भोपालम्, ०७ सेप्टेम्बरमासः (हि.स.)। मध्यप्रदेशस्य राजधानी भोपालस्य करोंदे रविवासरे रात्रौ जन्माष्टमी-अवसरे आयोजिते मटकी-भञ्जनकार्यक्रमे हुजूर-क्षेत्रस्य भाजपाविधायकः रामेश्वरशर्मा ‘काजी-कैम्प-उपरि मिसाइल पातयितव्यम्’ इति यत् वक्तव्यं दत्तवान्, तेन मध्यप्रदेशस्य राजनीतिः उष्णा अभवत्। वक्तव्यं प्रकाशितं भवितुं अनन्तरं विधायकः स्पष्टीकरणं दत्त्वा उक्तवान् यत् तस्य आशयः भोपालस्य काजी-कैम्प्-प्रदेशात् न, अपितु इस्लामाबादनगरात् आसीत्। अपरतः काङ्ग्रेसेन विधायकस्य अस्य स्पष्टीकरणस्य विषये एव प्रश्नाः उत्थापिताः। काङ्ग्रेसेन मुख्यमन्त्री डॉ. मोहनयादवात् सर्वकारस्य मतं स्पष्टं कर्तुं तथा विधायकस्य विरुद्धं कार्यवाही भविष्यति वा न वा इति विषये उत्तरं याचितम्।

वस्तुतः रविवासरे रात्रौ राजधानी भोपालस्य करोंदस्थिते भगतसिंहचतुष्पथे आयोजितायां मटकी-भञ्जनप्रति-योगितायां भाजपाविधायकः शर्मा कार्यक्रमं सम्बोधयन् हिन्दू-एकतायाः, राष्ट्रवादस्य, आतङ्कवादस्य च उल्लेखं कृतवान्। तेन उक्तं यत् हिन्दू-एकता केवलं मटकी-भञ्जनपर्यन्तं सीमिता न भवेत्, अपितु समाजः प्रत्येकस्मिन् स्तरे एकतां धारयेत्। भाषणस्य क्रमे पाकिस्तानस्य उल्लेखं कुर्वन् तेन उक्तं यत् सः दिवसः दूरं नास्ति यदा लाहौरनगरे, ढाकानगरे, इस्लामाबाद-नगरे च मटकी-भञ्जनप्रतियोगिता भविष्यति। रामेश्वरशर्मा स्वकीयसम्बोधने हिन्दूसमाजं जातिषु विभज्य न, अपितु एकतया स्थातुं च आह्वानं कृतवान्। तेन उक्तं यत् जनैः जातिगतपरिचयात् पूर्वं हिन्दूत्वस्य भारतीयत्वस्य च परिचयः प्राथमिकतया स्वीकरणीयः। तेन देशाय समर्पणस्य मातृभूमौ निष्ठायाः च विषये अपि उक्तम्।

अस्यैव क्रमे तेन प्रधानमन्त्रिण: नरेन्द्रमोदिनः नेतृत्वस्य प्रशंसां कुर्वन् उक्तं यत् यदा हिन्दुस्थानस्य जनाः वदन्ति स्म यत् वयं सुईम् अपि निर्मातुं न जानीमः, तदा मोदीमहोदयेन उक्तं यत् वयं मिसाइल्-निर्माणं करिष्यामः। अग्रे सः विवादितं वक्तव्यं दत्त्वा उक्तवान्— “करोंदचतुष्पथात् मिसाइल प्रक्षिप्तं चेत् काजी-कैम्प्-प्रदेशे गत्वा पतिष्यति।” तदनन्तरं शर्मा शीघ्रमेव स्पष्टीकरणं दत्त्वा उक्तवान् यत् तस्य आशयः भोपालस्य काजी-कैम्प-प्रदेशात् न, अपितु इस्लामाबादस्थित-काजी-कैम्प-प्रदेशात् आसीत्। तस्य वक्तव्यस्य दृश्यश्रव्यचित्रं प्रकाशितं भवितुं अनन्तरं राजनैतिकविवादः आरब्धः।

काङ्ग्रेसेन पृष्टम्— इस्लामाबादे काजी-कैम्प कुत्र अस्ति?

काङ्ग्रेसस्य माध्यमसमन्वयकः अब्बास-हाफिजः विधायकस्य स्पष्टी-करणस्य विषये प्रश्नम् उत्थापितवान्। सः अन्तर्जाल-अन्वेषणस्य उल्लेखं कुर्वन् उक्तवान् यत् वयं सम्पूर्णे गूगल्-अन्तर्जाले अन्वेषणं कृतवन्तः, किन्तु इस्लामाबादे ‘काजी-कैम्प’ इति नाम्नः कश्चन प्रदेशः वा मोहल्लः वा अस्तित्वे नास्ति। काङ्ग्रेसनेता अब्बास-हाफिजः पृष्टवान् यत् यदि विधायकस्य आशयः इस्लामाबादात् आसीत्, तर्हि तत्र काजी-कैम्प अन्ततः कुत्र अस्ति? हाफिजः उक्तवान् यत् भोपालस्य कस्यचित् प्रदेशस्य विषये सार्वजनिक-मञ्चात् मिसाइलपातनस्य विषये वक्तव्यं गम्भीरं निन्दनीयं च अस्ति। तेन मुख्यमन्त्रिणः पृष्टं यत् सर्वकारः अस्य वक्तव्यस्य विषये किं मतं धारयति तथा विधायकस्य विरुद्धं काचित् कार्यवाही करिष्यते वा न वा।

सर्वकारस्य अभिमतं प्रति काङ्ग्रेसेन लक्ष्यं साधितम्

काङ्ग्रेसेन सम्पूर्णं प्रकरणं कानूनव्यवस्थया राजनैतिकोत्तरदायित्वेन च सम्बद्धं मन्यमानेन मुख्यमन्त्रिणः स्पष्टमतस्य आग्रहः कृतः। काङ्ग्रेसनेतुः कथनम् अस्ति यत् सार्वजनिकमञ्चेभ्यः नेतॄणां वक्तव्यसम्बन्धे सर्वकारेण समानरूपेण स्वपक्षः स्पष्टः कर्तव्यः। काङ्ग्रेसेन इदमपि पृष्टं यत् किं सर्वकारः एतादृशानि वक्तव्यानि स्वीकार्याणि मन्यते? अब्बासहाफिजः मुख्यमन्त्रिणः विदेशप्रवासस्य प्रदेशे निवेशाकर्षणाय सर्वकारस्य प्रयासानां च उल्लेखम् अपि कृतवान्। तेन पृष्टं यत् एकतः सर्वकारः निवेशकेभ्यः मध्यप्रदेशम् आगन्तुं सन्देशं ददाति, अपरतः सार्वजनिकमञ्चेभ्यः विवादितानि वक्तव्यानि प्रकाशं यान्ति चेत् प्रदेशस्य प्रतिमायाः विषये जनसमुदाये क: सन्देशः गच्छति?

Hindusthan Samachar / Divya Ranjan