वाराणसी, 06 सितंबरमासः (हि.स.)। उत्तरप्रदेशस्य वाराणस्यां नमामिगङ्गे-अभियानस्य स्वयंसेवकैः रविवासरे वाराणस्याः सामनेघाटे स्वच्छताभियानं सञ्चाल्य गङ्गातटस्य स्वच्छता कृता। अभियानस्य अनन्तरं स्वयंसेवकैः गङ्गामातुः आरती कृता तथा गङ्गायाः जलस्तरः शीघ्रं न्यूनः भवेत्, तटवर्तिक्षेत्रेभ्यः च जनप्लावनेन सम्बद्धं संकटं पूर्णतया निवर्तेत इति प्रार्थना कृता।

स्वयंसेवकैः गङ्गायाः स्वच्छतायाः संरक्षणस्य च सङ्कल्पः स्वीकृतः। घाटे उपस्थितान् जनान् अपि स्वच्छतायाः प्रति जागरूकाः कृतवन्तः। अस्मिन् समये राष्ट्रध्वजं, स्वच्छतासम्बद्धसन्देशयुक्ताः फलकाः वस्त्रनिर्मितानि च झोलकानि धृत्वा पर्यावरणसंरक्षणस्य सन्देशः प्रदत्तः। जनान् गङ्गाघाटान् स्वच्छान् स्थापयितुं गङ्गायां च किमपि अपशिष्टं न क्षेप्तुं आग्रहः कृतः।

गङ्गासेवकः राजेशशुक्लः अवदत् यत् गङ्गामातुः समीपे जलस्तरः शीघ्रं न्यूनः भवेत्, बाढ्याः संकटं समाप्तं भवेत् जनजीवनं च सामान्यं भवेत् इति प्रार्थना कृता। सः अवदत् यत् ‘सर्वेषां सहयोगेन—गङ्गा स्वच्छा भवेत्’ इति सन्देशः जनजनं प्रति प्रसारयितुं आवश्यकता अस्ति। गङ्गाघाटानां पवित्रतां सौन्दर्यं च संरक्षितुं समाजस्य प्रत्येकः व्यक्तिः स्वच्छतायाः प्रति स्वकीयां दायित्वं निर्वहेत्।

कार्यक्रमस्य समये स्वयंसेवकैः गङ्गासंरक्षणं पर्यावरणसुरक्षां च प्रति जनाः जागरूकाः कृताः। तैः उक्तं यत् गङ्गायाः स्वच्छता केवलस्य कस्यचित् संस्थायाः समूहस्य वा दायित्वं नास्ति, अपि तु सामूहिकप्रयासेन एव तां स्थायिरूपेण स्वच्छां निर्मलां च कर्तुं शक्यते।

अभियाने सुभाषश्रीवास्तवः, लल्लनसिंहः, गुड्डूमहाराजः, शशिकान्तपाण्डेयः, प्रमोदकुमारपाण्डेयः, किरणपाण्डेयः, राजकपूरसिंहः, कृष्णानन्दः, आशीषकुमाररायः, केदारनाथत्रिपाठी इत्यादयः नमामिगङ्गे-अभियानस्य स्वयंसेवकाः सहभागं कृतवन्तः।

Hindusthan Samachar / Dheeraj Maithani