सूरतम्, 06 सितंबरमासः (हि.स.)। देशव्यापिनः स्वस्थस्य सक्रियस्य मादकतामुक्तस्य च जीवनशैल्याः प्रोत्साहनस्य उद्देशेन नवाशीतितमस्य फिट् इण्डिया सण्डे ओन् साइकिल इत्यस्य मुख्यकार्यक्रमः रविवासरे गुजरातस्य सूरतनगरे नशामुक्तयुवा विकसितभारताय इति विषयवस्तुना आयोजितः। कार्यक्रमे क्रीडकाः, स्वास्थ्यव्यायामप्रेमिणः, छात्राः, युवजनाः, सामान्यनागरिकाश्च भागं गृहीतवन्तः। अस्मिन् अवसरे केन्द्रीययुवकार्यक्रीडामन्त्री डा मनसुखमाण्डवियः गुजरातस्य उपमुख्यमन्त्री हर्षसङ्घवी च उपस्थितौ आस्ताम्।

कार्यक्रमं सम्बोधयन् डा मनसुखमाण्डवियः अवदत् यत् प्रधानमन्त्री नरेन्द्रमोदिनः फिट् इण्डिया इति आन्दोलनस्य परिणामस्वरूपं देशव्यापकरूपेण सण्डे ओन् साइकिल इति अभियानं व्यापकं स्वरूपं प्राप्तम् अस्ति। सः अवदत् यत् विकसितराष्ट्राय स्वस्थजनसङ्ख्या आवश्यकी अस्ति तथा च सायकलचालनं स्वस्थसमाजस्य निर्माणे महत्त्वपूर्णां भूमिकां निर्वहति।

सः अवदत् यत् सायकलचालनस्य अनेकाः लाभाः सन्ति। तत् प्रभावीव्यायामस्य माध्यमम् अस्ति, नशामुक्तभारत-अभियानं सुदृढं करोति, प्रदूषणस्य न्यूनीकरणे साहाय्यं करोति तथा इन्धनस्य उपभोगं न्यूनीकृत्य पर्यावरणसंरक्षणे योगदानं ददाति। माण्डवियः जनान् आह्वयत् यत् सायकलचालनं केवलं रविवासरपर्यन्तं सीमितं न स्थापयित्वा तद् दैनिकजीवनस्य भागं कुर्वन्तु। विशेषतः समीपस्थेषु कार्यस्थलेषु गमनागमनाय सायकलस्य उपयोगेन फिट् इण्डिया इति सङ्कल्पः अधिकं सुदृढः भविष्यति।

कार्यक्रमस्य माध्यमेन विशेषरूपेण युवजनाः नशात् दूरं स्थातुं नशामुक्तभारतस्य निर्माणे च योगदानं दातुं प्रेरिताः। सुरतनगरे सायकलकार्यक्रमस्य प्रारम्भः प्रातः माङ्गढचतुष्पथे स्थितस्य सरदारपटेलस्य प्रतिमायाः समीपात् अभवत्। प्रतिभागिनः योगं, जुम्बां विविधाः स्वास्थ्यव्यायामक्रियाश्च कृतवन्तः। ततः प्रायः षड्किलोमीटरपरिमिता सायकलयात्रा सरथानाप्राणिसङ्ग्रहालयं प्रति निष्क्रान्ता।

राष्ट्रियेराजधान्यां नवदिल्लीनगरे नवाशीतितमस्य फिट् इण्डिया सण्डे ओन् साइकिल इत्यस्य आयोजनं मेजरध्यानचन्दराष्ट्रियक्रीडाङ्गणे कृतम्। कार्यक्रमे युवजनानां जीवनाय वृत्तिजीवनाय च दिशां प्रदातॄणां शिक्षकाणां प्रशिक्षकाणां च अमूल्ययोगदानस्य सम्मानः कृतः। नवदिल्लीनगरे आयोजिते कार्यक्रमे छात्राः, युवजनाः स्वास्थ्यव्यायामप्रेमिणश्च भागं गृहीतवन्तः।---------------

Hindusthan Samachar / Dheeraj Maithani