देहरादूनम्, ०६ सेप्टेम्बरमासः (हि.स.)। मुख्यमन्त्री पुष्करसिंहधामी रविवासरे देहरादूनस्य गढीकैण्ट-क्षेत्रे जसवन्तसिंह-क्रीडाङ्गणे आयोजिते गोर्खाली-महिला-हरितालिका-तीजोत्सवे सहभागं कृतवान्। अस्मिन् अवसरे मुख्यमन्त्री हरितालिका-तीजोत्सवस्य आयोजनं सर्वकारीयस्तरे अधिकभव्यरूपेण करणीयमिति घोषितवान्। सः गोरखासमाजस्य मातृभ्यः भगिनीभ्यश्च हरितालिका-तीजस्य शुभकामनाः प्रदाय तासां सुखस्य, शान्तेः, समृद्धेः, सौख्यस्य च कामनां कृतवान्।

मुख्यमन्त्री अवदत् यत् हरितालिका-तीजपर्व माता पार्वत्याः अखण्डतपस्यायाः, विश्वासस्य, समर्पणस्य, शक्तेः च प्रतीकम् अस्ति। एतत् पर्व अस्मान् दृढसङ्कल्पेन अखण्डविश्वासेन च स्वलक्ष्यं प्रति अग्रे गन्तुं प्रेरयति। सः अवदत् यत् तीजसदृशाः पारम्परिकपर्वाणि अस्माकं नववंशं स्वसंस्कृत्या मूलैश्च सह संयोजयितुं महत्त्वपूर्णं माध्यमानि सन्ति। मातरः भगिन्यश्च अस्माकं संस्कृतेः, परम्पराणां, संस्काराणां च प्रमुखाः संरक्षकाः सन्ति। तासां प्रयासैः अस्माकं भाषा, लोकपरम्पराः, सांस्कृतिकं च धरोहरं वंशतः वंशं प्रति अग्रे वर्धते।

मुख्यमन्त्री अवदत् यत् गोरखासमाजः स्ववीरतया, निष्ठया, परिश्रमेण, राष्ट्रभक्त्या च प्रसिद्धः अस्ति। देशस्य सीम्नां रक्षणे गोर्खावीरेभ्यः सदैव अदम्यसाहसस्य शौर्यस्य च परिचयः प्रदर्शितः। देशाय सर्वस्वं समर्पयितुं गोर्खासमाजस्य भावना सम्पूर्णेन देशेन गर्वस्य विषयः अस्ति। मुख्यमन्त्री अवदत् यत् उत्तराखण्डस्य विकासयात्रायां गोर्खासमाजस्य महत्त्वपूर्णं योगदानम् अभवत्। शिक्षायां, क्रीडायां, कलासाहित्ये, समाजसेवायां च विभिन्नेषु क्षेत्रेषु समाजस्य जनैः स्वपरिश्रमेण सत्यनिष्ठया च प्रदेशस्य प्रगत्यै महत्त्वपूर्णा भूमिका निर्व्यूढा।

मुख्यमन्त्री अवदत् यत् अद्य मसूरी-विधानसभाक्षेत्रे अमरशहीदस्य कप्तान-दलबहादुरथापामहोदयस्य स्मृतौ निर्मीय-माणस्य ‘आजादहिन्दफौज-शहीदद्वारस्य’ शिलान्यासः अपि कृतः। सः अवदत् यत् एतत् शहीदद्वारं गोरखासमाजस्य अदम्यशौर्यस्य, त्यागस्य, राष्ट्रभक्तेः च प्रतीकं भविष्यति तथा अग्रिमवंशं तस्य त्यागेन बलिदानेन च परिचयं कारयिष्यति।

मुख्यमन्त्री भारत-नेपालयोः आत्मीय-सम्बन्धानां उल्लेखं कुर्वन् अवदत् यत् उभयोः देशयोः मध्ये केवलं समीपस्थ-देशयोः सम्बन्धः नास्ति, अपितु शताब्दीनां प्राचीनाः सांस्कृतिकाः पारिवारिकाश्च सम्बन्धाः सन्ति। सीमावर्तीक्षेत्रात् सम्बद्धत्वात् तेन भारत-नेपालयोः सहभागं संस्कृतिम्, आत्मीयतां, परस्परसम्बद्धतां च निकटतः अनुभूतम् अस्ति। नेपालदेशे उत्पन्नायाः प्राकृतिकापदायाः उल्लेखं कुर्वन् मुख्यमन्त्री अवदत् यत् अस्मिन् कठिनसमये भारतं नेपालस्य पार्श्वे दृढतया स्थितम् अस्ति। सः आपदापीडितेभ्यः जनेभ्यः संवेदनां प्रकटयन् नेपालदेशस्य शीघ्रम् अस्मात् सङ्कटात् मुक्तेः कामनां कृतवान्।

मुख्यमन्त्री अवदत् यत् मातृशक्तेः सशक्तीकरणं राज्यसर्वकारस्य सर्वोच्च-प्राथमिकतासु अन्तर्भवति। अस्यै दिशायै राज्यसर्वकारेण महिलाभ्यः सर्वकारीय-सेवासु त्रिंशत्प्रतिशतं क्षैतिजम् आरक्षणं प्रदत्तम् अस्ति। उत्तराखण्डे समान-नागरिकसंहिता कार्यान्विता कृत्वा महिलानां अधिकारान् सशक्तीकर्तुं महत्त्वपूर्णं पदं स्वीकृतम् अस्ति।

स्वसहायतासमूहानां माध्यमेन महिलाः आर्थिकरूपेण आत्मनिर्भराः भवन्तु इत्यर्थमपि व्यापकस्तरे कार्यं क्रियते। प्रदेशे त्रिलक्षाधिकाः महिलाः ‘लखपतिदीदी’ इति योजनायाः अन्तर्गतं आत्मनिर्भराः भूत्वा न केवलं स्वपरिवारस्य, अपितु प्रदेशस्य अर्थव्यवस्थायाः सुदृढीकरणेऽपि महत्त्वपूर्णां भूमिकां निर्वहन्ति। मुख्यमन्त्री अवदत् यत् राज्यसर्वकारः मातृशक्तेः सशक्तीकरणाय तासां कल्याणाय च प्रतिबद्धः अस्ति।

अस्मिन् अवसरे मन्त्रिमण्डलस्य मन्त्री गणेशजोशी, आचार्यबालकृष्णः, गीता-पुष्करधामी, गोरखालीसुधारसभायाः अध्यक्षः पद्मसिंहथापा, गोर्खालीमहिला-हरितालिकातीजोत्सवसमितेः अध्यक्षा प्रभाशाह, गोरखाकल्याणपरिषदः अध्यक्षा ज्योतिकोटिया, नेहाजोशी, सिद्धार्थ-अग्रवालः, अनुकृतिगुसाईं इत्यादयः उपस्थिताः आसन्।

Hindusthan Samachar / Divya Ranjan