— पञ्जाबस्य राज्यपालेन लोकभवने शपथं ग्राहिता, पञ्जाबसर्वकारेण समारोहस्य बहिष्कारः कृतः

चण्डीगढम्, ०७ सेप्टेम्बरमासः (हि.स.)। पञ्जाबसर्वकारस्य विरोधस्य अविचारेऽपि न्यायमूर्तिः अश्वनीकुमारमिश्रः सोमवासरे प्रातः पञ्जाबलोकभवने आयोजिते समारोहें पञ्जाब-हरियाणोच्च-न्यायालयस्य सप्तत्रिंशत्तमः मुख्य-न्यायाधीशः इति रूपेण शपथं गृहीतवान्। पञ्जाबस्य राज्यपालः गुलाबचन्दकटारिया तम् पदस्य गोपनीयतायाश्च शपथं ग्राहयितवान्।

न्यायमूर्तेः मिश्रस्य पूर्वं न्यायमूर्तिः शीलनागू पञ्जाब-हरियाणोच्च-न्यायालयस्य मुख्यन्यायाधीशः आसीत्। २०२६ तमस्य वर्षस्य जून-मासे तस्य नियुक्तिः उच्चतमन्यायालयस्य न्याया-धीशरूपेण अभवत्।

पञ्जाबसर्वकारेण न्यायमूर्तेः मिश्रस्य नियुक्तेः रविवासरे विरोधः कृतः। राज्यसर्वकारेण आपात्कालीनसभा आहूय नियुक्तेः विरुद्धं प्रस्तावः पारितः। सर्वकारस्य कथनम् आसीत् यत् नियुक्तिसमये पञ्जाबसर्वकारस्य मतं न गृहीतम् तथा निर्धारितस्य एस्.ओ.पी.-इत्यस्य उल्लङ्घनम् अभवत्। एतस्मिन् आधारे सर्वकारेण शपथग्रहणं स्थगयितुं याचना कृता आसीत्।

पूर्वघोषणानुसारं पञ्जाबस्य मुख्यमन्त्री भगवन्तमानः तथा राज्यसर्वकारस्य अन्ये मन्त्रिणः शपथग्रहणसमारोहे भागं न गृहीतवन्तः। गुप्तचरसंस्थाभिः समारोहस्य समये विरोधस्य आशङ्कां प्रति सूचनाः प्रदत्ताः आसन्। तदनुसारं चण्डीगढपुलिस्-सुरक्षाव्यवस्थां सुदृढीकृत्य अनेकान् मार्गान् पिहितवती तथा यातायातस्य मार्गपरिवर्तनं कृतवती। पञ्जाब-लोकभवनस्य दिशि गच्छतां वाहनानां सघनतया परीक्षणं कृतम्।

समारोहे हरियाणस्य मुख्यमन्त्री नायबसिंहसैनी तथा राज्यपालः प्रो. असीमकुमारघोषः उपस्थितौ आस्ताम्। हरियाणस्य कृषिमन्त्री श्यामसिंहराणा इत्यादयः अनेके अधिकारिणः अपि समारोहे उपस्थिताः आसन्। पञ्जाबस्य मुख्यमन्त्रिणः कृते मञ्चे निर्धारितं आसनं रिक्तमेव आसीत्।

Hindusthan Samachar / Divya Ranjan