योग-समुदायस्य समक्षं प्रस्तोतुं अवसरं प्राप्स्यते। विभिन्नदेशानां संयुक्तारब-अमीरातस्य च शीर्षनीतिनिर्मातृभिः व्यापारिनेतृभिश्च सह आयोज्यमानासु सभासु मध्यप्रदेशे निवेशस्य सम्भावनाः, सहयोगः नूतनावसराश्च विषये चर्चा भविष्यति।

सा उक्तवती यत् त्रिदिवसीयकार्यक्रमे निवेशकैः सह एकान्तसभाभ्यः उच्चस्तरीयशासनिकमिलनपर्यन्तं, ‘एआईएम कांग्रेस’ मध्ये मध्यप्रदेश-पवेलियनस्य उद्घाटनम्, ‘इन्वेस्ट इन मध्यप्रदेश–इण्डिया’ निवेशसत्रम्, शारजाह-उद्योगप्रतिनिधिभिः सह संवादः तथा दुबईनगरस्य प्रमुखैः उद्योगसमूहैः सह सभाः च सम्मिलिताः सन्ति। एतेषां कार्यक्रमाणां माध्यमेन मध्यप्रदेशस्य औद्योगिकं व्यापारिकं पर्यटनसम्बद्धं च सामर्थ्यं निवेशकानां समक्षं प्रभावीरूपेण प्रस्तोष्यते।

प्रथमः दिवसः — प्रवासीभारतीयैः सह संवादः वैश्विकव्यापारिसमुदायेन सह सम्पर्कश्च

राज्यशासनेन निर्गतकार्यक्रमानुसारं मुख्यमन्त्रिण: डॉ. यादवस्य दुबईप्राप्तेः अनन्तरं प्रवासीभारतीयसमुदायेन तस्य स्वागतं करिष्यते। ततः ‘ओडीओपी’ (एकः जनपदः—एकम् उत्पादम्) इत्यस्य विक्रयप्रदर्शनस्थलस्य उद्घाटनं भविष्यति। अस्मिन् प्रदर्शनीस्थले मध्यप्रदेशस्य बेलमेटल्, चन्देरी, माहेश्वरी, बाटिक्, जरी-जरदोजी, ग्वालियर-कालीनादयः स्थानीयोत्पादाः प्रदर्शिताः भविष्यन्ति।

मुख्यमन्त्री संयुक्तारब-अमीराते भारतस्य राजदूतेन डॉ. दीपक-मित्तलेन तथा दुबई-महावाणिज्यदूतेन डॉ. ई. विष्णुवर्धन-रेड्डिना सह मेलनं कृत्वा द्विपक्षीय-आर्थिक-निवेशसम्बन्धविषयेषु चर्चां करिष्यति। मुख्यमन्त्री अरब-संसदः अध्यक्षस्य मोहम्मद-अहमद-अल्-यम्माही-महोदयस्य सम्मानार्थम् आयोज्यमाने कार्यक्रमे भागं ग्रहीष्यति तथा अरब-संसदः अध्यक्षं सदस्यांश्च ‘इन्वेस्ट मध्यप्रदेश ग्लोबल इन्वेस्टर्स समिट् २०२७’ इत्यस्मिन् भागग्रहणाय आमन्त्रयिष्यति।

मुख्यमन्त्री माध्यमप्रतिनिधिभिः सह संवादं करिष्यति तथा ‘एआईएम कांग्रेस-२०२६’ इत्यस्य आमन्त्रणाधारिते ‘टाइकून्स्’ कार्यक्रमे भागं ग्रहीष्यति। अस्मिन् कार्यक्रमे प्रायः पञ्चशतं सार्वभौम-सम्पत्तिनिधीनां, पारिवारिक-कार्यालयानां प्रमुख-निगमसंस्थानां च प्रतिनिधयः भागं ग्रहीष्यन्ति। अत्र निवेशसम्बद्धेषु प्रमुखविषयेषु संवादस्य सह मुख्यमन्त्री डॉ. यादवः ‘एआईएम कांग्रेस’ इत्यस्य अध्यक्षेन महामहिमेन डॉ. थानी-बिन्-अहमद-अल्-जेयूदी-महोदयेन सह सभामपि करिष्यति।

०७ सेप्टेम्बर २०२६ — द्वितीयः दिवसः — ‘एआईएम कांग्रेस’ मध्ये मध्यप्रदेशस्य वैश्विकनिवेशक्षमतायाः प्रदर्शनम्

द्वितीयदिवसस्य प्रमुखः कार्यक्रमः ‘एआईएम कांग्रेस-२०२६’ भविष्यति। मुख्यमन्त्री डॉ. यादवः मध्यप्रदेश-पवेलियनस्य उद्घाटनं करिष्यति। पवेलियनस्य माध्यमेन प्रदेशस्य औद्योगिकक्षमता, निवेशावसराः प्रमुख-क्षेत्राणि च अन्ताराष्ट्रियनिवेशकानां समक्षं प्रस्तुतानि भविष्यन्ति।

मुख्यमन्त्री संघीयसर्वोच्चपरिषदः सदस्येन रास-अल्-खैमाह्-प्रदेशस्य शासकेन शेख सऊद-बिन्-सक्र-अल-कासिमी-महोदयेन सह शिष्टाचारमिलनं करिष्यति तथा तं ‘इन्वेस्ट मध्यप्रदेश ग्लोबल इन्वेस्टर्स समिट् २०२७’ इत्यस्मिन् भागग्रहणाय आमन्त्रयिष्यति। मुख्यमन्त्री डॉ. यादवः राष्ट्राध्यक्षानां शासनाध्यक्षानां च उपस्थितौ ‘एआईएम कांग्रेस’ इत्यस्य उद्घाटनसमारोहे ‘लीडर्स सेशन’ इत्यस्मिन् सम्बोधनं करिष्यति। ततः तातारस्तान-गणराज्यस्य राज्यपालेन सह सभा भविष्यति।

‘इन्वेस्ट इन मध्यप्रदेश–इण्डिया’ निवेशसत्रे मुख्यमन्त्री डॉ. यादवः मध्यप्रदेशस्य निवेशसम्भावनाः राज्यस्य नीतिगतसज्जतां च वैश्विकनिवेशकानां समक्षं स्थापयिष्यति। अस्य सत्रस्य सम्बोधनं विदेशव्यापारराज्यमन्त्री महामहिमः डॉ. थानी-बिन-अहमद-अल-जेयूदी अपि करिष्यति।

मुख्यमन्त्री संयुक्तारब-अमीरातस्य अर्थव्यवस्था-पर्यटनमन्त्री महामहिमेन अब्दुल्ला-बिन-तौक-अल-मर्री-महोदयेन तथा विदेशव्यापारराज्यमन्त्रिणा ‘एआईएम कांग्रेस’ अध्यक्षेन च महामहिमेन डॉ. थानी-बिन्-अहमद-अल-जेयूदी-महोदयेन सह उच्चस्तरीयसभाः करिष्यति। द्वितीयदिने ‘लूलू ग्रुप इन्टरनेशनल’ इत्यस्य अध्यक्षेन प्रबन्धनिदेशकेन च यूसुफ्-अली-एम.ए. महोदयेन सह सभा अपि महत्त्वपूर्ण-कार्यक्रमेषु अन्तर्भविष्यति। दिवसस्य समापनं दुबईनगरस्य व्यापारि-निवेशसमुदायेन सह संवादेन भविष्यति।

०८ सेप्टेम्बर २०२६ — तृतीयः दिवसः — निवेशकैः सह प्रत्यक्षसंवादः तथा शारजाह-दुबई-प्रमुखव्यापारिसमूहैः सह संवादः

तृतीयदिने मुख्यमन्त्री डॉ. यादवः संयुक्तारब-अमीरातस्य प्रमुखनिवेशकैः सह एकान्तसभाः करिष्यति। तेषु राणा होल्डिङ्ग्स्, जेम्स् एजुकेशन, क्रेसेन्ट् ग्रुप्, प्योर् हेल्थ्, शराफ् ग्रुप्, चोइथ्राम्स्, डीपी वर्ल्ड्, ब्यूमर्क् कॉरपोरेशन, वेस्ट् जोन्, केजीके ग्रुप्, विस्टास् मीडिया कैपिटल् तथा वीएफएस् ग्लोबल् इत्यादीनां प्रमुखोद्योगसमूहानां प्रतिनिधयः सम्मिलिताः सन्ति।

तदनन्तरं शारजाह-वाणिज्य-उद्योग-मण्डलस्य अध्यक्षेन महामहिमेन अब्दुल्ला-सुल्तान-अल्-ओवैस-महोदयेन सह सभा भविष्यति। शारजाह-वाणिज्य-उद्योग-मण्डलस्य तथा आईबीपीसी-शारजाहस्य प्रतिनिधिभिः सह गोलमेजसभायां मध्यप्रदेशे निवेशस्य अवसरानां विषये चर्चा भविष्यति तथा तान् ‘इन्वेस्ट मध्यप्रदेश ग्लोबल इन्वेस्टर्स समिट् २०२७’ इत्यस्मिन् भागग्रहणाय आमन्त्रयिष्यति।

मुख्यमन्त्री बीआह्-समूहस्य मुख्य-कार्यकारी-अधिकारेण सह अपि सभा करिष्यति। अस्मिन् अवसरे मध्यप्रदेशे निवेशस्य सम्भावनानां विषये प्रस्तुती-करणं भविष्यति तथा ‘ग्लोबल इन्वेस्टर्स समिट् २०२७’ इत्यस्य निमन्त्रणं प्रदास्यते। ततः दुबईनगरस्य प्रमुखव्यापारिसमूहस्य इमार-समूहस्य मुख्यकार्यकारी-अधिकारेण सह सभा भविष्यति। एषा सभा अचलसम्पत्तिक्षेत्रे, नगरीयविकासे तत्सम्बद्धेषु च क्षेत्रेषु सम्भावितनिवेशस्य सहयोगस्य च दृष्ट्या महत्त्वपूर्णा भविष्यति।

तृतीयदिने सायंकाले ‘इन्वेस्ट मध्यप्रदेश: निवेशावसराणां विषये संवादसत्रम्’ आयोजितं भविष्यति। अस्मिन् संयुक्तारब-अमीरातस्य व्यवसाय-परोपकारयोः विशेषदूतः महामहिमः बद्र-जाफरः विशिष्टातिथिरूपेण भागं ग्रहीष्यति। सत्रे मध्यप्रदेशस्य औद्योगिक-पर्यटनक्षेत्रयोः सम्भावनाः प्रस्तुताः भविष्यन्ति तथा मुख्यमन्त्री डॉ. यादवः निवेशकान् प्रमुखोद्योगप्रतिनिधींश्च मध्यप्रदेशे उपलब्धैः अवसरैः प्रत्यक्षरूपेण परिचाययिष्यति।

त्रिदिवसीयनिवेशककेन्द्रितकार्यक्रमस्य अनन्तरं मुख्यमन्त्री डॉ. यादवः ०९ सेप्टेम्बर-दिनाङ्के दुबईतः नवदिल्लीं प्रति प्रस्थास्यति।

Hindusthan Samachar / Divya Ranjan