काठमांडूः, 06 सितंबरमासः (हि.स.)।

दक्षिणकोरियादेशः जलप्लावनानन्तरं नेपालदेशे प्रचलितेषु पुनर्निर्माणप्रयासेषु सहयोगं कर्तुं प्रतिबद्धतां प्रकटितवान्। रविवासरे सिंहदरबारस्थे विदेशमन्त्रालये नेपालस्य विदेशमन्त्री शिशिरखनालस्य दक्षिणकोरियादेशस्य विदेशमन्त्री चोह्युनस्य च मध्ये सम्पन्नायां भेटवार्तायां कोरियादेशेन एषा इच्छा प्रकटिता।

विदेशमन्त्रालयस्य अनुसारं अगस्तमासस्य षड्विंशतितमे दिनाङ्के अभूतायाः विनाशकारिण्याः बाढ्याः अनन्तरं प्रचलितानां अन्वेषणकार्याणां, उद्धारकार्याणां, राहतकार्याणां तथा लापता कोरियादेशीयनागरिकाणां अन्वेषणस्य च विषये विस्तृता चर्चा अभवत्। मन्त्री खनाले बाढप्रभावितक्षेत्रेषु कोरियादेशस्य आपदाराहतदलस्य अन्तरसंस्थागतत्वरितप्रतिक्रियादलस्य च प्रेषणाय दक्षिणकोरियासर्वकारस्य प्रति कृतज्ञतां प्रकटितवान्।

मानवीयसाहाय्यस्य राहतसामग्रीणां च उपलब्धीकरणाय कोरियादेशस्य प्रशंसां कुर्वन् मन्त्री खनालः अवदत् यत् आगामिषु दिनेषु आपदारोधकस्य, स्थायिनः, सुदृढस्य च आधारभूतसंरचनायाः निर्माणं नेपालसर्वकारस्य प्रमुखप्राथमिकता अस्ति। अस्य कृते दक्षिणकोरियादेशात् निरन्तरसहयोगस्य अपेक्षामपि सः प्रकटितवान्।

प्रत्युत्तररूपेण दक्षिणकोरियादेशस्य विदेशमन्त्री चोह्युनः अवदत् यत् आपदानन्तरं पुनर्निर्माणकार्ये नेपालदेशस्य साहाय्यं कर्तुं कोरियासर्वकारः पूर्णतया सज्जः अस्ति। जलवायुपरिवर्तनस्य कारणेन नेपालसदृशदेशैः सह जायमानहानिविषये अन्तर्राष्ट्रीयसमुदायस्य ऐतिहासिकदायित्वं प्रतिपादयन् सः अवदत् यत् अस्मिन् विषये संयुक्तराष्ट्रजलवायुसम्मेलनसदृशेषु वैश्विकमञ्चेषु अन्यदेशान् जागरूकान् कर्तुं नेपालं दक्षिणकोरियादेशश्च मिलित्वा कार्यं कुर्याताम्।

विदेशमन्त्री ह्युनः एतदपि प्रतिबद्धतां प्रकटितवान् यत् नेपालदेशेन अन्तर्राष्ट्रीयसमुदायात् प्राप्यमाणायाः आर्थिकसहायतायाः विषये दक्षिणकोरियादेशः स्वपक्षतः स्वरं प्रबलतया उत्थापयिष्यति।

बैठकस्य अन्ते उभौ विदेशमन्त्रिणौ दीर्घकालात् प्रचलितां मैत्रीं, परस्परविश्वासं सहयोगं च आधारीकृत्य द्विपक्षीयसम्बन्धान् अधिकं सुदृढीकृत्य नूतनान् उच्चशिखरान् प्रति नेतुं मिलित्वा कार्यं कर्तुं प्रतिबद्धतां पुनरपि प्रकटितवन्तौ।

दक्षिणकोरियादेशस्य विदेशमन्त्री चोह्युनः त्रिदिवसीयनेपालयात्रायै आगतः अस्ति।

---------------

Hindusthan Samachar / Dheeraj Maithani