प्रयागराजम्, ०६ सेप्टेम्बरमासः (हि.स.)। मध्यप्रदेशस्य पूर्वराज्यमन्त्री तथा काङ्ग्रेसकार्यसमित्याः सदस्यः कमलेश्वरपटेलः रविवासरे प्रातः प्रयागराजप्रवाससमये वार्ताहरैः सह वार्तालापं कृतवान्। सः जातिगणनाविषये केन्द्रसर्वकारस्य भाजपादलस्य च उपरि लक्ष्यं साधयन् आरोपितवान् यत् सर्वकारस्य नीयतिः स्पष्टा नास्ति। सः सम्पूर्णदेशे जातिगणना कारयितुं याचनां कृतवान्।

कमलेश्वरपटेलः अवदत् यत् यथा तेलङ्गानासर्वकारेण जातिगणना कारिता, तथैव सम्पूर्णदेशेऽपि जातिगणना कारयितव्या। सः आरोपितवान् यत् केन्द्रसर्वकारेण क्रियमाणायां जन-गणनायां अनुसूचितजातीनां अनुसूचित-जनजातीनां च कृते जातिसम्बद्धां डिजिटल-सूचनां अभिलिखितुं प्रावधानं कृतम् अस्ति, किन्तु सामान्यवर्गस्य, अतिपश्चाद्वर्गीयानां, पश्चाद्वर्गीयानां मुस्लिमसमाजस्य च कृते एतादृशसूचनां अभिलिखितुं पर्याप्ता व्यवस्था न कृता अस्ति। अतः सामाजिकन्यायस्य परिकल्पना पूर्णतां प्राप्तुं न शक्नोति।

अस्मिन् अवसरे नगरकाङ्ग्रेसाध्यक्षः फुजैल हाश्मी, यमुनापारकाङ्ग्रेसाध्यक्षः अशोकपटेलः, गङ्गापारकाङ्ग्रेसाध्यक्षः असफाक् अहमदः, वरिष्ठकाङ्ग्रेसनेता किशोरवार्ष्णेयः, काङ्ग्रेसनेता राधेश्याम-यादवः तथा माध्यमप्रभारी विनयपाण्डेयः उपस्थिताः आसन्।

Hindusthan Samachar / Divya Ranjan